റോഹിങ്ക്യൻ ക്യാമ്പിൽ ഉരുൾപൊട്ടലും വെള്ളപ്പൊക്കവും; മൂന്നു കുട്ടികളടക്കം ആറുപേർ മരിച്ചു

ധാക്ക: ബംഗ്ലാദേശിൽ റോഹിങ്ക്യൻ അഭയാർഥികളുടെ ക്യാമ്പിൽ ഉരുൾപൊട്ടൽ, വെള്ളപ്പൊക്ക ദുരന്തത്തിൽ ആറു പേർ മരിച്ചു. മരിച്ചവരിൽ മൂന്നു പേർ കുട്ടികളാണ്​. 5000 പേർ ഭവനരഹിതരായി. നിരവധി വീടുകൾ ഇപ്പോഴും വെള്ളത്തിലാണ്​.

കോക്​സ്​ ബസാർ ജില്ലയിലെ അഭയാർഥി ക്യാമ്പിലാണ്​ ഉരുൾപൊട്ടലു​ം വെള്ളപ്പൊക്കവും നാശം വിതച്ചത്​. ക്യാമ്പിനു തൊട്ടരികെ ഉരുൾപൊട്ടിയാണ്​ കൂരകളിൽ വെള്ളം കയറിയത്​. മുളയും പ്ലാസ്റ്റിക്കും കൊണ്ട്​ കെട്ടിയുണ്ടാക്കിയ വീടുകളാണ്​ ക്യാമ്പിലുള്ളത്​. ഇവ തകർന്നാണ്​ 5000ത്തോളം പേർ ഭവനരഹിതരായതെന്ന്​ ഐക്യരാഷ്​ട്ര സഭയുടെ അഭയാർഥി ഏജൻസി (യു.എൻ.എച്ച്​.സി.ആർ) അറിയിച്ചു.

'zxതാമസിക്കുന്ന കൂര തകർന്നാണ്​ രണ്ടു കുട്ടികൾ മരിച്ചതെന്ന്​ 'സേവ്​ ദ ചിൽഡ്രൻ' വക്​താവ്​ പറഞ്ഞു. 'വെള്ളം ഇരച്ചെത്തിയപ്പോൾ താമസിക്കുന്ന വീടുകളിൽനിന്ന്​ ഒന്നുമെടുക്കാൻ കഴിയാതെ ആളുകൾക്ക്​ ഓടിരക്ഷപ്പെടേണ്ടിവന്നു. ധരിച്ച വസ്​ത്രം മാത്രമേ ഇപ്പോൾ അവർക്കുള്ളൂ. അവർക്കിപ്പോൾ ഭക്ഷണവും വ്​സത്രവുമടക്കം അടിയന്തര സഹായങ്ങൾ ആവശ്യമുണ്ട്​' -റോഹിങ്ക്യ വുമൺ ഡെവലപ്​മെന്‍റ്​ ഫോറം സ്​ഥാപക യാസ്​മിൻ അറ പറഞ്ഞു.

നാശനഷ്​ടം കണക്കാക്കാനും കുടുംബങ്ങളെ പുനരധിവസിപ്പിക്കാനും റോഹിങ്ക്യ വളണ്ടിയർമാർ ഉൾപെടെ അടിയന്തര സംഘങ്ങളുടെ സേവനം തേടിയതായി യു.എൻ.എച്ച്​.സി.ആർ അറിയിച്ചു. കോക്​സ്​ ബസാർ ജില്ലയിലെ കുതുപലോങ്​, നയപാര എന്നിവിടങ്ങളിലെ ക്യാമ്പുകളിലായി ഏഴു ലക്ഷ​ത്തിലധികം റോഹിങ്ക്യൻ വംശജർ താമസിക്കുന്നുണ്ടെന്നാണ്​ കണക്ക്​. ഉരുൾപൊട്ടലിനും വെള്ളപ്പൊക്കത്തിനും ഏറെ സാധ്യതയുള്ള പ്രദേശങ്ങളാണിവിടം. മഴ കനക്കു​േമ്പാൾ ഓരോ വർഷവും ഇവർക്ക്​ മുന്നിയിപ്പുകൾ നൽകുമെങ്കിലും മാറിത്താമസിക്കാൻ മുന്നിൽ മറ്റു വഴികളൊന്നുമില്ലാത്തതിനാൽ ഏതു ദുരന്തങ്ങൾക്കിടയിലും ഇവിടെ തുടരാൻ നിർബന്ധിതരാകുന്നു.

മ്യാന്മറിലെ കലാപകലുഷിതമായ അന്തരീക്ഷത്തിൽ പത്തുലക്ഷത്തോളം റോഹിങ്ക്യൻ മുസ്​ലിംകൾക്കാണ്​ പിറന്ന നാട്ടിൽനിന്ന്​ പ്രാണരക്ഷാർഥം പലായനം ചെയ്യേണ്ടിവന്നത്​. വംശഹത്യയെ തുടർന്ന്​ ബംഗ്ലാദേശിൽ അഭയം തേടിയ ഏഴരലക്ഷത്തോളം പേരിൽ സ്​ത്രീകളും കുട്ടികളുമാണേറെ. ഇവിടെയെത്തിയവരിൽ 40ശതമാനവും 12 വയസ്സിൽ താഴെയുള്ളവരാണെന്നാണ്​ യു.എൻ.എച്ച്​.സി.ആർ കണക്ക്​.

തങ്ങളുടെ സുരക്ഷ ഉറപ്പുവരുത്തുകയും പൗരത്വം നൽകുകയും ചെയ്​താൽ മ്യാന്മറിലേക്ക്​ തിരിച്ചുപോകാമെന്ന നിലപാടിലായിരുന്നു​ റോഹിങ്ക്യകൾ. എന്നാൽ, മ്യാന്മറിൽ പട്ടാള അട്ടിമറി നടന്നതോടെ അതിനുള്ള സാധ്യത ഇപ്പോൾ വിദൂരമാണ്​.