ചൈനക്കെതിരെ നയതന്ത്ര ബഹിഷ്​കരണത്തിന്​ യു.എസ്​; തിരിച്ചടിയെന്ന്​ ചൈന

വാഷിങ്​ടൺ: മാസങ്ങൾക്കിടെ ബെയ്​ജിങ്ങിൽ നടക്കുന്ന ശീതകാല ഒളിമ്പിക്​സിൽ ആരെയും പ​ങ്കെടുപ്പിക്കാതെ നയതന്ത്ര ബഹിഷ്​കരണത്തിന്​ യു.എസ്​ പട നീക്കം. അമേരിക്കൻ താരങ്ങൾ പ​ങ്കെടുക്കുകയും ഉദ്യോഗസ്ഥർ എത്താതിരിക്കുകയും ചെയ്യുന്നതാകും ബഹിഷ്​കരണം.

ചൈന തുടരുന്ന മനുഷ്യാവകാശ ധ്വംസനങ്ങളിൽ പ്രതിഷേധിച്ചാണ്​ നടപടിയെന്ന്​ യു.എസ്​ പറയുന്നു. എന്നാൽ, ഫെബ്രുവരിയിലെ ശീതകാല ഒളിമ്പിക്​സിന്​ നയതന്ത്ര വിലക്കുമായി യു.എസ്​ മുന്നോട്ടുപോയാൽ ശക്തമായ തിരിച്ചടി നേരിടേണ്ടിവരുമെന്ന്​ ചൈന മുന്നറിയിപ്പ്​ നൽകി.

തുറന്ന രാഷ്​ട്രീയ പ്രകോപനമാണിതെന്നും തിരിച്ചടിക്കുമെന്നും ചൈനീസ്​ വിദേശകാര്യ വക്താവ്​ ഷാവോ ലിജിയാൻ മുന്നറിയിപ്പ്​ നൽകി.

2008ലെ ബെയ്​ജിങ്​ ഒളിമ്പിക്​സിൽ അന്നത്തെ യു.എസ്​ പ്രസിഡൻറ്​ ജോർജ്​ ബുഷ്​ ഉൾപ്പെടെ പ​ങ്കെടുത്തിരുന്നു. ഈ വർഷം ടോക്യോയിൽ നടന്ന ഒളിമ്പിക്​സിന്​ യു.എസ്​ പ്രഥമ വനിത ജിൽ ബൈഡ​െൻറ നേതൃത്വത്തി​ലെ സംഘമായിരുന്നു പ​​ങ്കെടുത്തത്​. ഇതാണ്​ ഇത്തവണ മുടക്കാൻ നീക്കം.

പ്രമുഖ വ്യക്തിത്വങ്ങളെ അയക്കില്ലെന്ന പ്രഖ്യാപനം പ്രസിഡൻറ്​ ജോ ബൈഡൻ വൈകാതെ നടത്തുമെന്നാണ്​ സൂചന.