ഗസ്സയിൽ ചോരപ്പുഴ ഒഴുക്കി ഇസ്രായേലിൽ അധികാരം ഉറപ്പാക്കി നെതന്യാഹു

ജറൂസലം: ഇടവേളക്കുശേഷം വീണ്ടും ഗസ്സക്കു മേൽ ​അഗ്​നി വർഷിച്ച പ്രധാനമ​ന്ത്രി ​ബിൻയമിൻ നെതന്യാഹു അതുവഴി എളുപ്പം ഭരണം ഉറപ്പാക്കുകയായിരുന്നുവെന്ന്​ റിപ്പോർട്ടുകൾ. 12 വർഷമായി പ്രധാനമന്ത്രി പദത്തിലിരിക്കുന്ന ലിക്കുഡ്​ പാർട്ടി നേതാവിന്​ രണ്ടുവർഷത്തിനിടെ തുടർച്ചയായ നാലു തെരഞ്ഞെടുപ്പുകൾ കഴിഞ്ഞും ഭൂരിപക്ഷമില്ലാതെ മന്ത്രിസഭ രൂപവതക്​രണം പ്രതിസന്ധിയിലായിരുന്നു. ഇതിനിടെ പ്രസിഡന്‍റ്​ പ്രതിപക്ഷത്തെ സർക്കാറുണ്ടാക്കാൻ ക്ഷണിക്കുകയും ചെയ്​തു.

പ്രതിപക്ഷ നേതാവ്​ യായർ ലാപിഡ്​ മന്ത്രിസഭ രൂപവത്​കരണ നീക്കങ്ങൾ തകൃതിയാക്കുന്നതിനിടെ ഗസ്സക്കു മേൽ പതിച്ച ബോംബുകൾ കാര്യങ്ങൾ കീഴ്​മേൽ മറിച്ചു. ജൂത, ഫലസ്​തീനി വിഭാഗങ്ങൾക്കിടയിൽ വിഭാഗീയത ഇത്​ വീണ്ടും രൂക്ഷമാക്കി. ഇതോടെ ലാപിഡിന്​ പിന്തുണക്കേണ്ട അറബ്​ കക്ഷി മ​ന്ത്രിസഭ രൂപവത്​കരണ ചർച്ചകളിൽനിന്ന്​ പിന്മാറി. ജൂൺ രണ്ടിനകം സഖ്യസർക്കാർ രൂപവത്​കരിക്കണമെന്ന സമയപരിധി ലാപിഡിന്​ പാലിക്കാനാകില്ലെന്നതാണ്​ സ്​ഥിതി. മാത്രവുമല്ല, നെതന്യാഹുവിന്​ പിന്തുണയുമായി പ്രതിപക്ഷത്തെ ചിലർ എത്തുമെന്ന സൂചനയുമുണ്ട്​.

ഫലസ്​തീനികളെ നേരിടാൻ കരുത്തുറ്റ നേതാവ്​ എന്ന ലാബൽ ഉയർത്തിക്കാട്ടി മന്ത്രിസഭ ഉണ്ടാക്കാനാണ്​ നെതന്യാഹുവിന്‍റെ നീക്കം. ഇത്​ വിജയം കാണുമെന്നാണ്​ ഏറ്റവുമൊടുവിലെ സൂചനകൾ. 2012ലും 2014ലും ഗസ്സക്കുമേൽ ആക്രമണം നടത്തിയത്​ നെതന്യാഹുവായിരുന്നു. ഫലസ്​തീനി പ്രശ്​നം ശരാശരി ഇസ്രായേലി മനസ്സിൽനിന്ന്​ പരമാവധി അകറ്റിനിർത്തുന്നതിൽ നേരത്തെ വിജയം കണ്ട അദ്ദേഹം അടുത്തായി അഴിമതിക്കേസുകളിൽ കുടുങ്ങിയതോടെ വീണ്ടും പ്രകോപനത്തിനും പിന്നാലെ രൂക്ഷമായ ആക്രമണത്തിനും തീരുമാനമെടുക്കുകയായിരുന്നുവെന്ന്​ റിപ്പോർട്ടുകൾ വ്യക്​തമാക്കുന്നു.

ഗസ്സയിലെയും മസ്​ജിദുൽ അഖ്​സയിലെയും ഇസ്രായേൽ സൈനിക നീക്കം അറബികൾക്കും ജൂതർക്കുമിടയിൽ വംശീയ സംഘർഷത്തിനും വളമിട്ടിരുന്നു. അറബികൾ ജൂതർക്കൊപ്പം സമാധാനമായി കഴിഞ്ഞുപോന്ന പ്രദേശങ്ങളി​ലേറെയും ദിവസങ്ങളായി കടുത്ത ആഭ്യന്തര സംഘർഷം നിലനിൽക്കുകയാണ്​. 66 ലക്ഷം ജൂതരും 20 ലക്ഷം അറബികളുമാണ്​ ഇസ്രായേലിലെ ജനസംഖ്യ. ഗസ്സ, വെസ്റ്റ്​ ബാങ്ക്​ പ്രദേശങ്ങൾ കൂടി ചേർത്താൽ അറബികൾ 60 ലക്ഷമാണ്​. ഇവർക്കിടയിൽ ആഭ്യന്തര സംഘട്ടനം രൂക്ഷമായാൽ ഏതറ്റം വരെ പോകുമെന്നതാണ്​ ആശങ്ക.

പ്രതിസന്ധി രൂക്ഷമായ ഘട്ടത്തിൽ പാർട്ടികളെ ഒരു കുടക്കീഴിൽ നിർത്തി മന്ത്രിസഭ രൂപവത്​കരിക്കാൻ ലാപിഡിന്​ സാധ്യമാക്കാത്തതാണ്​ കുഴക്കുന്നത്​. മുൻ മാധ്യമപ്രവർത്തകനായ ലാപിഡ്​ രാഷ്​ട്രീയ രംഗത്ത്​ ഇനിയും നെതന്യാഹുവിനോളം ദേശീയ പ്രസക്​തനല്ല. അതിനാൽ ചെറുകിട പാർട്ടികളുമായി ഭിന്നത പരിഹരിക്കുന്നതിലും വിജയം കാണാനാകാത്ത സ്​ഥിതിയുണ്ട്​.

ഇസ്രായേലിന്‍റെ ചരിത്രത്തിലാദ്യമായി ക്രിമിനൽ വിചാരണ നേരിടാനിരിക്കുകയാണ്​ നെതന്യാഹു. ഒരു പ്രധാനമന്ത്രിയും ഇതുപോലെ ജയിൽശിക്ഷക്കരികെ എത്തിയിട്ടില്ല. അഴിമതിയും കൈക്കൂലിയുമുൾപെടെ വിവിധ കേസുകളിൽ വിചാരണ ആരംഭിക്കാനിരിക്കുകയാണ്​. സമയമെടുക്കുമെങ്കിലും ശിക്ഷ ലഭിക്കുന്ന പക്ഷം തടവറ കാത്തിരിക്കുന്നുവെന്നത്​ വീണ്ടും അധികാരത്തിൽ കടിച്ചുതൂങ്ങാൻ നെതന്യാഹുവിനെ നിർബന്ധിക്കുന്നുണ്ട്​. പുതിയ ആക്രമണം താത്​കാലിക അഭയമാകു​െമന്നും കണക്കുകൂട്ടുന്നു. ഇതിനു പക്ഷേ, ഗസ്സയി​െല ലക്ഷങ്ങൾ നൽകേണ്ടിവരുന്നത്​ വലിയ വിലയും.