'ഈ പരാജയം എല്ലാ അധിനിവേശക്കാർക്കുമുള്ള പാഠം' ; അഫ്​ഗാനിൽ നിന്നുള്ള അമേരിക്കൻ പിന്മാറ്റം ആഘോഷിച്ച്​ താലിബാൻ

കാബൂൾ: തിങ്കളാഴ്ച യു.എസ്​ വ്യോമസേനയുടെ സി-17 വിമാനം അവസാന സൈനികനെയും വഹിച്ച്​ മടങ്ങിയെന്ന യു.എസ്​ സെൻട്രൽ കമാൻഡ്​ മേധാവി ജനറൽ ഫ്രാങ്ക്​ മക്കിൻസിന്‍റെ പ്രഖ്യാപനം ആഘോഷിച്ച്​ താലിബാൻ. നഗരത്തിൽ വെടിപൊട്ടിച്ചായിരുന്നു അർധരാത്രിക്കു ശേഷം പുലർച്ചെ വരെ നീണ്ട ആഘോഷം. ആഗസ്റ്റ്​ 31നകം എല്ലാ സൈനികരെയും പിൻവലിക്കുമെന്ന്​ പ്രസിഡന്‍റ്​ ​ജോ ബൈഡൻ നടത്തിയ പ്രഖ്യാപനമാണ്​ ഇതോടെ പൂർത്തീകരിച്ചത്​.

''അഫ്​ഗാനിസ്ഥാന്​ അഭിനന്ദനങ്ങൾ. ഈ വിജയം എല്ലാവർക്കുമുള്ളതാണ്​. ഇത്​ അധിനിവേശം നടത്തുന്ന എല്ലാവർക്കുമുള്ള പാഠമാണ്​. സ്വതന്ത്രവും പരമാധികാരമുള്ളതുമായ ഒരു ഇസ്​ലാമിക്​ എമിറേറ്റ്​ ഓഫ്​ അഫ്​ഗാനിസ്ഥാൻ നിലവിൽ വന്നിരിക്കുന്നു. അമേരിക്ക പരാജയപ്പെട്ടിരിക്കുന്നു. മിലിട്ടറി ഓപ്പറേഷനിലൂടെ താൽപര്യങ്ങൾ നേടിയെടുക്കാൻ അവർക്കായിട്ടില്ല. ഞങ്ങൾക്ക്​ ലോകരാജ്യങ്ങളുമായി മികച്ച ബന്ധം ആവശ്യമുണ്ട്. ഞങ്ങൾ ഈ സ്വാതന്ത്ര്യവും ഇസ്​ലാമിക മൂല്യങ്ങളും സംരക്ഷിക്കും​'' -താലിബാൻ വക്താവ്​ സബീനുല്ലാഹ്​ മുജാഹിദ്​ പ്രതികരിച്ചു.

കടുത്ത സുരക്ഷാ ഭീഷണിക്കിടെ അതിവേഗത്തിലായിരുന്നു യു.എസ്​ സൈന്യത്തിന്‍റെ ഒഴുപ്പിക്കൽ. കാബൂൾ വിമാനത്താവളത്തിലും പരിസരങ്ങളിലും രണ്ടു തവണ ആക്രമണം നടന്നു. നിരവധി പേർക്ക്​ ജീവൻ നഷ്​ടമായി. എന്നിട്ടും പിന്മാറ്റം പൂർത്തിയാക്കാനായത്​ സന്തോഷകരമാണെന്ന്​ യു.എസ്​ പറയുന്നു.

അമേരിക്ക കാബൂൾ വിട്ടുമടങ്ങിയതോടെ കാബൂൾ വിമാനത്താവളത്തിന്‍റെ നിയന്ത്രണം ഏറ്റെടുക്കാൻ താലിബാൻ ശ്രമം ആരംഭിച്ചിട്ടുണ്ട്​. താലിബാൻ സർക്കാർ വക്​താവ്​ സബീഹുല്ല മുജാഹിദും പട്ടാളവും വിമാനത്താവളത്തിൽ പ്രവേശിക്കുന്ന ചിത്രങ്ങൾ സമൂഹ മാധ്യമങ്ങൾ വഴി പുറത്തുവന്നിട്ടുണ്ട്​. ഇവിടെ വെച്ച്​ കൂടുതൽ പ്രഖ്യാപനങ്ങൾ താലിബാൻ നടത്തുമെന്ന സൂചനയുമുണ്ട്​. എല്ലാ വിഭാഗങ്ങൾക്കും പ്രാതിനിധ്യമുള്ള ഇടക്കാല സർക്കാർ രൂപവത്​കരിക്കുമെന്നാണ്​ താലിബാൻ പ്രഖ്യാപനം.