കരിങ്കടലിൽ അതിർത്തി ലംഘിച്ച ബ്രിട്ടീഷ്​ യുദ്ധക്കപ്പലിനുനേരെ വെടിയുതിർത്തെന്ന്​ റഷ്യ; നിഷേധിച്ച്​ ബ്രിട്ടൻ

മോസ്കോ: കരിങ്കടലിൽ പ്രാദേശിക അതിർത്തി ലംഘിച്ച ബ്രിട്ടിഷ് യുദ്ധക്കപ്പലിനു നേരെ വെടിയുതിർത്തെന്ന്​ റഷ്യ. മുന്നറിയിപ്പിന്‍റെ ഭാഗമായാണ്​ 'എച്ച്എംഎസ് ഡിഫൻഡർ' എന്നു പേരുള്ള കപ്പലിനു നേരെ നിറയൊഴിച്ചതെന്ന്​ റഷ്യൻ പ്രതിരോധ മന്ത്രാലയം വ്യക്​തമാക്കി. എന്നാൽ, ഈ വാദം റഷ്യൻ​ പ്രതിരോധ മന്ത്രാലയം തള്ളി.

അന്താരാഷ്​ട്ര നിയമങ്ങൾ പാലിച്ചുകൊണ്ട് യുക്രെയിൻ സമുദ്രമേഖലയിലൂടെ കടന്നുപോവുകയായിരുന്നു ബ്രിട്ടീഷ് നാവികസേനയുടെ കപ്പൽ എന്നും നിയമലംഘനം നടന്നിട്ടില്ലെന്നും റഷ്യയുടെ ഭാഗത്ത് നിന്ന് മുന്നറിയിപ്പ് വെടിവെപ്പ് ഉണ്ടായിട്ടില്ലെന്നുമാണ്​ ബ്രിട്ടീഷ് പ്രതിരോധ മന്ത്രാലയത്തിന്‍റെ വിശദീകരണം.

അതേസമയം, 2014ൽ യുക്രെയിനിൽനിന്നു റഷ്യയുടെ ഭാഗമായ ക്രൈമിയയിലെ കേപ് ഫിയോലന്‍റ്​ മുനമ്പിനു സമീപമാണു വെടിവെപ്പ്​ നടന്നതെന്നും റഷ്യ അവകാശപ്പെടുന്നു. 'എച്ച്എംഎസ് ഡിഫൻഡർ' എന്ന കപ്പൽ റഷ്യൻ അതിർത്തി ലംഘിച്ചു. അതിനുനേരെ മുന്നറിയിപ്പിന്‍റെ ഭാഗമായി നിറയൊഴിച്ചു. മുന്നറിയിപ്പിനോട് കപ്പലിൽ ഉള്ളവർ പ്രതികരിച്ചില്ല.'– റഷ്യൻ പ്രതിരോധ മന്ത്രാലയം വ്യക്​തമാക്കി.

കപ്പലിന്‍റെ പാതയിൽ വിമാനത്തിൽനിന്നു നാല് ബോംബുകളിട്ടെന്നും അതിർത്തി പട്രോളിങ് നടത്തുന്ന കപ്പലിൽനിന്നു വെടിയുതിർത്തെന്നുമാണ്​ റഷ്യ പറയുന്നത്​. എസ്.യു 24 -എം വിഭാഗത്തിൽപ്പെട്ട യുദ്ധവിമാനത്തിൽ നിന്നുമാണ്​ നാല് ബോംബുകൾ മുന്നറിയിപ്പിന്‍റെ സൂചനയായി വർഷിച്ചത്​. ഇതിനു പിന്നാലെ കപ്പൽ റഷ്യൻ അതിർത്തി വിട്ടെന്നും റഷ്യ പറയുന്നു. സംഭവത്തിനു ശേഷം റഷ്യൻ പ്രതിരോധ മന്ത്രാലയം ബ്രിട്ടൻ മിലിറ്ററി അറ്റാഷെയെ വിളിച്ചുവരുത്തിയതായും റഷ്യൻ മാധ്യമങ്ങൾ റിപ്പോർട്ട്​ ചെയ്യുന്നു.

'എച്ച്എംഎസ് ഡിഫൻഡർ' യുക്രെയിനിലെ ഒഡേസയിൽ നിന്ന് ജോർജിയയിലേക്കുള്ള യാത്രയിലായിരുന്നെന്നും നിയമലംഘനങ്ങളില്ലാത്തതിനാൽ അതിൽ അസ്വഭാവികതകളില്ലെന്നും ബ്രിട്ടന്‍റെ പ്രതിരോധ സെക്രട്ടറി ബെൻ വാലസ് വ്യക്​തമാക്കി. മെഡിറ്ററേനിയൻ കടലിലെ നാറ്റോ ദൗത്യങ്ങളിൽനിന്നു പിന്മാറി 'എച്ച്എംഎസ് ഡിഫൻഡർ' കരിങ്കടലില്‍ 'സ്വന്തം ദൗത്യം' നടത്തുകയാണെന്നു ബ്രിട്ടീഷ്​ നാവിക സേന ഈമാസമാദ്യം അറിയിച്ചിരുന്നു.