ഇറാ​ന്‍റെ എണ്ണ കേന്ദ്രങ്ങളിൽ ഇസ്രായേൽ ആക്രമണം നടത്തിയാൽ പിന്തുണക്കണമോ എന്നത് ചർച്ച ചെയ്യുന്നതായി ബൈഡൻ

വാഷിംങ്ടൺ: ഇറാ​​ന്‍റെ എണ്ണ കേന്ദ്രങ്ങളിൽ ഇസ്രായേൽ ആക്രമണം നടത്തുന്നപക്ഷം അതിനെ പിന്തുണക്കണമോ വേണ്ടയോ എന്ന കാര്യം തങ്ങൾ ചർച്ച ചെയ്യുകയാണെന്ന് യു.എസ് പ്രസിഡന്‍റ് ജോ ബൈഡൻ. ചൊവ്വാഴ്ച ഇറാൻ നടത്തിയ ഏറ്റവും വലിയ ആക്രമണത്തിന് പ്രതികാരമായി ഇറാ​ന്‍റെ എണ്ണ കേന്ദ്രങ്ങൾ ഇസ്രായേൽ ആക്രമിക്കുകയാണെങ്കിൽ അതിനെ പിന്തുണക്കുമോ എന്ന മാധ്യമപ്രവർത്തകരുടെ ചോദ്യത്തിന് ‘ഞങ്ങൾ അക്കാര്യം ചർച്ച ചെയ്യുകയാണെ’ന്നായിരുന്ന ബൈഡ​ന്‍റെ മറുപടി. എന്നാൽ, ‘ഇപ്പോൾ ഒന്നും സംഭവിക്കാൻ പോകുന്നില്ലെന്നും ഇറാ​ന്‍റെ ആണവ കേന്ദ്രങ്ങളിൽ ഇസ്രായേൽ നടത്തുന്ന ഒരു ആക്രമണത്തെയും പിന്തുണക്കില്ലെന്നും’ യു.എസ് പ്രസിഡന്‍റ് പറഞ്ഞു.

ബൈഡ​ന്‍റെ അഭിപ്രായം ആഗോള എണ്ണവിലയിലെ കുതിച്ചുചാട്ടത്തിന് കാരണമായി. പശ്ചിമേഷ്യയിൽ വർധിച്ചുവരുന്ന പിരിമുറുക്കം എണ്ണവിതരണ ശൃംഖലയിൽ ഉണ്ടാക്കാവുന്ന തടസ്സങ്ങളെക്കുറിച്ച് വ്യാപാരികളെ ആശങ്കയിലാഴ്ത്തി.

തിരിച്ചടിക്കാൻ ത​ന്‍റെ രാജ്യത്തിന് ‘ധാരാളം ഓപ്ഷനുകൾ’ ഉണ്ടെന്നും തങ്ങളുടെ ശക്തി ഇറാനെ ‘ഉടൻ’ കാണിക്കുമെന്നും ഇസ്രായേലി​ന്‍റെ യു.എൻ അംബാസഡർ ഡാനി ഡാനൻ കഴിഞ്ഞ ദിവസം പറഞ്ഞിരുന്നു. ഇറാനോട് എങ്ങനെ പ്രതികരിക്കണമെന്ന് ഇസ്രായേൽ ഇതുവരെ തീരുമാനിച്ചിട്ടില്ലെന്ന് കരുതുന്നതായി ഒരു യു.എസ് ഉദ്യോഗസ്ഥൻ പ്രതികരിച്ചു.

ഇറാൻ പിന്തുണയുള്ള സായുധ ഗ്രൂപ്പായ ഹിസ്ബുല്ലയുടെ ശക്തികേന്ദ്രമായ ബെയ്‌റൂത്തി​ന്‍റെ തെക്കൻ പ്രാന്തപ്രദേശമായ ദഹിയ വ്യാഴാഴ്ച അർധരാത്രിയോടെ വീണ്ടും ഇസ്രായേൽ ആക്രമണത്തിന് വിധേയമാക്കി. ഈ ഭാഗങ്ങളിലെ ആളുകളോട് വീടുവിട്ടിറങ്ങാൻ ഇസ്രായേൽ ഉത്തരവിട്ടതായി താമസക്കാരും സുരക്ഷാ വൃത്തങ്ങളും അറിയിച്ചു. കൊല്ലപ്പെട്ട ഹിസ്ബുല്ല നേതാവ് ഹസൻ നസ്‌റുല്ലയുടെ പിൻഗാമിയായ ഹാഷിം സൈഫിദ്ദീനെ ലക്ഷ്യമിട്ടായിരുന്നു വ്യോമാക്രമണമെന്നും റിപ്പോർട്ടുകൾ പറയുന്നു.