ഇറാനെതിരായ ഉപരോധം യു.എസ്​ പിൻവലിക്കണം –ഖാംനഈ

തെഹ്​റാൻ: ആണവകരാർ പുനഃസ്ഥാപിക്കുന്നതിനു മുമ്പ്​ ഇറാനെതിരായ ഉപരോധങ്ങൾ പിൻവലിക്കാൻ യു.എസ്​ തയാറാകണമെന്ന്​ പരമോന്നത നേതാവ്​ ആയത്തുല്ല ഖാംനഈ. ജോ ബൈഡൻ യു.എസ്​ പ്രസിഡൻറായി അധികാരമേറ്റ ശേഷം ആദ്യമായാണ്​ ഖാംനഈ പരസ്യമായി പ്രതികരിക്കുന്നത്​.

ഇറാൻ കരാർവ്യവസ്ഥകൾ പാലിക്കണമെന്ന്​ യു.എസ്​ ആഗ്രഹിക്കുന്നുണ്ടെങ്കിൽ എല്ലാ ഉപരോധങ്ങളും പിൻവലിക്കണം -അദ്ദേഹം ആവശ്യപ്പെട്ടു. മുൻ യു.എസ്​ പ്രസിഡൻറ്​ ഡോണൾഡ്​ ട്രംപാണ്​ ഏകപക്ഷീയമായി ഇറാനുമായുള്ള ആണവകരാറിൽ നിന്ന്​ പിൻവാങ്ങിയത്​. അതിനുപിന്നാലെ, ഇറാനെതിരായ ഉപരോധങ്ങൾ പുനഃസ്ഥാപിക്കുകയും ചെയ്​തു.