പുതിയ വകഭേദം; മാസ്ക്​ ധാരണം വീണ്ടും നിർബന്ധമാക്കി ഇസ്രായേൽ

പൊതുഇടങ്ങളിൽ മാസ്​ക്​ ധരിക്കണമെന്ന​ നിയമം​ ഇസ്രായേൽ പൂർണ്ണമായും പിൻവലിച്ചത് ദിവസങ്ങൾക്ക്​ മുമ്പായിരുന്നു​. കച്ചവടസ്ഥാപനങ്ങൾ അടക്കം ആളുകൾ തടിച്ചുകൂടുന്ന ഇടങ്ങളിലൊന്നും ജനങ്ങൾക്ക്​ മാസ്​ക്​ ധരിക്കേണ്ടിയിരുന്നില്ല. എന്നാൽ, ഇസ്രായേൽ വീണ്ടും മാസ്കുകൾ നിർബന്ധമാക്കിയിരിക്കുകയാണ്​. കൊറോണ വൈറസി​െൻറ പുതിയ വകഭേദം രാജ്യത്ത് വ്യാപിക്കാൻ തുടങ്ങിയതോടെയാണ് ഇൗ നീക്കം. വെള്ളിയാഴ്ച ഉച്ച മുതൽ രാജ്യത്ത് മാസ്ക് നിർബന്ധമാക്കിയതായി ആരോഗ്യ വകുപ്പ് അറിയിച്ചിട്ടുണ്ട്​.

വാക്സിൻ വിതരണത്തിൽ ലോകത്തിൽ തന്നെ ഏറ്റവും മുൻനിരയിൽ നിൽക്കുന്ന രാജ്യമാണ്​ ഇസ്രായേൽ. പ്രായപൂർത്തിയായവരിൽ 85 ശതമാനം പേർക്കും വാക്സിനേഷൻ ചെയ്​തതോടെയാണ്​ മാസ്ക് നിർബന്ധമാക്കിയ നടപടി അവർ പിൻവലിച്ചത്​. എന്നാൽ കഴിഞ്ഞ കുറച്ച്​ ദിവസങ്ങളായി രാജ്യത്തെ കോവിഡ് കേസുകളുടെ എണ്ണം ക്രമാതീതമായി ഉയരുകയാണ്​. ഇന്നലെ 227 പുതിയ കോവിഡ് കേസുകൾ റിപ്പോർട്ട് ചെയ്തതായി ഇസ്രായേലിലെ കോവിഡ് പ്രതിരോധങ്ങൾക് നേതൃത്വം നൽകുന്ന ഡോ. നാഷ്മാൻ ആഷ് പറഞ്ഞതായി ഇസ്രായേലി മാധ്യമങ്ങൾ റിപ്പോർട്ട് ചെയ്തു.

ഡെൽറ്റ വകഭേദം കുട്ടികളുൾപ്പെടെയുള്ള വാക്സിനെടുക്കാത്തവർക്കിടയിൽ വ്യാപിച്ചതോടെയാണ് അധികൃതർ പുതിയ നിയന്ത്രണം ഏർപ്പെടുത്തിയത്​. വാക്സിനെടുത്തവർക്കിടയിലും പുതിയ വകഭേദം കണ്ടെത്തിയെങ്കിലും അത്ര ഗുരുതരമല്ലെന്നാണ് റിപ്പോർട്ടുകൾ. നേരത്തെ, അടുത്ത മാസം ഒന്നാം തീയതി മുതൽ രാജ്യം വിനോദ സഞ്ചാരത്തിന് തുറന്നു കൊടുക്കാനുള്ള തീരുമാനം ആഗസ്ത്​ ഒന്നിലേക്ക് മാറ്റിയിരുന്നു. ഇതുവരെ ഇസ്രായേലിൽ കോവിഡ് ബാധിച്ച് മരിച്ചത് 6429 പേരാണ്.