കോരിച്ചൊരിഞ്ഞ മഴയിൽ കുളിച്ച്​ ജിദ്ദ; വ്യാഴാഴ്​ച രാത്രിയാണ്​ നഗരത്തിൽ കനത്ത മഴയുണ്ടായത്​

ജിദ്ദ: ജിദ്ദയിൽ വീണ്ടും കനത്ത മഴ. വ്യാഴാഴ്​ച രാത്രിയാണ്​ നഗരത്തിൽ ഇടിയോട്​ കൂടി മഴ കോരിച്ചൊരിഞ്ഞത്​. വൈകുന്നേരം മുതൽ മഴയുണ്ടാകുമെന്ന മുന്നറിയിപ്പ്​ വന്നിരുന്നുവെങ്കിലും രാത്രി പത്ത്​ മണിക്ക്​ ശേഷമാണ്​ മഴ തുടങ്ങിയത്​. നിർത്താതെ ഇടവിട്ട്​ പെയ്​ത മഴ ജിദ്ദ നഗരത്തിലെ പല താഴ്​ന്ന ഭാഗങ്ങളെയും വെള്ളത്തിലാഴ്​ത്തി. മുൻകരുതലായി പല റോഡുകളും അടച്ചു. മഴ കന​ത്തതോടെ സിവിൽ ഡിഫൻസ് മൊബൈൽ ഫോൺ വഴി സൈറൺ പോലെ അടിയന്തിര മുന്നറിയിപ്പ് ശബ്​ദസന്ദേശങ്ങൾ അയച്ചു. ജാഗ്രത പാലിക്കാനും സുരക്ഷിതമായ സ്ഥലത്ത് തുടരാനും സിവിൽ ഡിഫൻസ്​ സന്ദേശത്തിൽ ആവശ്യപ്പെട്ടു. വടക്ക്​ ഭാഗത്താണ്​ ആദ്യം മഴ തുടങ്ങിയത്​.

റോഡുകളിലുണ്ടായ വെള്ളക്കെട്ട്​ ഗതാഗതത്തെ ബാധിച്ചു. ചിലയിടങ്ങളിൽ വാഹനങ്ങൾ തകരാറിയായി. താമസകേന്ദ്രങ്ങളിൽ നിന്ന്​ പുറത്തുപോയ പലരും തിരിച്ചുവരാനാകെ വഴിയിൽ കുടുങ്ങി. വിമാനങ്ങളുടെ പോക്കുവരവുകളെയും മഴ ബാധിച്ചു. കനത്ത മഴയെ തുടർന്ന്​ ചില വിമാനങ്ങളുടെ പുറപ്പെടൽ വൈകിയതായി ജിദ്ദ വിമാനത്താവള ഓഫീസ്​ അറിയിച്ചു. പുതുക്കിയ വിമാന സമയം അറിയാൻ വിമാനകമ്പനികളുമായി ബന്ധപ്പെടാൻ യാത്രക്കാരോട് ആവശ്യപ്പെട്ടു.

ഏറ്റവും കൂടുതൽ മഴയുണ്ടായത്​ ബസാതീൻ ഡിസ്​ട്രിക്​റ്റിലാണ്​​. ബസാതീനിൽ രാത്രി 11 വരെ 44 മില്ലിമീറ്റർ മഴ ലഭിച്ചതായി കാലാവസ്ഥ നിരീക്ഷണ കേന്ദ്രം വക്താവ്​ ഹുസൈൻ ഖഹ്​താനി പറഞ്ഞു. മഴ തുടരുമെന്നും കാലാവസ്ഥ മാറ്റം മുഴുസമയം കേന്ദ്രം നിരീക്ഷിക്കുന്നുണ്ടെന്നും ബന്ധപ്പെട്ട വകുപ്പുകൾക്ക്​ അപ്പപ്പോൾ വിവരങ്ങൾ കൈമാറുന്നുണ്ടെന്നും വക്താവ്​ പറഞ്ഞു. മക്ക മേഖലയിൽ കനത്ത മഴയുണ്ടാകുമെന്ന്​ കാലാവസ്ഥ കേന്ദ്രം ഉച്ച മുതലേ മുന്നറിയിപ്പ്​ നൽകികൊണ്ടിരുന്നു. ഇതേ തുടർന്ന്​ ബന്ധപ്പെട്ട എല്ലാ വകുപ്പുകളും മുൻകരുതലെടുത്തിരുന്നു.

സിവിൽ ഡിഫൻസ് രക്ഷാപ്രവർത്തന ഉപകരണങ്ങൾ, ബോട്ടുകൾ, അഗ്നിശമന ഉപകരണങ്ങൾ എന്നിവ വെള്ളപൊക്ക സാധ്യതയുള്ള സ്ഥലങ്ങളിൽ നേരത്തെ വിന്യസിച്ചു. മക്ക, ജിദ്ദ എന്നിവിടങ്ങളിലെ സായാഹ്ന സ്​കൂളുകൾക്ക്​ വ്യാഴാഴ്​ച അവധി നൽകി. ജിദ്ദ, മക്ക, ഖുൻഫുദ, അലീത്​, ബഹ്​റ എന്നിവിടങ്ങളിൽ റോഡ്​ ഉപയോഗിക്കുന്നവരോട്​ വേണ്ട മുൻകരുതലെടുക്കാൻ റോഡ്​ സുരക്ഷ വിഭാഗം ആവശ്യപ്പെട്ടു. വ്യാഴാഴ്​ച വൈകീട്ട്​ മക്കയുടെ വിവിധ ഭാഗങ്ങളിലും മഴയുണ്ടായി. മുൻകരുതലെന്നോണം ത്വാഇഫിലെ അൽഹദാ റോഡും ഇരുഭാഗത്തേക്കും അടച്ചു.