ശ്രീലങ്കയിലും ഒമിക്രോൺ; ആഫ്രിക്കയിൽ നിന്നെത്തിയ ഒരാൾക്ക്​ രോഗം

കൊളംബോ: കൊറോണ വൈറസിന്‍റെ പുതിയ വകഭേദമായ ഒമിക്രോൺ ആദ്യമായി സ്​ഥിരീകരിച്ചതായി ​ശ്രീലങ്ക. ശ്രീലങ്കൻ ഹെൽത്ത്​ സർവിസസ്​ ഡെപ്യൂട്ടി ഡയറക്​ടർ ജനറൽ ​ഹേമന്ത ഹെരാത്​ അറിയിച്ചതാണ്​ ഇക്കാര്യം.

ആഫ്രിക്കൻ രാജ്യത്തുനിന്ന്​ നിന്ന്​ എത്തിയയാൾക്കാണ്​ രോഗം. നിലവിൽ കുടുംബാംഗങ്ങൾക്കൊപ്പം നിരീക്ഷണത്തിലാണ്​ അദ്ദേഹം. 'ഇന്ന് നടത്തിയ പരിശോധനയിൽ ഒരാൾക്ക്​ ഒമിക്രാൺ വകഭേദം സ്​ഥിരീകരിച്ചു' -ഹേമന്ത അറിയിച്ചു.

ദക്ഷിണാഫ്രിക്ക, ബോട്​സ്വാന, സിംബാബ്​വെ, നമീബിയ, ലെസോത്തോ, ഇസ്വാറ്റിനി എന്നിവിടങ്ങളിൽനിന്ന്​ മടങ്ങിയെത്തുന്നവർക്ക്​ നവംബർ 28 മുതൽ ശ്രീലങ്ക നിർബന്ധിത ക്വാറൻറീൻ ഏർപ്പെടുത്തിയിരുന്നു.

ശ്രീലങ്കയിൽ ഇതുവരെ 5,65,457 പേർക്കാണ്​ കോവിഡ്​ സ്​ഥിരീകരിച്ചത്​. 14,399 പേർക്ക്​ ജീവൻ നഷ്​ടമാകുകയും ചെയ്​തിരുന്നു. രാജ്യവ്യാപകമായി ഏർപ്പെടുത്തിയ ലോക്​ഡൗൺ ഒക്​ടോബർ ഒന്നിന്​ അവസാനിപ്പിച്ചിരുന്നു.

മറ്റു വകഭേദങ്ങളേക്കാൾ കൂടുതൽ അപകടകാരിയും വ്യാപന ശേഷിയുള്ളതുമാണെന്ന്​ കരുതുന്ന ബി.1.1.529 വകഭേദം ദക്ഷിണാഫ്രിക്കയിൽ നവംബർ 24നാണ്​ ആദ്യമായി സ്​ഥിരീകരിച്ചത്​. ആശങ്കയുയർത്തുന്ന വകഭേദം എന്നതിന്‍റെ പട്ടികയിൽ ഇതിനെ ഉൾപ്പെടുത്തുകയും ചെയ്​തിരുന്നു.

ഇന്ത്യയിൽ ഇതുവരെ നാലുപേർക്കാണ്​ ​ഒമിക്രോൺ വകഭേദം സ്​ഥിരീകരിച്ചത്​. കർണാടക, ഗുജറാത്ത്​, മഹാരാഷ്​ട്ര എന്നീ സംസ്​ഥാനങ്ങളിലാണ്​​ രോഗം റിപ്പോർട്ട്​ ചെയ്​തത്​​.