ചൂടു​കാലമാണ്​, സൂര്യാഘാതവും സൂര്യാതപവും ശ്രദ്ധിക്കാം

ദോഹ: ചൂട് സംബന്ധമായ രോഗങ്ങളെ കുറിച്ച് മുന്നറിയിപ്പുമായി ഹമദ് മെഡിക്കൽ കോർപറേഷൻ. ചൂടിനെ പ്രതിരോധിക്കാനുള്ള ശേഷി കുറയുന്നതോടെ സൂര്യാഘാതം, സൂര്യാതപം പോലെയുള്ള രോഗാവസ്​ഥക്ക് സാധ്യതയേറെയാണെന്നും ജനങ്ങൾ ജാഗ്രത പാലിക്കണമെന്നും എച്ച്.എം.സി അറിയിച്ചു.

സൂര്യാഘാതം പോലെയുള്ള സാഹചര്യങ്ങളിൽ കൃത്യമായ ചികിത്സ തേടിയില്ലെങ്കിൽ ജീവനുവരെ ഭീഷണിയാണ്​. ധാരാളമായി വെള്ളം കുടിക്കുകയും സൂര്യപ്രകാശം നേരിട്ട് ശരീരത്തിൽ പതിക്കുന്നത് നിർബന്ധമായും ഒഴിവാക്കണമെന്നും എച്ച്.എം.സി നിർദേശിച്ചു.

ചൂടു കാരണം എന്തെങ്കിലും അസ്വസ്​ഥത അനുഭവപ്പെടുകയാണെങ്കിൽ ഉടൻ തന്നെ അടിയന്തര വിഭാഗത്തിൽ എത്തി ചികിത്സ തേടണം. നിർജലീകരണം, സൂര്യാതപം, സൂര്യാഘാതം എന്നിവയാണ് ചൂടുകാലത്തെ പ്രധാന രോഗങ്ങൾ. സൂര്യപ്രകാശം നേരിട്ട് പതിക്കുന്നത് മൂലമോ ആവശ്യത്തിന് വെള്ളം കുടിക്കാതിരുന്നാലോ ഇത്തരം രോഗാവസ്​ഥ ഉണ്ടാകാം.

അന്തരീക്ഷതാപം ഒരു പരിധിക്കപ്പുറം ഉയരുന്നതോടെ ശരീരത്തി​െൻറ താപനിയന്ത്രണ സംവിധാനങ്ങൽ തകരാറിലാകുകയും ചൂട് പുറന്തള്ളപ്പെടുന്നതിന് തടസ്സങ്ങൾ നേരിടുകയും ചെയ്യും. ഇത് ശരീരത്തി​െൻറ പ്രവർത്തനം തകരാറിലാക്കും. ഈ അവസ്​ഥയാണ് സൂര്യാഘാതം. സൂര്യാഘാതത്തെക്കാൾ കാഠിന്യം കുറഞ്ഞ അവസ്​ഥയാണ് സൂര്യാതപം (ഹീറ്റ് എക്സോഷൻ). കനത്ത ചൂടിൽ ശരീരത്തിൽനിന്നും ജലവും ലവണങ്ങളും വിയർപ്പിലൂടെ അമിതമായ അളവിൽ നഷ്​ടമാകുന്നതിനെ തുടർന്നുണ്ടാകുന്ന ക്ഷീണം, തലകറക്കം, ഛർദി, തലവേദന, ബോധക്ഷയം എന്നിവയാണ് ഇതി‍െൻറ ലക്ഷണങ്ങൾ.

ചൂട് സംബന്ധമായ രോഗങ്ങളുടെ പ്രധാന ലക്ഷണങ്ങൾ ശരീരം ചുവന്ന് ചൂടാകുക, ശക്തമായ തലവേദന, പേശീവലിവ്, തലകറക്കം, ഉയർന്ന ശരീരതാപനില എന്നിവയാണ്. ഈ ലക്ഷണങ്ങൾ അനുഭവപ്പെടുകയാണെങ്കിൽ ഉടൻ അടിയന്തര വിഭാഗത്തിലെത്തി ചികിത്സ നേടിയിരിക്കണം.

സൂര്യാഘാതത്തെ തുടർന്ന് കൃത്യസമയത്ത് ചികിത്സ ലഭിച്ചില്ലെങ്കിൽ മരണമോ അതല്ലെങ്കിൽ ആജീവനാന്തം ശരീരത്തി​െൻറ ശേഷിക്കുറവോ സംഭവിക്കാമെന്നും ഹമദ് മെഡിക്കൽ കോർപറേഷൻ ഓർമപ്പെടുത്തുന്നു.

രാജ്യത്ത് അന്തരീക്ഷ താപനില ഉയരുന്ന സാഹചര്യമാണുള്ളത്​. കടുത്ത തലവേദന, നിർജലീകരണം എന്നിവ സംഭവിക്കുന്നതോടെ വേദനജനകമായ പേശീവലിവ്, തളർച്ച, അതിസാരം, ഛർദി, തൊലി പൊട്ടുക, ഹൃദയസ്​പന്ദനത്തിലെ ക്രമമില്ലായ്മ തുടങ്ങിയ രോഗാവസ്​ഥക്ക് കാരണമാകും.

ഇതിലേതെങ്കിലും ലക്ഷണങ്ങൾ അനുഭവപ്പെടുകയാണെങ്കിൽ ഉടൻ തണൽ പ്രദേശത്തേക്ക് മാറിയിരുന്ന് വിശ്രമിക്കണം. കൂടുതൽ വെള്ളം കുടിക്കണം. കടുത്ത ചൂടിനെ നേരിടുന്നതിന് പുറത്തിറങ്ങുമ്പോൾ ഇളം നിറത്തിലുള്ള വസ്​ത്രങ്ങൾ ധരിക്കാൻ ശ്രമിക്കണം. ധാരാളമായി വെള്ളം കുടിക്കുകയും പഴങ്ങൾ ഭക്ഷിക്കുകയും ചെയ്യണം.

ജലമടങ്ങിയ ഭക്ഷണ പദാർഥങ്ങൾ കൂടുതലായി കഴിക്കണം.ചൂട് കനക്കുന്നതോടെ തുറസ്സായ സ്​ഥലങ്ങളിൽ ജോലിയെടുക്കുന്നവർ കൂടുതൽ മുൻകരുതൽ സ്വീകരിക്കണം. വാഹനങ്ങളിൽ കുട്ടികളെ തനിച്ചാക്കി രക്ഷിതാക്കൾ പുറത്ത് പോകരുത്​. വേനലിൽ കൂടുതൽ ജലമടങ്ങിയ ഭക്ഷണം കഴിക്കാൻ ശ്രദ്ധിക്കണം. ചെറുനാരങ്ങയോ പുതിയിലയോ ഓറഞ്ച് അല്ലികളോ വെള്ളത്തിൽ ചേർത്ത് ഉപയോഗിക്കാം. പ്രതിദിനം ചുരുങ്ങിയത് 12 ക്ലാസ്​ വെള്ളമെങ്കിലും കുടിക്കണം. ദിവസവും ഏഴു മണിക്കൂറെങ്കിലും ഉറങ്ങണം.  ജോഗിങ്, നടത്തം, നീന്തൽ എന്നിവ ശീലമാക്കാൻ ശ്രമിക്കണം.  

ഒരു നിമിഷം പോലും കുട്ടികളെ വാഹനത്തിൽ തനിച്ചാക്കരുത്​

രാജ്യത്തെ അന്തരീക്ഷ താപനില വർധിക്കുന്നതിനാൽ കുട്ടികളെ വാഹനങ്ങളിൽ തനിച്ചാക്കി പുറത്തുപോകരുതെന്നും ഇങ്ങനെ ചെയ്യുന്നത്​ അപകടം ക്ഷണിച്ചുവരുത്തലാകുമെന്നും അധികൃതർ. ഒരു നിമിഷത്തേക്ക്​ മാത്രമാണെങ്കിൽ കൂടി ഇത്തരത്തിൽ വാഹനം പാർക്ക്​ ചെയ്​ത്​ കുട്ടികളെ അതിലിരുത്തിപ്പോകരുത്​.

വേനൽക്കാലങ്ങളിൽ പുറത്തുള്ളതിനേക്കാൾ 40 ഡിഗ്രി സെൽഷ്യസ്​ അധികമായിരിക്കും കാറിനുള്ളിലെ താപനില. തണുപ്പുള്ള ദിവസങ്ങളിൽ ഇത് 20 ഡിഗ്രി സെൽഷ്യസുമായിരിക്കും. അഞ്ചു മിനിറ്റിനുള്ളിൽ കാറുകളിലെ താപനില ഈ അവസ്​ഥയിലെത്തും. കുറഞ്ഞ സമയത്തേക്കാണെങ്കിൽ പോലും കുട്ടികളെ തനിച്ചിരുത്തി പുറത്തുപോകരുത്​. കാറുകളിൽ ഒറ്റ​െപ്പടുന്ന കുട്ടികളിൽ ഉയർന്ന പനി, നിർജലീകരണം, ബോധക്ഷയം എന്നിവക്ക് സാധ്യതയുണ്ട്​. ചില സാഹചര്യങ്ങളിൽ മരണം വരെ സംഭവിക്കും.

ചൂട് കൂടിയ കാലാവസ്​ഥ എല്ലാവർക്കും അപകടകരമാണ്​. എന്നാൽ, കുട്ടികളുടെ കാര്യത്തിൽ ഇത് കടുപ്പമേറിയതാണ്​. കുട്ടികളിലെ താപനില മുതിർന്നവരിലേതിനെക്കാൾ വേഗത്തിൽ, അഞ്ചു മിനിറ്റിനുള്ളിൽ തന്നെ വർധിക്കും. വേനൽ ദിവസങ്ങളിൽ ഇത് പെട്ടെന്ന് സംഭവിക്കും.

കാർ പാർക്ക് ചെയ്തിരിക്കുന്നത് തണലിലാണെങ്കിലും അതിൽ അപകടം പതിയിരിക്കുന്നുണ്ട്​. കുട്ടികളിൽ സൂര്യാഘാതം, നിർജലീകരണം എന്നിവ പെട്ടെന്ന് സംഭവിക്കുന്നു. തണലിൽ ഗ്ലാസുകൾ അടച്ചിട്ട സാഹചര്യമാണെങ്കിൽ പോലും അപകടത്തിന് സാധ്യതയേറെയാണ്​. സൂര്യാഘാതം മരണത്തിന് വരെ കാരണമാകും.

ഒരു മിനിറ്റ്​ സമയത്തേക്കാണെങ്കിൽപോലും കാറിന് പുറത്തിറങ്ങുമ്പോൾ കുട്ടികളെയും കൂടെക്കൂട്ടണം.

കുട്ടികൾ ഉറങ്ങിപ്പോയതിനാൽ അധിക രക്ഷിതാക്കളും കുട്ടികളുടെ കാര്യത്തിൽ അശ്രദ്ധരാകുന്നുണ്ട്​. അതിനാൽ കാറി​െൻറ പിറകിലുള്ള കുട്ടികളെ പുറത്തിറങ്ങുമ്പോൾ ശ്രദ്ധിക്കുന്നതിനായി രക്ഷിതാക്കൾ തങ്ങളുടെ മൊബൈൽ, പഴ്സ്​ തുടങ്ങിയ അത്യാവശ്യ വസ്​തുക്കൾ അവരുടെ അടുത്ത് വെക്കണം.

പുറത്തിറങ്ങുമ്പോൾ ഉപയോഗത്തിലല്ലെങ്കിൽ കാർ ലോക്ക് ചെയ്യണം. കുട്ടികൾക്ക് കാറുകളുടെ താക്കോൽ നൽകുന്നതും അവർ എടുക്കുന്നതും പരമാവധി ഒഴിവാക്കണം.

കുട്ടികളുടെ തനിച്ചുള്ള നീന്തലും വേണ്ട

ചൂടുകൂടുന്നതോടെ രാജ്യത്തെ ബീച്ചുകളിലും പൂളുകളിലും തിരക്കേറുകയാണ്​. കുടുംബവുമൊത്ത്​ നിരവധി ആളുകളാണ്​ ഇവിടങ്ങളിൽ എത്തുന്നത്​. ബീച്ചുകളിലും മറ്റും കുട്ടികളുടെ മുങ്ങിമരണം ഉൾപ്പെടെയുള്ള അപകടങ്ങൾ സംഭവിക്കാൻ സാധ്യത കൂടുതലാണ്​. ഇതിനാൽ രക്ഷിതാക്കൾ അതിജാഗ്രത പാലിച്ചിരിക്കണം.

ലോകത്താകമാനം മരണത്തിന് കാരണമാകുന്ന മൂന്നാമത്തെ കാരണമാണ് വെള്ളത്തിൽ മുങ്ങിയുള്ളത്​. ആകെ അപകട മരണങ്ങളിൽ മുങ്ങിമരണം ഏഴ് ശതമാനം വരുമെന്നും എച്ച്.എം.സി എമർജൻസി മെഡിസിൻ വിഭാഗം പറയുന്നു.

ആയിരക്കണക്കിനാളുകളാണ് ലോകത്തി​െൻറ വിവിധ ഭാഗങ്ങളിലായി മുങ്ങിമരിക്കുന്നത്​. ഇതിൽ ഏറ്റവും കൂടുതൽ കുഞ്ഞുങ്ങളാണ്​. ഖത്തറിൽ കുട്ടികൾക്കിടയിലുള്ള മുങ്ങി മരണം വർധിച്ചുവരുകയാണ്​. രാജ്യത്ത് മുങ്ങിമരിക്കുന്നവരിൽ 90 ശതമാനവും 10 വയസ്സിന് താഴെയുള്ള കുഞ്ഞുങ്ങളാണ്​. ഇതിൽ തന്നെ 70 ശതമാനത്തോളം നാലു വയസ്സിന് താഴെയുള്ളവരാണ്​.

ചൂടുകുടുതലുള്ള ഈ സമയങ്ങളിൽ കൂടുതലായും ബീച്ചുകളിലും വീടുകളിലെയും പുറത്തുമുള്ള സ്വിമ്മിങ്​ പൂളുകളിലുമാണ് കുട്ടികളും രക്ഷിതാക്കളും ഒഴിവുസമയം ചെലവഴിക്കുന്നത്​. കുട്ടികളെ ഇത്തരം സന്ദർഭങ്ങളിൽ തനിച്ചാക്കുന്നത് അപകട സാധ്യത വർധിപ്പിക്കുന്നു. രക്ഷിതാക്കൾ അതിജാഗ്രത പാലിക്കണം.

വീടുകളിലെ സ്വിമ്മിങ്​ പൂളിന് ചുറ്റും ശക്തിയേറിയ വേലി ഉൾപ്പെടെയുള്ള സുരക്ഷാ മുൻകരുതലുകൾ സ്വീകരിക്കണം. ബീച്ചുകളിൽ പോകുന്നതിനുമുമ്പ് രക്ഷിതാക്കൾ കാലാവസ്​ഥയുമായി ബന്ധപ്പെട്ട മുന്നറിയിപ്പുകൾ ശ്രദ്ധിക്കണം. ബീച്ചുകളിലും പൂളുകളിലും കുട്ടികൾക്കായി നിശ്ചയിക്കപ്പെട്ട ഭാഗങ്ങളിൽ മാത്രം അവരെ ഇറക്കണം. കുട്ടികളുടെ മേൽ എപ്പോഴും രക്ഷിതാക്കളുടെ നിരീക്ഷണം ഉണ്ടായിരിക്കണം. ചെറിയ അശ്രദ്ധ വലിയ അപകടത്തിലേക്ക് നയിക്കും.കുട്ടികൾക്ക് സ്വിമ്മിങ്​ ജാക്കറ്റ് പോലെയുള്ള സുരക്ഷാ മാർഗങ്ങൾ സ്വീകരിക്കണം. കൃത്രിമ ശ്വാസം നൽകുന്നതി​െൻറ പ്രാധാന്യം അവരെ പഠിപ്പിക്കണം.

വീടുകളിലെ ബാത്ത് ടബ്ബുകളിലും കുട്ടികൾ പ്രവേശിക്കുന്നത് ഒഴിവാക്കണം. ബാത്ത് ടബ്ബുകളുടെ ഉപയോഗം കഴിയുന്നതോടെ ടോയ്​ലറ്റുകളുടെ വാതിലുകൾ അടച്ചിടണം. ഇല്ലെങ്കിൽ വീടകങ്ങളും അപകടസ്​ഥലങ്ങളാകാം.