യു.എസ് ആക്ടിവിസ്റ്റും എഴുത്തുകാരനുമായ ഷോൺ കിങ്ങും ഭാര്യയും ഇസ്‍ലാം സ്വീകരിച്ചു

വാഷിങ്ടൺ: യു.എസ്.എയിലെ പ്രമുഖ ആക്ടിവിസ്റ്റും എഴുത്തുകാരനുമായ ഷോൺ കിങ്ങും ഭാര്യ ഡോ. റായ് കിങ്ങും ഇസ്‍ലാം മതം സ്വീകരിച്ചു. മുസ്‍ലിം പണ്ഡിതനും ആക്ടിവിസ്റ്റുമായ ഡോ. ഒമർ സുലൈമാന്റെ സാന്നിധ്യത്തിലായിരുന്നു ഇസ്‍ലാം ആശ്ലേഷം. ​സമൂഹ മാധ്യമത്തിലൂടെ പുറത്തുവന്ന വിഡിയോയിൽ ഫലസ്തീൻ പോരാട്ടത്തിന്റെ പ്രതീകമായ കഫിയ്യ ധരിച്ചാണ് 44കാരനായ ഷോൺ കിങ് പ്രത്യക്ഷപ്പെടുന്നത്.

അമേരിക്കയിൽ ബ്ലാക്ക് ലൈവ്സ് മാറ്റർ പ്രസ്ഥാനത്തിന്റെ മുന്നണിപ്പോരാളികളിൽ ഒരാളാണ് ഷോൺ കിങ്. ഇൻസ്​റ്റഗ്രാമിൽ 60 ലക്ഷത്തിലേറെ ഫോളോവർമാർ ഉള്ള ഷോൺ അധിനിവേശ വിരുദ്ധ പോരാട്ടങ്ങളിലും സജീവ സാന്നിധ്യമാണ്.

ഗസ്സയിൽ ഇസ്രായേൽ നടത്തുന്ന വംശഹത്യക്കെതിരെ പ്രതികരിച്ചതിന് കഴിഞ്ഞ ഡിസംബർ 25ന് ‘മെറ്റ’ അദ്ദേഹത്തിന്റെ അക്കൗണ്ട് പൂട്ടിയിരുന്നു.