അഫ്​ഗാനു പിറകെ ഇറാഖിൽനിന്നും യു.എസ്​ സൈന്യം മടങ്ങുന്നു

ബഗ്​ദാദ്​: അടുത്ത മാസാവ​സാ​നത്തോടെ അഫ്​ഗാനിലെ സൈനിക ദൗത്യം അവസാനിപ്പിക്കുന്ന യു.എസ്​ ഇറാഖിൽനിന്നും സമ്പൂർണമായി പിൻമാറുന്നു. വർഷാവസാനത്തോടെ പിന്മാറ്റം പൂർത്തിയാക്കുമെന്നും ഇറാഖി സേനക്ക്​ പരിശീലനവും ഉപദേശവും തുടർന്നും നൽകുമെന്നും അമേരിക്കൻ പ്രസിഡന്‍റ്​ ജോ ബൈഡൻ പറഞ്ഞു. ഇറാഖ്​ പ്രധാനമന്ത്രി മുസ്​തഫ അൽഖാദിമിയു​മായി നടത്തിയ ചർച്ചകൾക്കു ശേഷമാണ്​ പ്രഖ്യാപനം.

നിലവിൽ 2,500 യു.എസ്​ സൈനികരാണ്​ ഇറാഖിലുള്ളത്​. ഇവരിലേറെ പേരും മടങ്ങുമെങ്കിലും കുറഞ്ഞ സൈനിക സാന്നിധ്യം തുടർന്നുമുണ്ടാകും. രാജ്യത്ത്​ യു.എസ്​ സൈന്യം തുടരുന്നതിനെതിരെ പ്രതിഷേധം ശക്​തമാണ്​. ഇറാൻ സൈനിക കമാൻഡർ ഖാസിം സുലൈമാനി ബഗ്​ദാദിൽ ബോംബാക്രമണത്തിൽ കൊല്ലപ്പെട്ടതിനു പിന്നാലെ കടുത്ത പ്രതിഷേധവുമായി ഇറാഖ്​ സർക്കാർ രംഗത്തെത്തിയിരുന്നു. ഇറാനോട് അനുഭാവമുള്ള കക്ഷികളും ഇതേ ആവശ്യമുയർത്തി. ശിയാ മിലീഷ്യകൾ യു.എസ്​ സേനക്കെതിരെ റോക്കറ്റാക്രമണം തുടരുന്നതും വെല്ലുവിളിയായി​. സമ്മർദം ശക്​തമായതോടെതാണ്​ യു.എസ്​ വഴങ്ങിയത്​.

പിന്മാറ്റത്തോടെ, മുൻ പ്രസിഡന്‍റ്​ ജോർജ്​ ഡബ്ല്യു ബുഷ്​ തുടങ്ങിവെച്ച മറ്റൊരു യുദ്ധത്തിന്​ കൂടിയാണ്​ ബൈഡൻ തിരശ്ശീലയിടുന്നത്​. 2003ൽ പ്രസിഡന്‍റ്​ സദ്ദാം ഹുസൈനെ മറിച്ചിടുകയെന്ന ലക്ഷ്യത്തോടെയാണ്​ യു.എസ്​ നേതൃത്വം നൽകിയ സഖ്യ സേന ഇറാഖിലെത്തിയത്​. കൂട്ടനശീകരണ ശേഷിയുള്ള ആയുധങ്ങൾ കൈവശം​ വെച്ചുവെന്ന്​ ആരോപിച്ചായിരുന്നു നീക്കം. എന്നാൽ, അത്​ വ്യാജ പ്രചാരണമായിരുന്നുവെന്ന്​ സദ്ദാം ഹുസൈനെ കൊലപ്പെടുത്തിയ ശേഷം അമേരിക്ക കുറ്റ സമ്മതം നടത്തി. 2011ൽ ആദ്യം സൈനിക പിന്മാറ്റം നടത്തിയെങ്കിലും വീണ്ടും തിരിച്ചെത്തി.​ ഐ.എസിനെതിരായ നീക്കത്തിനെന്ന പേരിലായിരുന്നു മടങ്ങിവരവ്​. 2017ഓടെ ഐ.എസ്​ രാജ്യത്ത്​ നിഷ്​കാസിതമായിരുന്നു.

പിന്മാറ്റം ശരിക്കും ഗുണകരമാകുക ഇറാനാണ്​. അയൽ രാജ്യങ്ങളിൽ സൈന്യത്തെ വിന്യസിച്ച്​ തങ്ങളെ നിരീക്ഷണത്തിൽ നിർത്തുകയും സമ്മർദം ശക്​തമാക്കുകയും ചെയ്യുന്നത്​ തടയാൻ ഇറാൻ ഏറെയായി ശ്രമങ്ങൾ തുടരുകയായിരുന്നു. അതാണ്​ വിജയം കാണുന്നത്​. നിലവിൽ, സിറിയ, ഇറാഖ്​ രാജ്യങ്ങളിൽ ഇറാൻ ശക്​തമായ ഇടപെടൽ തുടരുന്നുണ്ട്​. പിന്മാറ്റത്തോടെ അത്​ കൂടുതൽ ശക്​തമാകും.