അഫ്​ഗാനിലെ പാക്​​ കോൺസുലേറ്റിന്​ മുന്നിലെ തിരക്കിൽപ്പെട്ട്​ 11 പേർ മരിച്ചു

കാബൂൾ: രാജ്യം വിടാൻ വിസ ലഭിക്കുന്നതിനായി പാക്​ കോൺസുലേറ്റിന്​ മുന്നിൽ കാത്തുനിന്ന ആളുകൾക്കിടയിലുണ്ടായ തിക്കും തിരക്കിലുംപെട്ട്​ 11 സ്​ത്രീകൾ കൊല്ലപ്പെട്ടു. പാക്​ വിസക്കായി സോക്കർ സ്​റ്റേഡിയത്തിനുള്ളിൽ ആയിരക്കണക്കിനാളുകളാണ്​ തടിച്ചുകൂടിയിരുന്നത്​. തിരക്കിൽ ചവി​ട്ടേറ്റ്​ 13 പേർക്ക്​ പരിക്കേൽക്കുകയും ചെയ്​തു.

മരിച്ചവരിൽ ഭൂരിഭാഗവും അഫ്ഗാനിസ്ഥാനിൽ നിന്നുള്ള പ്രായമായവരാണെന്ന്​ നംഗർഹാർ പ്രവിശ്യ ഗവർണറുടെ വക്താവ്​ അറിയിച്ചു. പരിക്കേറ്റവരിൽ ഭൂരിഭാഗവും സ്​ത്രീകളാണ്​.

കോവിഡ്​ വ്യാപനം മൂലം നംഗർഹാറിലെ പാകിസ്​താൻ കോൺസുലേറ്റ് എട്ട് മാസത്തോളം അടച്ചിരുന്നു. സെപ്​റ്റംബറിൽ തുറന്ന എംബസിയിൻ വൻ തിരക്കാണ്​ അനുഭവപ്പെടുന്നത്​. വലിയ ജനക്കൂട്ടത്തെ പ്രതീക്ഷിച്ച് ഉദ്യോഗസ്ഥർ സ്റ്റേഡിയം ഉപയോഗിക്കാൻ തീരുമാനിക്കുകയും 320 ഉദേയാഗസ്ഥരെ ചുമതലപ്പെടുത്തുകയുമായിരുന്നു.

ഇസ്ലാമാബാദ് സൗഹൃദ വിസ പോളിസി അംഗീകരിച്ചുകൊണ്ട്​ അതിർത്തി തുറന്നതോടെ ഒരാഴ്ചക്കിടെ 19,000 വിസകൾ നൽകിയതായി കാബൂളിലെ പാക്​ എംബസി അറിയിച്ചു.

കഴിഞ്ഞ ദിവസം വടക്കൻ അഫ്ഗാനിസ്​താനിൽ താലിബാൻ തീവ്രവാദികൾ നടത്തിയ ആക്രമണത്തിൽ 34 അഫ്ഗാൻ പൊലീസുകാർ കൊല്ലപ്പെട്ടിരുന്നു. ഫെബ്രുവരിയിൽ അമേരിക്കയുമായി കരാർ ഒപ്പുവെച്ച ശേഷം താലിബാനും അഫ്ഗാൻ സർക്കാരും തമ്മിൽ സമാധാന ചർച്ചകൾ ആരംഭിച്ചതിന് ശേഷമുള്ള ഏറ്റവും ഭീകരമായ ആക്രമണമാണിത്.