2000ത്തിനു ശേഷം ​അമേരിക്കൻ ജനത ഫലത്തിനായി കാത്തിരുന്ന നീണ്ട തെരഞ്ഞെടുപ്പ്​

ന്യൂയോർക്ക്​: അമേരിക്കൻ ജനത തങ്ങളുടെ പ്രസിഡൻറ്​ ആരാണെന്നറിയാൻ​ കാത്തിരിക്കാൻ തുടങ്ങിയിട്ട്​ നാലു ദിവസമായി. ഏറെക്കുടെ ബൈഡൻ അധികാരത്തിലേറുമെന്ന്​ ഉറപ്പായെങ്കിലും അന്തിമ ഫലം ഇനിയും വന്നിട്ടില്ല. ചിലപ്പോൾ അമേരിക്കയിൽ ഫലം അറിയാൻ ഇങ്ങനെയാണ്​. ദിവസങ്ങൾ കാത്തിരുന്നാൽ മാത്രമേ ഫലംഅറിയൂ.

2000ത്തിനു ശേഷം, ഫലം അറിയാൻ ഏറ്റവും കൂടതൽ ദിവസം ആവശ്യമായി വന്ന തെരഞ്ഞെടുപ്പ്​ കൂടിയാണിത്​.

21ാം നൂറ്റാണ്ടിൽ ഏറ്റവും കൂടുതൽ സമയം വോട്ട്​ എണ്ണാൻ വേണ്ടി വന്ന തെരഞ്ഞെടുപ്പായിരുന്നു 2000ത്തിലേത്​. ജോർജ്​ ഡബ്ലിയു ബുഷും ആൽബർട്ട്​ ഗോർ ജൂനിയറും തമ്മിൽ നടന്ന ഇഞ്ചോടിഞ്ച്​ പോരാട്ടമാണ്​ ഏറെ സമയം നീണ്ടു നിന്നത്​. 36 ദിവസമായിരുന്നു അന്ന്​ ഫലം അറിയാൻ അമേരിക്കൻ ജനത കാത്തിരുന്നത്​. ഗോറിന്​ 266 വോട്ടും പ്രസിഡൻറായി തെരഞ്ഞെടുക്കപ്പെട്ട ബുഷിന്​ 271 വോട്ടുമായിരുന്നു അന്ന്​ ലഭിച്ചത്​.

2004ലെ ബുഷ്​- കെറി മത്സരംഫലം തൊട്ടടുത്ത ദിവസം തന്നെ അറിഞ്ഞു. 2008ലെ ജോൺ മെകെയ്​ൻ-ഒബാമ പോരാട്ടവും 2012ൽ ഓബാമ-മിറ്റ്​ റോംനി മത്സരവും കഴിഞ്ഞ തവണ ട്രംപ്​- ക്ലിൻറൺ മത്സരവും ആ ദിവസം തന്നെ ഫലം അറിഞ്ഞു.