മന്ദമാരുതിയായി പുതിയ സ്വിഫ്​റ്റ്​

അതിവേഗം പോകാനൊരു വണ്ടി. ആരാധകരുടെ ആഗ്രഹം അറിഞ്ഞാണ്​​ നമ്മുടെ മാരുതി സുസുക്കി സാക്ഷാൽ സ്വിഫ്​റ്റിനെ ഇന്ത്യയിലെത്തിച്ചത്. അന്താരാഷ്​ട്ര വിപണിയിൽ സൂപ്പർമിനി വിഭാഗത്തിൽപെടുത്തി പല പേരുകളിൽ വിറ്റിരുന്ന ഈ വണ്ടി വലിയ വേഗത്തി​ലൊന്നും പോകുന്നതല്ലെങ്കിലും വിൽപ്പന കണ്ണഞ്ചിപ്പിച്ച്​ കുതിച്ചു. ഡീസലും പെട്രോളും ഒഴിക്കുന്ന സ്വിഫ്​റ്റുകൾ റോഡുകളിൽ നിറഞ്ഞു. എതിരാളികൾ പുതിയ വെല്ലുവിളികളുമായി എത്തുമ്പോഴൊക്കെ പുതിയ സ്വിഫ്​റ്റുകളിറക്കി മാരുതി മന്ദഹസിച്ചു.

റോക്കറ്റ്​ വിടുമ്പോഴും മൈലേജ്​ അന്വേഷിക്കുന്നവരുടെ നാട്ടിൽ പെർഫോമൻസിനെക്കാൾ പ്രാധാന്യം ഇന്ധനക്ഷമതക്കാണെന്ന്​ മാരുതിക്ക്​ നന്നായി അറിയാം. ഓരോ തവണ പുതുക്കുമ്പോഴും മൈലേജ് പരമാവധി വർധിപ്പിക്കാൻ അവർ ശ്രമിക്കാറുണ്ട്​. ഏറ്റവുമൊടുവിൽ ഇറങ്ങിയിരിക്കുന്ന നാലാംതലമുറ സ്വിഫ്​റ്റിൽ മൈലേജിന്‍റെ ആറാട്ടാണ്​. ഇന്ത്യയിലല്ല ലോകത്തു തന്നെ ഏറ്റവും കൂടുതൽ വിൽക്കാൻ പാകത്തിനാണ്​ പുതിയ സ്വിഫ്​റ്റ്​ എത്തുന്നത്​.

കഴിഞ്ഞ വർഷം അവസാനം ടോക്യോ മോട്ടോർ ഷോയിൽ അവതരിപ്പിച്ചതു മുതൽ ഇവൻ ഇന്ത്യയിലെത്തുന്നത്​ കാത്തിരിക്കുകയായിരുന്നു സ്വിഫ്​റ്റ്​ പ്രേമികൾ. ജപ്പാനിലും യൂറോപ്പിലും നേരത്തെ എത്തിയതു കൊണ്ട്​ വലിയ ജിജ്ഞാസയൊന്നും ഇല്ലെന്നുമാത്രം. കുറച്ചു നീളം കൂടിയതും ​പിന്നിലെ വാതിലിന്‍റെ പിടികൾ സി പില്ലറിൽ നിന്ന്​ വാതിലിലേക്ക്​ ഇറങ്ങി വന്നതുമാണ്​ പുറമെയുള്ള കാര്യമായ മാറ്റം.

88 ബിഎച്ച്​പി പവറും 113 എൻ.എം ടോർക്കുമുണ്ടായിരുന്ന നാലു സിലിണ്ടർ കെ12സി എഞ്ചിൻ മാറ്റി പകരം മൂന്ന്​ സിലിണ്ടർ എഞ്ചിൻ വച്ചതാണ്​ ഉള്ളിലുള്ള മാറ്റം. ഈ എഞ്ചിന്​ 80 ബിഎച്ച്​പിയും 111.7 എൻഎമ്മും നൽകാനുള്ള ശേഷിയെയുള്ളൂ. വഴികളൊക്കെ അന്താരാഷ്ട്ര നിലവാരത്തിലായതിനാൽ വലിയ ബുദ്ധിമുട്ടൊന്നും ഇതുകൊണ്ട്​ ഉണ്ടാകാൻ സാധ്യതയില്ല. പക്ഷേ, ഒരു ലിറ്റർ പെട്രോൾ ഒഴിച്ച്​ മര്യാദക്ക്​ ഓടിച്ചാൽ ഏതാണ്ട്​ 25 കിലോമീറ്റർ മൈലേജ്​ കിട്ടുമെന്നതിൽ ആഹ്ലാദിക്കാനുള്ള വകയുണ്ട്​.

ഹ്യൂണ്ടായ്​ എക്സ്റ്റർ, ഗ്രാന്‍റ്​ ഐടെൻ, ടാറ്റ പഞ്ച്​ തുടങ്ങിയവക്കൊന്നും വലിയ സന്തോഷം കണ്ടേക്കില്ല. പുതിയ സ്വിഫ്​റ്റിന്‍റെ ബുക്കിങ്​ തുടങ്ങിയെങ്കിലും ഔദ്യോഗികമായി മെയ്​ ഒമ്പതിനായിരിക്കും പ്രത്യക്ഷപ്പെടുക. വില 6.50 ലക്ഷം മുതൽ 10 ലക്ഷം വരെയായേക്കുമെന്നാണ് സൂചനകൾ. ​