ഇസ്രായേലിന് സ്പെയിനിന്റെ പ്രഹരം: ആയുധക്കരാർ നിർത്തലാക്കി

മാഡ്രിഡ്: ഇസ്രായേലിന് തിരിച്ചടിയായി സ്പാനിഷ് സർക്കാറിന്റെ തീരുമാനം. ഇസ്രായേൽ ആയുധ നിർമാണ കമ്പനിയിൽനിന്ന് ആയുധങ്ങൾ വാങ്ങാനുള്ള സ്പാനിഷ് പൊലീസിന്റെ കരാർ റദ്ദാക്കി. നേരത്തെ ഇസ്രായേലിന് ആയുധങ്ങൾ വിൽക്കുന്നത് സ്​പെയിൻ നിർത്തലാക്കിയിരുന്നു. ഇതിന്റെ തുടർച്ചയായാണ് വാങ്ങലും അവസാനിപ്പിച്ചതെന്ന് ആഭ്യന്തരമ​​ന്ത്രാലയം അറിയിച്ചു.

ആറ് മില്യൺ യൂറോ (ഏകദേശം 6.48 മില്യൺ ഡോളർ) വിലവരുന്ന 15 മില്യൺ 9 എംഎം തിരകൾ വാങ്ങാനുള്ള കരാറാണ് റദ്ദാക്കിയത്. ഇസ്രായേൽ ആയുധ നിർമാണ കമ്പനിയായ ഗാർഡിയൻ ലിമിറ്റഡിൽനിന്നാണ് സ്​പെയിനിലെ ഗാർഡിയ സിവിൽ പൊലീസ് സേന ഇത് വാങ്ങാനിരുന്നത്. 2023 ഒക്ടോബറിൽ ഗസ്സയിൽ കൂട്ടക്കുരുതി തുടങ്ങിയതോടെയാണ് ഇസ്രായേലിന് ആയുധം നൽകേണ്ടതില്ലെന്ന് സ്പെയിൻ തീരുമാനമെടുത്തത്.

“ഗസ്സയിൽ സായുധ സംഘർഷം പൊട്ടിപ്പുറപ്പെട്ട ശേഷം ഇസ്രായേൽ ഭരണകൂടത്തിന് ആയുധങ്ങൾ വിൽക്കില്ലെന്നത് സ്പാനിഷ് സർക്കാറിന്റെ ഉറച്ച തീരുമാനമാണ്. ഈ സാഹചര്യത്തിൽ വെടിമരുന്ന് വിൽക്കലും വാങ്ങലും റദ്ദാക്കാൻ ഭരണപരമായ നടപടിക്രമങ്ങൾ ആഭ്യന്തര മന്ത്രാലയം ആരംഭിച്ചു" -പ്രസ്താവനയിൽ പറഞ്ഞു. ടെൻഡറുകളിൽനിന്ന് ഇസ്രായേലി കമ്പനികളെ ഒഴിവാക്കുമെന്ന് മന്ത്രാലയം അറിയിച്ചു.