സൂയസിലെ തടസം: ബദൽ പാതയിൽ കപ്പലുകളെ കാത്ത് ​അപകടം പതിയിരിക്കുന്നു

ന്യൂയോർക്ക്​: സൂയസ്​ കനാലിലെ തടസം ആഗോള വ്യവസായരംഗത്ത്​ പുതിയ പ്രതിസന്ധിക്കാണ്​ തുടക്കം കുറിച്ചിരിക്കുന്നത്​. കാറുകളിൽ തുടങ്ങി മൃഗങ്ങൾ വരെ സൂയസിന്‍റെ ഇരു ഭാഗത്തുമായി കാത്തുനിൽക്കുന്ന കപ്പലുകളിലുണ്ട്​. ചരക്കുകളുമായി കപ്പലുകൾക്ക്​ അനന്തമായി കാത്തുനിൽക്കാനാവില്ല. ഇനിയുള്ള വഴി ഗുഡ്​ഹോപ്​ മുനമ്പ്​ ചുറ്റി ആഫ്രിക്ക വഴി പോവുകയെന്നതാണ്​. പക്ഷേ ആ പാതയിൽ കപ്പലുകളെ കാത്ത്​ അപകടം പതിയിരിക്കുന്നുണ്ട്​.

കടൽകൊള്ളക്കാർ താവളമുറപ്പിച്ചിരിക്കുന്ന മേഖലകളിൽ കൂടിയാണ്​ കപ്പലുകൾക്ക്​ പോകേണ്ട ബദൽപാത കടന്നു പോകുന്നത്​​. കഴിഞ്ഞ വർഷവും ഇവിടെ കപ്പലുകൾക്ക്​ നേരെ ആക്രമണമുണ്ടായിരുന്നു. ചുരുക്കത്തിൽ അത്ര എളുപ്പമല്ല മേഖലയിലൂടെയുള്ള കപ്പലുകളുടെ യാത്ര. ബദൽപാതയിലൂടെ യാത്ര ചെയ്യാൻ യു.എസ്​ നാവികസേനയുടെ സഹായം പല കപ്പലുകളും തേടിയെന്ന റിപ്പോർട്ടുകളും പുറത്ത്​ വരുന്നുണ്ട്​.

സഹായം തേടി കപ്പലുകൾ സമീപിച്ച വിവരം യു.എസ്​ നാവികസേനയും സ്ഥിരീകരിച്ചിട്ടുണ്ട്​. എന്നാൽ, ഇക്കാര്യത്തിൽ തീരുമാനമെന്തെന്ന്​ യു.എസ്​ വ്യക്​തമാക്കിയിട്ടില്ല. കപ്പലുകൾക്ക്​ സുരക്ഷയൊരുക്കാൻ യുദ്ധകപ്പൽ വേണമെന്നാണ്​ ഹോ​ങ്കോങ്ങിൽ നിന്നുള്ള കപ്പലുകളുടെ ആവശ്യം. ഒരു ഭാഗത്ത്​ സൂയസ്​ കനാലിലെ അപകടം മറുഭാഗത്ത്​ കടൽകൊള്ളക്കാരുടെ ഭീഷണി. ശരിക്കും ചെകുത്താനും കടലിനും ഇടയിൽ പെട്ട​തുപോലെയാണ്​ കപ്പലുകളുടെ അവസ്ഥ.