കരുതലോടെ, പഠനത്തിരക്കിലേക്ക്​

ദോഹ: മാസ്​കണിഞ്ഞും ​അകലം പാലിച്ചും കൈകൾ ശുദ്ധിയാക്കിയും ശരീരസുരക്ഷ ഉറപ്പാക്കി രാജ്യത്തെ 560ഒാളം വരുന്ന സ്​കൂളുകളിൽ വീണ്ടും പഠനകാലം.

മുൻ അധ്യയന വർഷത്തിൽ പകുതി വഴിയിൽ, 30 ശതമാനം ശേഷിയോടെ തുടങ്ങിയ ക്ലാസുകൾ ഇക്കുറി നേരത്തേ തന്നെ കൂടുതൽ ശേഷിയോടെ ആരംഭിച്ചു. സർക്കാർ, സ്വകാര്യ മേഖലയിലെ കെ.ജി ക്ലാസുകൾ മുതൽ സെക്കൻഡറി തലം വരെയുള്ള സ്​കൂളുകൾ തിങ്കളാഴ്​ച പ്രവർത്തനം തുടങ്ങി.

50 ശതമാനം കുട്ടികൾക്ക്​ പ്രവേശനം നൽകി, ബെൻഡിഡ്​ ലേണിങ്​ സംവിധാനത്തിലൂടെ ഓൺലൈൻ -ഓഫ്​ ലൈൻ ആയാണ്​ പുതിയ അധ്യയന വർഷം ആരംഭിച്ചത്​.

മലയാളി വിദ്യാർഥികൾ ഏറെയും ആശ്രയിക്കുന്ന സി.ബി.എസ്​.ഇ കരിക്കുലത്തിൽ പ്രവർത്തിക്കുന്ന ഇന്ത്യൻ സ്​കൂളുകളിൽ രണ്ടാം ടേമാണിത്​. ഏപ്രിലിൽ തന്നെ ഇവിടങ്ങളിൽ 2021-22 അധ്യയന വർഷം ആരംഭിച്ചിരുന്നു. ഏതാനും സ്​കൂളുകൾ കഴിഞ്ഞ ചൊവ്വാഴ്​ച മുതൽ ക്ലാസ്​ ആരംഭിച്ചു. മറ്റ്​ ഏഷ്യൻ കരിക്കുലത്തിലുള്ള സ്​കൂളുകളിലും രണ്ടാം ടേമിനാണ്​ ഞായറാഴ്​ച തുടക്കം കുറിച്ചത്​.

ഏറെ നാളുകൾക്കുശേഷം ​കാണുന്ന കുട്ടികൾ തമ്മിൽ അടുത്തിടപഴകുന്നത്​ ഒഴിവാക്കാനായി അധ്യാപകരും അനധ്യാപകരും ഉൾപ്പെടെയുള്ളവർ നേരത്തേ തന്നെ ഒരുങ്ങിയിരുന്നു. വിദ്യാഭ്യാസ-ഉന്നത വിദ്യാഭ്യാസ മന്ത്രാലയത്തിൻെറയും വിവിധ സ്​കൂൾ മാനേജ്​മെൻറുകളുടെയും നേതൃത്വത്തിൽ ഇതുസംബന്ധിച്ച്​ ജീവനക്കാർക്ക്​ പരിശീലനം നൽകി.

ബയോബബ്​ൾ സുരക്ഷയിലാണ്​ സ്​കൂളുകളിൽ കുട്ടികളുടെ ഇടപെടൽ.

കൂടുതൽ പുതിയ അധ്യാപകരെയും ഈ അധ്യയന വർഷത്തിൽ വിവിധ സ്​കൂളുകളിൽ നിയമിച്ചതായി വിദ്യാഭ്യാസ മന്ത്രി അബ്​ദുൽ വാഹിദ്​ അൽ ഹമ്മാദി പറഞ്ഞു.

530 അധ്യാപകരാണ്​ പുതുതായി ജോയിൻ ചെയ്​തത്​. പുതിയ സംവിധാനത്തിലെ ഹാജർ നില സംബന്ധിച്ച്​ കഴിഞ്ഞദിവസം മന്ത്രാലയം വിശദാംശങ്ങൾ പുറത്തുവിട്ടിരുന്നു. ഒരു വിദ്യാർഥി രണ്ടാഴ്​ചയിൽ അഞ്ചു ദിവസം ക്ലാസിലെത്തണമെന്നാണ്​ പ്രധാനം നിർദേശം.

യാത്രാ പ്രതിസന്ധി

അധ്യയനവർഷം ആരംഭിച്ചെങ്കിലും ചിലയിടങ്ങളിൽ കുട്ടികളെ സ്​കൂളുകളിലെത്തിക്കാൻ ബസ്​ സംവിധാനമില്ലാത്തത്​ രക്ഷിതാക്കൾക്ക്​ തിരിച്ചടിയാവുന്നു. 50 ശതമാനം ശേഷിയിൽ മാത്രം പ്രവർത്തിക്കുന്നതിനാൽ ബസ്​ സംവിധാനം ഒരുക്കാനാവില്ലെന്നാണ്​ സ്​കൂൾ അധികൃതരുടെ നിലപാട്​. ഇതുകാരണം, സ്വന്തം വാഹനങ്ങളിലും മറ്റുമായി കൂട്ടികളുമായി രക്ഷിതാക്കൾ സ്​കൂളുകളിലെത്തുന്നതോടെ രാവിലെയും ഉച്ചസമയങ്ങളിലും ഗതാഗതത്തിരക്കും രൂക്ഷമായി.