മ്യാൻമറിൽ നിന്നുള്ളവർക്ക്​ താൽക്കാലിക അഭയം നൽകുമെന്ന്​ യു.എസ്​

വാഷിങ്​ടൺ: സൈന്യത്തിന്‍റെ അതിക്രമങ്ങൾ വർധിച്ച മ്യാൻമറിൽ നിന്നുള്ളവർക്ക്​ താൽക്കാലികമായി അഭയം നൽകുമെന്ന്​ യു.എസ്​. ​ഹോംലാൻഡ്​ സെക്യൂരിറ്റി സെക്രട്ടറി അലാജാണ്ട്രോ മയോർകാസാണ്​ ഇക്കാര്യം അറിയിച്ചത്​. 18 മാസത്തേക്കാവും ഇത്തരത്തിൽ സംരക്ഷണം നൽകുക. നിലവിൽ യു.എസിലുള്ള മ്യാൻമർ പൗരൻമാർക്കാവും ആനുകൂല്യം ലഭിക്കുക.

മ്യാൻമറിലേക്കുള്ള വിമാന സർവീസുകൾ തടസപ്പെട്ടിരിക്കുകയാണ്​. സാമ്പത്തിക പ്രതിസന്ധിയും രാജ്യത്ത്​ രൂക്ഷമാണ്​. ഈയൊരു സാഹചര്യത്തിൽ മ്യാൻമർ പൗരൻമാർക്ക്​ സ്വന്തം രാജ്യത്തേക്ക്​ മടങ്ങാൻ ബുദ്ധിമുട്ടുകൾ നേരിടുന്നുണ്ട്​. ഇതിനാലാണ്​ താൽക്കാലികമായി അഭയം നൽകുന്നതെന്ന്​ യു.എസ്​ അറിയിച്ചു.

മ്യാൻമറിലെ ഓങ്​ സാങ്​ സൂചി ഭരണകൂടത്തെ അട്ടിമറിച്ച്​ പട്ടാളം അധികാരം പിടിച്ചതോടെയാണ്​ പ്രശ്​നങ്ങൾ തുടങ്ങിയത്​. പട്ടാള അട്ടിമറിക്കെതിരെ വൻ ജനകീയ പ്രക്ഷോഭമാണ്​ നടക്കുന്നത്​.