അഫ്​ഗാനിലെ രണ്ട്​ പ്രവിശ്യതലസ്​ഥാനങ്ങൾ താലിബാൻ പിടിച്ചെടുത്തു

കാബൂൾ: അഫ്​ഗാനിസ്​താ​നിലെ രണ്ട്​ സുപ്രധാന പ്രവിശ്യ തലസ്​ഥാനങ്ങൾ പിടിച്ചെടുത്ത്​ താലിബാൻ. 24 മണിക്കൂറിനിടെയാണ്​ രണ്ട്​ പ്രവിശ്യ തലസ്​ഥാനങ്ങളും താലിബാൻ വരുതിയിലാക്കിയ

ത്​. തെക്കൻ പ്രവിശ്യയായ നിംറൂസിന്‍റെ തലസ്ഥാനമായ സരഞ്ജ് താലിബാൻ നിയന്ത്രണത്തിലാക്കിയതിനു പിന്നാലെയാണ്​ ​ വടക്കൻ മേഖലയിലെ ജാവ്​സ്​ജാൻ പ്രവിശ്യ തലസ്​ഥാനമായ ഷേബർഖാൻ പിടിച്ചെടുത്തത്​.

മേഖലയിൽ നിന്ന്​ സൈന്യവും ഉന്നത ഉദ്യോഗസ്​ഥരും പിൻവാങ്ങിയതായി ഡെപ്യൂട്ടി ഗവർണർ ഖാദർ മാലിയ സ്​ഥിരീകരിച്ചു. ഇവിടെ ഗവർണറുടെ ഓഫിസും പൊലീസ്​ ഹെഡ്​ക്വാർ​ട്ടേഴ്​സുകളും ജയിലും​ താലിബാൻ കൈയേറി. സരഞ്ജിലെ വിമാനത്താവളവും പ്രധാന സർക്കാർ മന്ദിരങ്ങളും താലിബാന്‍റെ നിയന്ത്രണത്തിലാണ്​​.

2020 ഫെബ്രുവരിയിൽ യു.എസ്​-നാറ്റോ സേന പിൻമാറ്റത്തെ കുറിച്ച്​ ധാരണയിലെത്തിയ ശേഷം ​താലിബാൻ നടത്തുന്ന ആദ്യ നിർണായക മുന്നേറ്റമാണിത്. ഇതിനു മുമ്പ്​ 2016ൽ കുന്ദൂസായിരുന്നു താലിബാൻ നിയന്ത്രണത്തിലാക്കിയത്​.

ഇറാൻ അതിർത്തിയിലെ വ്യാപാര കേന്ദ്രമായ സരഞ്ജ് മേഖലയിലെ തന്ത്രപ്രധാന പ്രദേശമാണ്. സരഞ്ജ് തുടക്കം മാത്രമാണെന്നും മറ്റു പ്രവിശ്യകൾ വീഴുന്നത് ഉടൻ കാണാമെന്നും താലിബാൻ വക്താവ് പ്രതികരിച്ചതായി വാർത്ത ഏജൻസി റോയിട്ടേഴ്സ് റിപ്പോർട്ട് ചെയ്തു. സരഞ്​ജിലെ ജയിലുകളിൽനിന്ന്​ വെള്ളിയാഴ്​ച തടവുകാരെ മോചിപ്പിച്ചതായി ​താലിബാൻ വക്താവ്​ ഖ്വാരി യൂസുഫ്​ അഹ്​മദി അറിയിച്ചിരുന്നു.

ഹെൽമന്ദ്​ പ്രവിശ്യയിലെ ലഷ്​കർഗാഹ്​ നഗരം താലിബാൻ നിയന്ത്രണത്തിലാക്കിയതായും റിപ്പോർട്ടുകളുണ്ട്​. 6,30,000 ആളുകളാണ്​ സരഞ്​ജിൽ താമസിക്കുന്നത്​. ഇവിടെ നിന്ന്​ കൂട്ടപ്പലായനവും നടക്കുന്നുണ്ട്​. അഫ്​ഗാനിലെ വലിയ നദികളിലൊന്നായ ഹെൽമന്ദ്​ കടന്നുപോകുന്നത്​ സരഞ്​ജിൽകൂടിയാണ്​. യു.എസ്​ സേന പിന്മാറ്റം പ്രഖ്യാപിച്ചതോടെ അടുത്തിടെ അഫ്​ഗാനിൽ ആക്രമണം രൂക്ഷമാക്കിയ താലിബാൻ നിരവധി ജില്ലകൾ പിടിച്ചെടുത്തിരുന്നു. ഹെറാത്​, കാന്തഹാർ ഉൾപ്പെടെയുള്ളവ നിയന്ത്രണത്തിലാക്കാൻ പോരാട്ടം ശക്​തമാണ്​.