റഷ്യൻ ബന്ദികളെ മോചിപ്പിച്ച ഹമാസിന് നന്ദി പറഞ്ഞ് വ്ലാദിമിർ പുടിൻ; ‘ഫലസ്തീൻ ജനതയുമായുള്ള സുസ്ഥിര ബന്ധത്തിന്‍റെ ഫലമെന്ന്’

മോസ്കോ: ഗസ്സയിലെ റഷ്യൻ ബന്ദികളെ മോചിപ്പിച്ച ഹമാസിന് നന്ദി പറഞ്ഞ് പ്രസിഡന്റ് വ്ലാദിമിർ പുടിൻ. മോചിതരായവരും മുഖ്യ റബ്ബി ബേൾ ലേസർ അടക്കം നിരവധി ജൂത പണ്ഡിതന്മാരും പ​ങ്കെടുത്ത യോഗത്തിലായിരുന്നു പുടിന്റെ പ്രസ്താവന.

ഫലസ്തീൻ ജനതയുമായും വിവിധ സംഘടന പ്രതിനിധികളുമായും റഷ്യക്കുള്ള വർഷങ്ങളുടെ സുസ്ഥിരമായ ബന്ധത്തിന്റെ ഫലമാണിത്. ഈ മാനുഷിക പ്രവൃത്തിക്ക് ഹമാസ് നേതൃത്വത്തിനും രാഷ്ട്രീയ വിഭാഗത്തിനും നന്ദി പറയുകയാണെന്നും വ്ലാദിമിർ പുടിൻ കൂട്ടിച്ചേർത്തു.

റഷ്യൻ പൗരന്മാരായ അലക്സാണ്ടർ ​ട്രൂഫനോവ്, മാതാവ് എ​ലേന ട്രൂഫനോവ്, മുത്തശ്ശി ഐറിന ടാറ്റി, വധു സപിർ കോഹൻ എന്നിവരെയാണ് ഹമാസ് ബന്ദികളാക്കിയത്. ട്രൂഫനോവിനെ ഫെബ്രുവരിയിലും ബന്ധുക്കളെ ബുധനാഴ്ച രാത്രിയുമാണ് ഹമാസ് മോചിപ്പിച്ചത്.

കുടുംബനാഥനായ വിറ്റാലി ട്രൂഫനോവ് ആക്രമണത്തിൽ കൊല്ലപ്പെട്ടിരുന്നതായും റഷ്യൻ വാർത്ത ഏജൻസിയായ ഇന്റർഫാക്സ് റിപ്പോർട്ട് ചെയ്തു.