യു.എസിൽ കോവിഡ്​ രോഗികളുടെ എണ്ണം രണ്ടരകോടി കടന്നു; വാക്​സിൻ വിതരണത്തിൽ ട്രംപിന്​ വീഴ്ചപറ്റി​െയന്ന്​ ആക്ഷേപം

വാഷിങ്​ടൺ: യു.എസിലെ കോവിഡ്​ രോഗികളുടെ എണ്ണം രണ്ടര കോടി പിന്നിട്ടു. ലോകത്തെ കോവിഡ്​ ബാധിച്ചവരിൽ കാൽഭാഗവും യു.എസിൽ നിന്നുള്ളവരാണ്​. അതേസമയം, രാജ്യത്ത്​ കോവിഡ്​ വാക്​സിൻ വിതരണത്തിനായി ഡോണൾഡ്​ ട്രംപ്​ ഒരുക്കിയ സൗകര്യങ്ങളിൽ ബൈഡൻ ഭരണകൂടം അതൃപ്​തി രേഖപ്പെടുത്തി. വിവിധ സംസ്ഥാനങ്ങൾക്ക്​ വാക്​സിൻ വിതരണം ചെയ്യുന്നതിനായി തയാറാക്കിയ പദ്ധതിയിൽ പോരായ്​മകളുണ്ടെന്ന്​ ബൈഡന്‍റെ ചീഫ്​ ഓഫ്​ സ്റ്റാഫ് റോൺ ക്ലെയിൻ​ പറഞ്ഞു.

വാക്​സിൻ വിതരണം കൂടുതൽ കാര്യക്ഷമമാകുന്നതോടെ കോവിഡ്​ രോഗികളുടെ എണ്ണം കുറയുമെന്നാണ്​ യു.എസിന്‍റെ പ്രതീക്ഷ. ചില സംസ്ഥാനങ്ങളിൽ ഇപ്പോഴും വാക്​സിന്​ ക്ഷാമം അനുഭവപ്പെടുന്നുണ്ട്​. ഇത്​ പരിഹരിക്കാനാണ്​ പുതുതായി അധികാരമേറ്റെടുത്ത ബൈഡൻ ഭരണകൂടം ഇപ്പോൾ ശ്രമിച്ചുകൊണ്ടിരിക്കുന്നത്​.

ഡോണൾഡ്​ ട്രംപിന്‍റെ ഭരണത്തിന്‍റെ അവസാന നാളുകളിലെ അനാസ്ഥയാണ്​ കോവിഡ്​ വീണ്ടും പടരാനിടയാക്കിയതെന്നും റോൺ ക്ലെയിൻ വ്യക്​തമാക്കി. ബൈഡൻ അധികാരമേറ്റെടുക്കു​േമ്പാൾ നഴ്​സിങ്​ ഹോമുകൾക്കും ആശുപത്രികൾക്കും പുറത്ത്​ വാക്​സിൻ വിതരണം കാര്യക്ഷമമായിരുന്നില്ലെന്നും അദ്ദേഹം പറഞ്ഞു. യു.എസിൽ ഇതുവരെ 41.4 മില്യൺ ആളുകൾക്കാണ്​ വാക്​സിൻ വിതരണം നടത്തിയത്​.