സംഗീത സംവിധായകൻ കീരവാണിയുടെ ഓസ്കർ നേട്ടത്തിൽ സന്തോഷം പങ്കുവെച്ച ഗായിക കെ.എസ് ചിത്ര. എം.എം കീരവാണിക്ക് അർഹിച്ച അംഗീകാരമാണ് ലഭിച്ചതെന്നും ഇനിയും ഇതുപോലെ നിരവധി പുരസ്കാരങ്ങൾ ലഭിക്കട്ടെയെന്നും ചിത്ര പറഞ്ഞു.
'എം.എം കീരവാണി സാറിനോടൊപ്പം നിരവധി ഗാനം ആലപിക്കാൻ കഴിഞ്ഞതിൽ സന്തോഷമുണ്ട്. ഇനിയും നിരവധി പുരസ്കാരങ്ങൾ ലഭിക്കട്ടെ. നല്ലൊരു മനുഷ്യനാണ് അദ്ദേഹം. എല്ലാ തരത്തിലുള്ള സംഗീതവും ചെയ്യുന്ന ആളാണ് അദ്ദേഹം.വളരെ എളിമയുള്ള വ്യക്തിയുമാണ് കീരവാണി.
ചിത്രഗാരു എന്നാണ് എന്നെ വിളിക്കുന്നത്. എല്ലാ വിശേഷ അവസരങ്ങളിലും ഞങ്ങള്‍ സന്ദേശങ്ങൾ അയക്കാറുണ്ട്. ഗോള്‍ഡന്‍ ഗ്ലോബ് ലഭിച്ചപ്പോള്‍ അദ്ദേഹത്തിന് അഭിനന്ദനം അയച്ചിരുന്നു. തിരിച്ച് നന്ദി പറയാനും മറന്നില്ല.
വിമാനത്തിൽ കയറാൻ പേടിയുളള വ്യക്തിയായിരുന്നു കീരവാണി സാർ. നിങ്ങൾ ഇത്രയും നേരം അമേരിക്കയിലേക്ക് വിമാനത്തിൽ പോകുമ്പോൾ എന്തുചെയ്യുമെന്നൊക്കെ ചോദിച്ചയാളാണ്. ഇപ്പോൾ അമേരിക്കയിലേക്ക് വിമാനം കയറിപ്പോയി ഗോൾഡൻ ഗ്ലോബും ഓസ്കറുമൊക്കെ വാങ്ങുന്നു'- ചിത്ര ടെലിവിഷൻ ചാനലിനോട് പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.