പെൻഷനുണ്ടെന്നറിഞ്ഞത്​​​ 20 വർഷം കഴിഞ്ഞ്​, 100 വയസ്സുകാരിക്ക്​​ നഷ്​ടമായത്​ 77 ലക്ഷം

ലണ്ടൻ: പെൻഷന്​ അർഹതയുണ്ടെന്ന്​ അറിയാൻ വൈകിയത്​ വയോധികക്ക്​ നഷ്​​ടപ്പെടുത്തിയത്​ അനേകലക്ഷങ്ങൾ. യു.കെയിലെ ക്രോയ്ഡൺ സ്വദേശിനിയായ 100 വയസ്സുകാരിയാണ്​ നീണ്ട രണ്ട്​ പതിറ്റാണ്ട്​ തെറ്റിദ്ധാരണയുടെ പേരിൽ എല്ലാം നഷ്​ടപ്പെടുത്തിയത്​. ക്രോയ്​ഡണിൽ 1921ൽ ജനിച്ച്​ കാനഡയിലേക്ക്​ കുടിയേറിയ മാർഗരറ്റ്​ ബ്രാഡ്​ഷാ 30 വർഷത്തോളം അവിടെയാണ്​ തൊഴിലെടുത്തത്​. അതുകഴിഞ്ഞ്​ തിരിച്ചെത്തി ബ്രിട്ടനിൽ തന്നെ താമസിച്ചുവരികയാ​യിരുന്നുവെങ്കിലും കാനഡയിൽ താമസിച്ചതിനാൽ 80 വയസ്സ്​ പൂർത്തിയാകുന്നതോടെ ലഭിക്കുന്ന പെൻഷൻ അർഹതയില്ലെന്നാണ്​ കരുതിയത്​. അത്രയും കാലം പെൻഷൻ വാങ്ങിയിരുന്നുവെങ്കിൽ അത്​ 75,000 ​പൗണ്ട്​ (77 ലക്ഷം രൂപ) ഉണ്ടാകുമായിരുന്നു.

എന്നാൽ, അടുത്തിടെയാണ്​ 78കാരിയായ മകൾ ഹെലൻ കണ്ണിങ്​ഹാം ആ ഞെട്ടിക്കുന്ന വിവരം മാതാവിനെ അറിയിച്ചത്​. ഒരു പത്രവാർത്തയാണ്​ തുണയായത്​. പ്രായം 80 തികഞ്ഞ അന്നുമുതൽ ഓരോ ആഴ്ചയും 82.45 പൗണ്ട്​ (8,461 രൂപ) സർക്കാർ പെൻഷനായി അനുവദിക്കും. ഇൻഷുറൻസ്​ തുക അടച്ചാലും ഇല്ലെങ്കിലും തുക ലഭിക്കും. കാനഡയിൽ ജോ​ലിയെടുത്ത കാലത്ത്​ അടക്കാത്തത്​ വില്ലനാകില്ലെന്നർഥം.

ഒമ്പത്​ ചെറുമക്കളുടെ മുത്തശ്ശിയായ മാർഗരറ്റ്​ അപേക്ഷ നൽകിയതോടെ ഇപ്പോൾ പെൻഷൻ ലഭിച്ചുതുടങ്ങിയിട്ടുണ്ട്​. മറവിരോഗം അലട്ടുന്ന അവർ കാനഡയിലെ ജോലിയുടെ തുടർച്ചയായി ലഭിക്കുന്ന ചെറിയ പെൻഷൻ തുകയിലാണ്​ ജീവിക്കുന്നത്​.

കുടിശ്ശികയിനത്തിൽ 4,000 പൗണ്ട്​ സർക്കാർ അനുവദിച്ചിരുന്നു. അവശേഷിച്ച തുക എ​​െന്നന്നേക്കുമായി നഷ്​ടമാകും.