ഉത്തരകൊറിയൻ മൃഗശാലക്ക് സിംഹത്തെയും കരടികളെയും സമ്മാനിച്ച് പുടി​ൻ

​പ്യോങ്യാങ്: മോസ്‌കോയും പ്യോങ്‌യാങും തമ്മിൽ വളർന്നുവരുന്ന ബന്ധത്തി​ന്‍റെ മറ്റൊരു അടയാളമായി റഷ്യൻ പ്രസിഡന്‍റ് വ്ളാദിമിർ പുടിൻ ഉത്തര കൊറിയയുടെ പ്രധാന മൃഗശാലക്ക് ഒരു സിംഹവും രണ്ട് തവിട്ട് കരടികളും ഉൾപ്പെടെ 70ലധികം മൃഗങ്ങളെ സമ്മാനിച്ചു.

പുടി​ന്‍റെ പരിസ്ഥിതി മന്ത്രി അലക്‌സാണ്ടർ കോസ്‌ലോവ് ഒരു കാർഗോ വിമാനത്തിൽ ഉത്തരകൊറിയൻ തലസ്ഥാനത്തേക്ക് മൃഗങ്ങളെ കൊണ്ടുവന്നതായി കോസ്‌ലോവി​ന്‍റെ ഓഫിസ് ഔദ്യോഗിക ടെലഗ്രാം ചാനലിൽ അറിയിച്ചു.

മോസ്കോയിൽ നിന്നുള്ള മൃഗങ്ങളുടെ കയറ്റുമതിയിൽ രണ്ട് യാക്കുകൾ, അഞ്ച് തത്തകൾ, ഡസൻ കണക്കിന് ഫെസന്‍റുകൾ എന്നിവയും മണ്ഡാരിൻ താറാവുകളും ഉൾപ്പെടുന്നുവെന്ന് കോസ്‌ലോവി​ന്‍റെ ഓഫിസ് അറിയിച്ചു.റഷ്യൻ പരിസ്ഥിതി മന്ത്രി പ്യോങ്യാങ്ങിൽ കിമ്മിനെ സന്ദർശിക്കുകയും ചെയ്തു.

യുക്രെയിനിൽ റഷ്യക്കൊപ്പം പോരാടാൻ ആയിരക്കണക്കിന് സൈനികരെ ഉത്തരകൊറിയ അയച്ചതായി യു.എസും ദക്ഷിണ കൊറിയയും വെളിപ്പെടുത്തി ആഴ്ചകൾക്ക് ശേഷമാണ് സമ്മാനം.

ഇതാദ്യമായല്ല റഷ്യ ഉത്തരകൊറിയയിലേക്ക് മൃഗങ്ങളെ അയക്കുന്നത്. ഈ വർഷം ആദ്യം പുടിൻ ഉത്തര കൊറിയൻ നേതാവ് കിം ജോങ് ഉന്നിന് 24 കുതിരകളെ സമ്മാനമായി നൽകിയിരുന്നു. ഉത്തര കൊറിയ നൽകിയ പീരങ്കി ഷെല്ലുകൾക്ക് നന്ദി പറഞ്ഞു​കൊണ്ടായിരു​ന്നു ഇത്. ഇരു രാജ്യങ്ങളും പാശ്ചാത്യ രാജ്യങ്ങളിൽ നിന്നുള്ള ഉപരോധം നേരിടുന്നതിനാൽ പുടിനും കിമ്മും സഖ്യം ശക്തിപ്പെടുത്തിയിരിക്കുകയാണ്.