വനിത പ്രതിഷേധകർക്കു നേരെ വെടിയുതിർത്ത്​ താലിബാൻ; ബാനറുകൾ കീറിക്കളഞ്ഞു

കാബൂൾ: കിഴക്കൻ കാബൂളിൽ ഹൈസ്​കൂളിന്​ പുറത്ത്​ പെൺകുട്ടികൾക്ക്​ സ്​കൂളിലേക്ക്​ മടങ്ങാനുള്ള അവകാശത്തിനായി സമരം നടത്തിയ സ്​ത്രീകൾക്കെതിരെ വെടിയുതിർത്ത്​ താലിബാൻ. ആറുപേരാണ്​ പ്രതിഷേധത്തിൽ പ​ങ്കെടുത്തത്​.

ഞങ്ങളുടെ പേന തകർക്കരുത്​, പുസ്​തകം കത്തിക്കരുത്​, സ്​കൂൾ അടയ്​ക്കരുത്​-എന്നെഴുതിയ ബാനറുമായാണ്​ സ്​ത്രീകൾ പ്രതിഷേധിച്ചത്​. ബാനറുകൾ താലിബാൻ കീറിക്കളഞ്ഞു.

പ്രതിഷേധക്കാരെ ബലം പ്രയോഗിച്ച്​ നീക്കാൻ ശ്രമിക്കുകയുമായിരുന്നു. തുടർന്നാണ്​ വെടിയുതിർത്തത്​. ​സ്​ത്രീകൾക്ക്​ പ്രതിഷേധം നടത്താമെന്നും എന്നാൽ അനുമതി വാങ്ങണമെന്നാണ്​ താലിബാ​െൻറ ഉത്തരവ്​.

താലിബാ​നെതിരെ ഖത്തർ

പെൺകുട്ടികളുടെ വിദ്യാഭ്യാസത്തോടുള്ള താലിബാ​െൻറ സമീപനം നിരാശ​ാജനകമെന്ന്​ ഖത്തർ വിദേശകാര്യമന്ത്രി ​ശൈഖ്​ മുഹമ്മദ്​ ബിൻ അബ്​ദുർറഹ്​മാൻ ആൽഥാനി. അഫ്​ഗാനിൽ ഇപ്പോൾ നടക്കുന്ന സംഭവങ്ങൾ ദൗർഭാഗ്യകരമാണ്​. താലിബാൻ പിന്നോട്ടാണ്​ രാജ്യത്തെ കൊണ്ടുപോകുന്നതെന്നും അദ്ദേഹം പറഞ്ഞു.

'ദോഹ കരാർ അഫ്​ഗാ​െൻറ പതനത്തിന്​ കാരണമായി'

ദോഹയിൽ താലിബാനും യു.എസും ഒപ്പുവെച്ച കരാറാണ്​ അഫ്​ഗാനിസ്​താ​െൻറ പതനത്തിനു​ വഴിയൊരുക്കിയതെന്ന്​ യു.എസ്​ സെൻട്രൽ കമാൻഡന്‍റ്​​ മേധാവി ജനറൽ ഫ്രാങ്ക്​ മക്കെൻസി. 2020 ഫെബ്രുവരിയിൽ ദോഹയിൽ വെച്ചാണ്​ ട്രംപ്​ ഭരണകൂടവും താലിബാനും തമ്മിൽ കരാറുണ്ടാക്കിയത്​.

2021 മേയ്​ അവസാനത്തോടെ യു.എസ്​ സൈന്യത്തെ അഫ്​ഗാനിൽ നിന്ന്​ പൂർണമായി പിൻവലിക്കുമെന്നാണ്​ കരാറിലെ വാഗ്​ദാനം. പകരമായി യു.എസ്​-സഖ്യസേനക്കു നേരെയുള്ള ആക്രമണം താലിബാൻ അവസാനിപ്പിക്കണമെന്നും ഉപാധിവെച്ചു.

നിശ്ചയിച്ച തീയതിക്കുള്ളിൽ തന്നെ സൈന്യത്തെ പിൻവലിക്കാനായിരുന്നു ഡോണൾഡ്​ ട്രംപി​െൻറ പിൻഗാമിയായെത്തിയ ജോ ബൈഡ​െൻറ തീരുമാനം. പിന്നീടത്​ ആഗസ്​റ്റ്​ 31ലേക്ക്​ നീട്ടി.

അതേസമയം, 2500 സൈനികരെ അഫ്​ഗാനിൽ നിലനിർത്തിയിരുന്നെങ്കിൽ അഫ്​ഗാ​ന്​ പിടിച്ചുനിൽക്കാൻ കഴിയുമായിരുന്നെന്ന്​ യു.എസ്​ സെനറ്റിൽ മക്കെൻസി വ്യക്തമാക്കി. മക്കെൻസിയുടെ അഭിപ്രായങ്ങൾ പ്രതിരോധ സെക്രട്ടറി ലോയ്​ഡ്​ ഓസ്​റ്റിനും ശരിവെച്ചു.