ഉമ്മുൽ അമാദിലെ ലുലു ഹൈപ്പർമാർക്കറ്റ് ശൈഖ് ഫൈസൽ ഖലീഫ സുൽതാൻ ആൽഥാനി ഉദ്ഘാടനം ചെയ്യുന്നു. ലുലു ഗ്രൂപ്പ് ഇന്റർനാഷണൽ ചെയർമാനും മാനേജിങ് ഡയറക്ടറുമായ എം.എ യൂസുഫലി, ഇന്ത്യൻ അംബാസഡർ വിപുൽ, ശൈഖ് മുഹമ്മദ് ബിൻ അഹമ്മദ് ആൽഥാനി, ലുലു ഗ്രൂപ്പ് ഗ്ലോബൽ റിലേഷൻസ് ഡയറക്ടർ ഡോ. മുഹമ്മദ് അൽതാഫ് എന്നിവർ സമീപം
ദോഹ: പ്രമുഖ ഹൈപ്പർമാർക്കറ്റ് ശൃംഖലയായ ലുലു ഗ്രൂപ്പിന്റെ ഖത്തറിലെ 24ാമത് ഹൈപ്പർ മാർക്കറ്റ് ഉമ്മുൽ അമാദിലെ നോർത്ത് പ്ലാസ മാളിൽ പ്രൗഢഗംഭീരമായ ചടങ്ങിൽ പ്രവർത്തനമാരംഭിച്ചു.
ഖത്തറിലെ സ്വദേശികളും താമസക്കാരും ഉൾപ്പെടെ ഉപഭോക്താക്കൾക്ക് ഷോപ്പിങ്ങിന്റെ മറ്റൊരു ഉത്സവംകൂടി സമ്മാനിച്ചാണ് പ്രമുഖർ പങ്കെടുത്ത ചടങ്ങിൽ ആഗോളതലത്തിലെ 273ാമത്തേത് കൂടിയായ ഹൈപ്പർമാർക്കറ്റ് ഉദ്ഘാടനം ചെയ്തത്.
ലുലു ഗ്രൂപ് ഇന്റർനാഷനൽ ചെയർമാനും മാനേജിങ് ഡയറക്ടറുമായ എം.എ. യൂസുഫലിയുടെ സാന്നിധ്യത്തിൽ ഖത്തരി വ്യാപാര പ്രമുഖൻ ശൈഖ് ഫൈസൽ ഖലീഫ സുൽത്താൻ ആൽഥാനി ഉദ്ഘാടനം നിർവഹിച്ചു. ഇന്ത്യൻ അംബാസഡർ വിപുൽ, ശൈഖ് മുഹമ്മദ് ബിൻ അഹമ്മദ് ആൽഥാനി, ലുലു ഗ്രൂപ് ഗ്ലോബൽ റിലേഷൻസ് ഡയറക്ടർ ആൻഡ് സി.എസ്.ഒ ഡോ. മുഹമ്മദ് അൽതാഫ് ഉൾപ്പെടെ പ്രമുഖർ പങ്കെടുത്തു.
അമീർ ശൈഖ് തമീം ബിൻ ഹമദ് ആൽഥാനി ഉൾപ്പെടെ ഖത്തർ ഭരണകർത്താക്കളിൽനിന്നുള്ള പിന്തുണക്ക് ചെയർമാൻ എം.എ. യൂസുഫലി നന്ദി അറിയിച്ചു. ‘ലുലു ഗ്രൂപ്പിന്റെ ജൈത്രയാത്രയിലെ പുതിയ നാഴികക്കല്ലായി ഖത്തറിലെ 24ാമത്തെയും ലോകത്തെ 273ാമത്തെയും ഹൈപ്പർമാർക്കറ്റാണ് പ്രവർത്തനമാരംഭിക്കുന്നത്.
ഖത്തറിലെ ജനങ്ങളെ സേവിക്കാനും കരുത്തുറ്റ സമ്പദ്‌വ്യവസ്ഥയിലേക്ക് സംഭാവന നൽകാനും അനുവദിച്ച രാജ്യത്തെ വ്യാപാര സൗഹൃദ അന്തരീക്ഷത്തിന് ഞങ്ങൾ നന്ദിയുള്ളവരാണ് -അദ്ദേഹം പറഞ്ഞു.
ലോകോത്തര ഷോപ്പിങ് അനുഭവം, മികച്ച ഗുണനിലവാരമുള്ള ഉൽപന്നങ്ങളുടെ വിപുലമായ ശേഖരം, തുല്യതയില്ലാത്ത ഉപഭോക്തൃ സേവനം എന്നിവ നിലനിർത്തിക്കൊണ്ട് ലുലു പുതിയ കേന്ദ്രത്തിലേക്കും വ്യാപിക്കുന്നത്. 25,000 ചതുരശ്ര അടി വിശാലതയുള്ള ഹൈപ്പർമാർക്കറ്റ് ഉപഭോക്താക്കൾക്ക് മികച്ച ഷോപ്പിങ് അനുഭവം വാഗ്ദാനം ചെയ്യും.
ഗൾഫ് മേഖലയിൽ ഒരു ഇന്ത്യൻ സംരംഭകന്റെ വിജയകരമായ യാത്രക്ക് സാക്ഷ്യം വഹിക്കുന്നത് ഒരു ഇന്ത്യക്കാരൻ എന്നനിലയിൽ അഭിമാനകരമായ മുഹൂർത്തമാണെന്ന് ഇന്ത്യൻ അംബാസഡർ വിപുൽ പറഞ്ഞു.
പ്രാദേശികവും ലോകത്തിന്റെ വിവിധ ഭാഗങ്ങളിൽനിന്നുള്ളതുമായ പുത്തൻ ഉൽപന്നങ്ങളുടെ വിപുലമായ ശേഖരവുമായാണ് പുതിയ ഹൈപ്പർമാർക്കറ്റ് പ്രവർത്തനമാരംഭിച്ചത്. ഇൻ ഹൗസ് ബേക്കറി, സീറോ വേസ്റ്റ് റീഫിൽ സ്റ്റേഷൻ, ജനപ്രിയമായ പ്ലാനറ്റ് വൈ ഉൾപ്പെടെയുള്ള നൂതന ഷോപ്പിങ് അനുഭവങ്ങൾ വാഗ്ദാനം ചെയ്യുന്നു. വിശാലമായ പാർക്കിങ്, സെൽഫ് ചെക്ക്ഔട്ട്, പരിസ്ഥിതി സൗഹൃദ ഗ്രീൻ ചെക്ക്ഔട്ട് കൗണ്ടർ എന്നിവയും സവിശേഷതയാണ്.
ഭിന്നശേഷിക്കാർക്ക് സൗകര്യമൊരുക്കുന്ന വീൽചെയർ പ്രവേശനം, സീറ്റിങ്, ഗിഫ്റ്റ് സർവിസ്, പ്ലാസ്റ്റിക് ബോട്ടിലുകൾക്കുള്ള റിവേഴ്സ് വെൻഡിങ് മെഷീൻ എന്നിവയും വാഗ്ദാനം ചെയ്യുന്നു.
സീറോ വേസ്റ്റ് റീഫിൽ സ്റ്റേഷൻ, സസ്യാഹാര പ്രേമികളുടെ ‘പ്ലാനെറ്റ് വൈ’, ഓർഗാനിക്, കീറ്റോ-ഫ്രണ്ട്‌ലി, സൂപ്പർ ഫുഡ്‌സ്, ഗ്ലൂറ്റൻ ഫ്രീ, പ്രോട്ടീൻ, ഡെയറി ഫ്രീ, 100 കലോറിയിൽ താഴെ, പഞ്ചസാര ചേർക്കാത്ത ഉൽപന്നങ്ങൾ എന്നിവയുമെല്ലാം ചേരുന്നതാണ് ഷോപ്പിങ് അനുഭവം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.