ഐ.എസ്​-കെ ചാവേറിനെ വധിക്കാൻ അമേരിക്ക ഉപയോഗിച്ചത്​ കൊല്ലപ്പെട്ട സൈനികരുടെ പേരെഴുതിയ മിസൈൽ

വാഷിങ്ടണ്‍: കാബൂളിൽ 182 പേർ കൊല്ലപ്പെടാനിടയായ സ്​​േഫാടനം ആസൂത്രണം ചെയ്​ത ഐ.എസ്​-ഖുറാസാൻ (ഐ.എസ്​-കെ) ചാവേറിനെ വധിക്കാൻ നടത്തിയ ആക്രമണത്തിന്​ അമേരിക്ക ഉപയോഗിച്ചത്​ സ്​​േഫാടനത്തിൽ കൊല്ലപ്പെട്ട തങ്ങളുടെ സൈനികരുടെ പേരെഴുതിയ മിസൈൽ. വ്യാഴാഴ്ച കാബൂൾ ഹമീദ്​ കർസായി വിമാനത്താവളത്തിന്​ പുറത്തുണ്ടായ ഇരട്ട സ്​ഫോടനത്തിൽ 13 യു.എസ്​ സൈനികർ കൊല്ലപ്പെട്ടിരുന്നു. ഇവർക്കുള്ള ആദരാഞ്​ജലി ആയിട്ടാണ്​ തിരിച്ചടിക്കാൻ ഉപയോഗിച്ച മിസൈലിൽ സൈനികരുടെ പേര്​ എഴുതിയത്​.

'ഞങ്ങള്‍ 8/26/2021 ഓര്‍മിക്കും' എന്നും മിസൈലില്‍ രേഖപ്പെടുത്തിയിരുന്നു. കാബൂള്‍ വിമാനത്താവളത്തിന്‍റെ കവാടത്തിനുസമീപം സ്​ഫോടനം നടത്തിയ ഐ.എസ്-കെ ഭീകരസംഘടനയുടെ സൂത്രധാരനെ വധിച്ചതായി ഞായറാഴ്ച അമേരിക്ക അവകാശപ്പെട്ടിരുന്നു. നംഗര്‍ഹാര്‍ പ്രവിശ്യയിലേക്ക് റീപ്പര്‍ ഡ്രോണ്‍ വിട്ട് ഇയാളെ വധിച്ചതെന്നാണ് യു.എസ് സെൻട്രൽ കമ്മാൻഡ്​ വക്​താവ്​ ബിൽ അർബൻ വ്യക്തമാക്കിയത്. ഈ ആക്രമണത്തിന് ഉപയോഗിച്ച മിസൈലിലാണ് കൊല്ല​പ്പെട്ട അമേരിക്കൻ സൈനികരുടെ പേരുകള്‍ രേഖപ്പെടുത്തിയത്.

വിമാനത്താവള ആക്രമണത്തിന് തിരിച്ചടിക്ക് ഉത്തരവിട്ടെന്ന് യു.എസ്. പ്രസിഡന്‍റ്​ ജോ ബൈഡന്‍ പറഞ്ഞതിനു തൊട്ടുപിന്നാലെയാണ് ഈ ഡ്രോണ്‍ ആക്രമണമുണ്ടായത്. അതേസമയം, കാബൂൾ വിമാനത്താവളത്തിനു സമീപം ഞായറാഴ്ച യു.എസ്​ നടത്തിയ വ്യോമാക്രമണത്തിൽ ഏഴ്​ സിവിലയന്മാർ കൊല്ലപ്പെ​ട്ടെന്നും ഇത്​ നിയമവിരുദ്ധമാണെന്നും താലിബാൻ വക്​താവ്​ സബിഹുള്ള മുജാഹിദ്​ ആരോപിച്ചു. വിമാനത്താവളത്തില്‍ ഭീകരാക്രമണം നടത്താനൊരുങ്ങിയ ഐ.എസ്​-കെ ചാവേറുകളെ ലക്ഷ്യമിട്ടായിരുന്നു ആക്രമണമെന്നാണ്​ യു.എസ്​ സേനയുടെ വിശദീകരണം. ലവന്ത്​ സെക്യൂരിറ്റി ഡിസ്​ട്രിക്​ടിലെ ഖാജെ ബാഗ്രയിലുള്ള ഗുലൈ പ്രദേശത്തെ ജനവാസ മേഖലയിലാണ്​ യു.എസ്​ ആക്രമണം നടന്നത്​. വിമാനത്താവളത്തിനു​സമീപം നിർത്തിയിട്ടിരുന്ന സ്​ഫോടകവസ്​തുക്കൾ നിറച്ച വാഹനത്തിനുനേരെയാണ്​ ഡ്രോൺ ആക്രമണം നടന്നതെന്നും ഒരു ഐ.എസ്​-കെ ചാവേർ കൊല്ലപ്പെ​ട്ടെന്നും അമേരിക്ക വ്യക്​തമാക്കിയിരുന്നു.