സമാധാനപരമായ ​​പ്രതിഷേധം ജനാധിപത്യത്തിന്‍റെ മുഖമുദ്ര, കർഷകരുടെ പ്രതിഷേധം പരിഹരിക്കണം -അമേരിക്ക

വാഷിങ്​ടൺ: സമാധാനപരമായ പ്രതിഷേധങ്ങൾ ജനാധിപത്യത്തിന്‍റെ മുഖമുദ്രയാണെന്ന്​ ഇന്ത്യയിലെ കർഷക ​പ്രതിഷേധത്തിന്‍റ പശ്ചാത്തലത്തിൽ അമേരിക്ക വ്യക്തമാക്കി. അതേസമയം കാർഷിക പരിഷ്​കാരങ്ങൾ ഇന്ത്യൻ വിപണിയെ കാര്യക്ഷമമാക്കുമെന്നും സ്വകാര്യ നിക്ഷേപകരെ ആകർഷിക്കുമെന്നും അമേരിക്ക കൂട്ടിച്ചേർത്തു.

''സമാധാനപരമായ പ്രതിഷേധം അഭിവൃദ്ധിയുള്ള ജനാധിപത്യത്തിന്‍റെ മുഖമുദ്രയാണ്​. ഇന്ത്യൻ സുപ്രീംകോടതി തന്നെ ഇത്​ വ്യക്തമാക്കിയതാണ്​''-അമേരിക്കയിലെ സ്​റ്റേറ്റ്​ ഡിപ്പാർട്​മെന്‍റ്​ വക്താവ്​ പറഞ്ഞു.

കാർഷിക പ്രക്ഷോഭത്തിന്​ പിന്തുണയുമായി അമേരിക്കയിലെ നിരവധി പ്രമുഖർ രംഗത്തെത്തി. ഇന്ത്യയിലെ കർഷകർക്കെതിരെ നടപടികളിൽ അമേരിക്കൻ കോൺഗ്രസ്​ അംഗം ഹാലി സ്റ്റീവൻസ്​ പ്രതിഷേധം രേഖപ്പെടുത്തി. ഇന്ത്യയിലുടനീളമുള്ള കർഷകരുടെ ജനാധിപത്യപരമായ അവകാശങ്ങൾ സംരക്ഷിക്കണമെന്നും ഇന്‍റർനെറ്റ്​ ലഭ്യത ഉറപ്പാക്കണമെന്നും തടവിലാക്കിയ മാധ്യമ പ്രവർത്തകരെ വിട്ടയക്കണമെന്നും യു.എസ് കോണ്‍ഗ്രസ് അംഗം ഇൽഹാൻ ഉമർ ട്വീറ്റ്​ ചെയ്​തു.