അഫ്ഗാൻ മുൻ സർക്കാറിലെ നൂറിലേറെ പേരെ താലിബാൻ വധിച്ചതായി യു.എൻ

കാബൂൾ: സുരക്ഷ സേനാംഗങ്ങളുൾപ്പെടെ അഫ്ഗാൻ മുൻ സർക്കാറിലെ നൂറിലേറെ അംഗങ്ങളെ താലിബാൻ വധിച്ചതായി യു.എൻ റിപ്പോർട്ട്. യു.എസ്-നാറ്റോ സേനാംഗങ്ങൾക്കായി സേവനം ചെയ്തവരും കൊല്ലപ്പെട്ടവരിൽ ഉൾപ്പെടും. ആഗസ്റ്റിൽ താലിബാൻ അധികാരം പിടിച്ചെടുത്തതിനു ശേഷമാണ് അറുകൊലകൾ നടന്നതെന്നും യു.എൻ സെക്രട്ടറി ജനറൽ അന്‍റോണിയോ ഗു​ട്ടെറസ് പറഞ്ഞു.

വിദേശ സൈനികരുമായി സഹകരിച്ചവർക്കും മുൻ സർക്കാറിലെ അംഗങ്ങൾക്കും മാപ്പുനൽകുമെന്നുമായിരുന്നു അധികാരമേറ്റയുടൻ താലിബാ​ന്‍റെ പ്രഖ്യാപനം. ഐ.എസ് ഭീകരസംഘടനയുമായി ബന്ധമുള്ള 50ഓളം ആളുകളെ താലിബാൻ വധിച്ചതിന് തെളിവുലഭിച്ചതായും യു.എൻ വ്യക്തമാക്കി.

അതിനിടെ, അടച്ചുപൂട്ടിയ യൂനിവേഴ്സിറ്റികൾ ഈമാസത്തോടെ തുറന്നു പ്രവർത്തിപ്പിക്കാനൊരുങ്ങുകയാണ് താലിബാൻ എന്നാണ് റിപ്പോർട്ട്. പെൺകുട്ടികൾക്ക് വിദ്യാഭ്യാസ സ്ഥാപനങ്ങളിലേക്ക് പ്രവേശനമുണ്ടാകു​മോ എന്നതിൽ വ്യക്തതയില്ല.