രാജിയില്ല, ജോലി​ തുടരും; യു.എസ് തീരുമാനം പുന:പരിശോധിക്കണം -ഡബ്ല്യു.എച്ച്​.ഒ തലവൻ

ജനീവ: ത​​െൻറ ജോലി ജീവൻ രക്ഷിക്കലാണെന്നും അത്​ തുടരുക തന്നെ ചെയ്യുമെന്നും ലോകാരോഗ്യസംഘടന (ഡബ്ല്യു.എച്ച്​.ഒ) തലവൻ ടെഡ്രോസ് അദാനോം ഗെബ്രിയേസസ്. രാജിക്ക്​ വേണ്ടി അമേരിക്കയിൽനിന്നുള്ള മുറവിളി അദ്ദേഹം തള്ളി. സംഘടനക്കുള്ള ധനസഹായം നിർത്തിയ നടപടി അമേരിക്ക പുനപരിശോധിക്കുമെന്ന് പ്രതീക്ഷിക്കുന്നതായും ടെഡ്രോസ് അഭിപ്രായപ്പെട്ടു.

“ഞാൻ രാപ്പകൽ ജോലിചെയ്യുന്നത് തുടരും. ജീവൻ രക്ഷിക്കുക എന്ന അനുഗ്രഹീതമായ ജോലിയാണിത്​. അതിൽ ശ്രദ്ധ കേന്ദ്രീകരിക ്കും” -ഇതായിരുന്നു രാജി ആവശ്യത്തോടുള്ള പ്രതികരണം. ഡബ്ല്യു.എച്ച്​.ഒക്ക്​ സംഭാവന നൽകുന്നതിലൂടെ മറ്റുള്ളവരെ സഹായിക്കുക മാത്രമല്ല ചെയ്യുന്നത്​ എന്ന്​ യു.എസ്​ മനസ്സിലാക്കണം. പകർച്ചവ്യാധികൾക്കിടയിൽ യു.എസിനെ സുരക്ഷിതമാക്കാനും ഏജൻസി ഒരു പ്രധാന നിക്ഷേപമാണ്​ -ടെഡ്രോസ് പറഞ്ഞു.

ചൈനയെ സഹായിക്കാൻ ലോകാരോഗ്യസംഘടന പലതും മറച്ചുവെച്ചതായും തെറ്റിദ്ധാരണ പരത്തിയതായും ആരോപിച്ച് ഡബ്ല്യു.എച്ച്​.ഒക്കുള്ള​ ധനസഹായം യുഎസ് താൽക്കാലികമായി നിർത്തുമെന്ന് പ്രസിഡൻറ്​ ഡോണൾഡ് ട്രംപ് കഴിഞ്ഞ ആഴ്ച പ്രഖ്യാപിച്ചിരുന്നു. ജനീവ ആസ്ഥാനമായുള്ള ഈ യു.എൻ ഏജൻസിക്ക്​ വർഷവും ദശലക്ഷക്കണക്കിന് ഡോളറാണ്​ അമേരിക്ക സംഭാവന നൽകുന്നത്​.

സംഭാവന നൽകണമെങ്കിൽ ടെഡ്രോസ്​ രാജി വെക്കണമെന്ന്​ വ്യവസ്ഥ ചെയ്യണമെന്ന് കഴിഞ്ഞയാഴ്ച യു.എസ്​ ജനപ്രതിനിധിസഭയിലെ റിപ്പബ്ലിക്കൻ അംഗങ്ങൾ ആവശ്യപ്പെട്ടിരുന്നു. എന്നാൽ, യു‌എസ്‌ സംഭാവന നിർത്തിയാൽ കുട്ടികളുടെ പ്രതിരോധ കുത്തി​െവയ്പ്പുകൾ‌, പോളിയോ നിർമാർജന ദൗത്യം‌, അവശ്യ ആരോഗ്യ സേവനങ്ങൾ‌, ദുർബലരായ ജനങ്ങൾക്കുള്ള അടിയന്തിര സഹായം തുടങ്ങിയ പ്രവർത്തനങ്ങളെ ബാധിക്കുമെന്ന് ഡബ്ല്യു.എച്ച്​.ഒ അത്യാഹിത വിഭാഗം മേധാവി ഡോ. മൈക്ക് റയാൻ‌ പറഞ്ഞു.

അതേസമയം, ലോകാരോഗ്യ സംഘടനക്ക്​ നൽകിയിരുന്ന പണം അതേ ആവശ്യത്തിനായി ഉപയോഗിക്കുമെന്ന്​ യുഎസ് അധികൃതർ പറഞ്ഞു. ഡബ്ല്യു.എച്ച്​.ഒവിനെ ഇടനിലക്കാരനാക്കാതെ ഇത് ഒാരോ രാജ്യത്തെയും ഗ്രൂപ്പുകൾക്ക് നേരിട്ട്​ വിതരണം ചെയ്യാനാണ്​ തീരുമാനമെന്നും അവർ വ്യക്​തമാക്കി.