മലയാളക്കരയിൽ ഫുട്​ബാൾ ആവേശം പകരാൻ 'ഡോം' ഖത്തർ

ദോഹ: ലോകകപ്പ്​ ഫുട്​ബാളിന്‍റെ ആവേശം കേരളത്തിലും എത്തിക്കാൻ വിപുലമായ പരിപാടികളുമായി ഖത്തറിലെ മലപ്പുറം ജില്ലക്കാരുടെ കൂട്ടായ്മയായ 'ഡയസ്​പോറ ഓഫ്​ മലപ്പുറം'. അറേബ്യൻ മണ്ണ്​ ആദ്യമായി വേദിയൊരുക്കുന്ന ലോകകപ്പ്​ ഫുട്​ബാളിന്‍റെ വിശേഷങ്ങളും കളിയാവേശവും കാൽപന്തു​കളിക്ക്​ ഏറെ ആരാധകരുള്ള ​മലപ്പുറം ജില്ലയിൽ വൈവിധ്യമാർന്ന പരിപാടികളോടെ അവതരിപ്പിക്കുമെന്ന്​ 'ഡോം ഖത്തർ' ഭാരവാഹികൾ വാർത്ത സമ്മേളനത്തിൽ പറഞ്ഞു. ഇതിന്‍റെ ഭാഗമായി ലോകകപ്പ്​ ക്വിസ്​, സ്​പോർട്​സ്​ സിമ്പോസിയം, ഫുട്​ബാൾ പ്രദർശന മത്സരം എന്നിവക്ക്​ ജൂലൈ നാലിന്​ കാലിക്കറ്റ്​ സർവകലാശാല വേദിയാവും. ഖത്തർ വേദിയാവുന്ന ലോകകപ്പിന്​ പിറന്ന മണ്ണിൽ പ്രചാരണം നൽകുക എന്ന ലക്ഷ്യത്തോടെയാണ്​ പരിപാടികൾ ആസൂത്രണം ചെയ്യുന്നതെന്ന്​ ഡോം ഖത്തർ പ്രസിഡന്‍റ്​ വി.സി മഷ്​ഹൂദ്​ അറിയിച്ചു. കേരളത്തിലെ വിവിധ കോളജുകളിൽ നിന്നുള്ള ടീമുകളെ പ​ങ്കെടുപ്പിച്ചുകൊണ്ടാണ്​ ഫുട്​ബാൾ അനുബന്ധ ക്വിസ്​ മത്സരം സംഘടിപ്പിക്കുന്നത്​. സർക്കാർ, അർധസർക്കാർ ഉൾപ്പെടെ നിരവധി കോളജുകൾ ഇതുവരെ രജിസ്റ്റർ ചെയ്തതായി ഭാരവാഹികൾ അറിയിച്ചു. പ്രശസ്ത ക്വിസ്​ മാസ്റ്റർമാർ നേതൃത്വം നൽകുന്ന മത്സരത്തിലെ വിജയികൾക്ക്​ 50,022 രൂപയാണ്​ സമ്മാനത്തുക. രണ്ടാം സ്ഥാനക്കാർക്ക്​ 25022 രൂപയും മൂന്നാം സ്ഥാനക്കാർക്ക്​ 10,022 രൂപയും സമ്മാനത്തുകയായി നൽകും. ഫൈനൽ റൗണ്ടിൽ മത്സരിക്കുന്ന ടീമുകൾക്കെല്ലാം പ്രോത്സാഹന സമ്മാനവും നൽകും. തുടർന്ന്​, ഇന്ത്യയിലെയും ഖത്തറിലെയും കായിക സംഘാടകരും മുൻ ഫുട്​ബാൾ താരങ്ങളും പ​ങ്കെടുക്കുന്ന സിമ്പോസിയം, വെറ്ററൻ താരങ്ങൾ അണിനിരക്കുന്ന പ്രദർശന മത്സരവും സംഘടിപ്പിക്കും. സംസ്ഥാന കായിക മന്ത്രാലയം, കാലിക്കറ്റ്​ സർവകലാശാല, കേരള ഫുട്​ബാൾ അസോസിയേഷൻ, നെഹ്​റു യുവകേന്ദ്ര എന്നിവയുടെ സഹകരണത്തോടെയാണ്​ പരിപാടി സംഘടിപ്പിക്കുന്നത്​. ലോകകപ്പ്​ സ്​റ്റേഡിയങ്ങൾ പരിചയപ്പെടുത്തുന്ന ഡോക്യുമെന്‍ററി പ്രദർശനവും നടത്തും.

ഇന്‍റർകോളജ്​ ക്വിസ്​ മത്സരത്തിൽ പ​ങ്കെടുക്കാൻ ആഗ്രഹിക്കുന്ന ടീമുകൾക്ക്​ പ്രിൻസിപ്പൽമാരുടെ സാക്ഷ്യപത്രം സഹിതം രജിസ്റ്റർ ചെയ്യാവുന്നതാണ്​. സർവകലാശാല അംഗീകൃത കോളജുകളിൽ നിന്നുള്ള ടീമുകൾക്ക്​ മാത്രമായിരിക്കും അനുവാദം. വിശദവിവരങ്ങൾക്ക്​ domqatarkickoff2022@gmail.com വഴി ബന്ധപ്പെടാം.

ലോകകപ്പ്​ പ്രചാരണങ്ങളുടെ ഭാഗമായി സെപ്​റ്റംബർ, ഒക്​ടോബർ മാസങ്ങളിൽ ഖത്തറിലും സ്കൂൾ വിദ്യാർഥികളെ പ​ങ്കെടുപ്പിച്ച്​ വിവിധ മത്സര പരിപാടികൾ ആസൂത്രണം ചെയ്തതായി ഡോം ഭാരവാഹികൾ അറിയിച്ചു. വാർത്ത സമ്മേളനത്തിൽ ഡോം ഖത്തർ പ്രസിഡന്‍റ്​ വി.സി. മഷ്​ഹൂദ്​, ജനറൽ സെക്രട്ടറി അബ്​ദുൽ അസീസ്​, ചീഫ്​ പേട്രൻ അച്ചു ഉള്ളാട്ടിൽ, ചീഫ്​ കോഓഡിനേറ്റർ ഉസ്മാൻ കല്ലൻ, ഡോം ഖത്തർ വനിതാഫ വിങ്​ കോഓഡിനേറ്റർ സൗമ്യ പ്രദീപ്​, സെക്രട്ടറി

രതീഷ്​ കക്കോവ്​ എന്നിവർ പ​ങ്കെടുത്തു.