അഫ്​ഗാനിൽ സൈനിക നീക്കം കടുപ്പിച്ച്​ താലിബാൻ​; കാണ്ഡഹാർ വിമാനത്താവളത്തിൽ റോക്കറ്റാക്രമണം

കാബൂൾ: അമേരിക്കൻ സേന ദൗത്യം നിർത്തി മടങ്ങുന്ന അഫ്​ഗാനിസ്​താനിൽ സൈനിക നീക്കം ശക്​തമാക്കി താലിബാൻ. ഔദ്യോഗിക സർക്കാർ ഭരണം നിലനിൽക്കുന്ന ഹെറാത്ത്​, ലഷ്​കർ ഗഹ്​, കാണ്ഡഹാർ തുടങ്ങിയ നഗരങ്ങളിൽ ഇരുവിഭാഗവും തമ്മിൽ പോരാട്ടം ശക്​തമാണെന്ന്​ റിപ്പോർട്ടുകൾ പറയുന്നു. ഹെറാത്തിൽ താലിബാൻ മുന്നേറ്റം തടയാൻ നൂറുകണക്കിന്​ കമാൻഡോകളെ വിന്യസിച്ചതായി അഫ്​ഗാൻ സർക്കാർ അറിയിച്ചു. ഹെൽമന്ദ​ിലെ ലഷ്​കർ ഗഹിലും കൂടുതൽ സൈനികരെ വൈകാതെ നിയോഗിക്കും. താലിബാൻ കേന്ദ്രങ്ങളിൽ അഫ്​ഗാൻ സർക്കാറിനു പുറമെ യു.എസ്​ ബോംബറുകളും ആ​ക്രമണത്തിൽ പ​ങ്കെടുക്കുന്നുണ്ട്​. കാണ്ഡഹാറിൽ ബോംബാക്രമണങ്ങളിൽ അഞ്ച്​ സിവിലിയന്മാർ ​െകാല്ലപ്പെട്ടതായാണ്​ റിപ്പോർട്ട്​.

കഴിഞ്ഞ മാസം ഗ്രാമമേഖലകളും ഉൾപ്രദേശങ്ങളും വരുതിയിലാക്കുന്നതിന്​ മുൻഗണന നൽകിയ താലിബാൻ പ്രവിശ്യ തലസ്​ഥാനങ്ങൾ സ്വന്തമാക്കാൻ പുതുതായി പോരാട്ടം ആരംഭിച്ചത്​ ഔദ്യോഗിക സർക്കാറിന്​ തലവേദനയാകും. ഇവ നഷ്​ടമായാൽ കാബൂളും വഴിയെ വീഴു​മെന്നതാണ്​ സ്​ഥിതി. പുതിയതായി ആക്രമണം ശക്​തമായ കാണ്ഡഹാറും ലഷ്​കർ ഗഹും പിടിക്കാനായാൽ പരിസരത്തെ അഞ്ച്​ പ്രവിശ്യകൾ കൂടി പിടിയിലൊതുക്കൽ താലിബാന്​ എളുപ്പമാകും. മൂന്ന്​ പ്രധാന പട്ടണങ്ങളിൽ സുരക്ഷാ ഭീഷണി നിലനിൽക്കുന്നതായി അഫ്​ഗാൻ സർക്കാർ സൈനിക വക്​താവ്​ ജനറൽ അജ്മൽ ഉറമർ ഷിൻവാരി അറിയിച്ചു.

അതിനിടെ, കാണ്ഡഹാർ വിമാനത്താവളത്തിൽ റോക്കറ്റ്​ പതിച്ചതോടെ ഇവിടെ തത്​കാലം ആക്രമണം നിർത്തിവെച്ചിട്ടുണ്ട്​. മൂന്ന്​ റോക്കറ്റുകളാണ് രാത്രിയിൽ​ താലിബാൻ ഇവിടെ വർഷിച്ചത്​. ആളപായം റിപ്പോർട്ട്​ ചെയ്​തിട്ടില്ല. വിമാനത്താവളം ഉപയോഗിച്ച്​ തങ്ങളുടെ കേന്ദ്രങ്ങൾക്കു നേരെ ആക്രമണം നടത്തുന്നത്​ കണക്കിലെടുത്താണ്​ റോക്കറ്റാക്രമണമെന്നാണ്​ താലിബാൻ വിശദീകരണം. രണ്ടെണ്ണം റൺവേയിലാണ്​ പതിച്ചത്​. ഇതോടെ വിമാന സർവീസ്​ ഭാഗികമായി മുടങ്ങി.

രാജ്യത്തിന്‍റെ പടിഞ്ഞാറ്​ ഹെറാത്തിൽ താലിബാൻ പിടിമുറുക്കിയതായാണ്​ ഏറ്റവുമൊടുവിലെ റിപ്പോർട്ടുകൾ. കടുത്ത ആക്രമണം തുടരുന്നതിനാൽ ഭീതി പൂണ്ട്​ ജനം വീടുകളിൽ അടച്ചിട്ടുകഴിയുകയാണ്​. ലഷ്​കർ ഗഹും ഏതുസമയവും വീഴാവുന്ന സ്​ഥിതിയിലാണ്​.

നിലവിൽ അഫ്​ഗാൻ മണ്ണിന്‍റെ പാതിയിലേറെയും നിയന്ത്രിക്കുന്നത്​ താലിബാനാണ്​. അവശേഷിച്ച മേഖലകളിൽ പലതും അതിവേഗം അവർക്ക്​ കീഴടങ്ങിയേക്കുമെന്നും സൂചനയുണ്ട്​.