റിയാദ്: അഞ്ചാം തവണയും സ്പാനിഷ് സൂപ്പർ കപ്പ് ഫുട്ബാൾ ടൂർണമെന്‍റിന് സൗദി അറേബ്യ ആതിഥേയത്വം വഹിക്കുമെന്ന് കായിക മന്ത്രാലയം അറിയിച്ചു. 2025 ജനുവരി എട്ട് മുതൽ 12 വരെ ജിദ്ദയിൽ അബ്ദുല്ല സ്പോർട്സ് സിറ്റി സ്റ്റേഡിയത്തിലാണ് മത്സരം. റയൽ മഡ്രിഡ്, ബാഴ്‌സലോണ, അത്‌ലറ്റിക് ബിൽബാവോ, റയൽ മല്ലോർക്കക്ക് എന്നീ നാല് ക്ലബുകൾ തമ്മിൽ മാറ്റുരക്കും. നോക്കൗട്ട് സമ്പ്രദായത്തിലാണ് മത്സരം. ജനുവരി എട്ട് (ബുധനാഴ്ച) വൈകീട്ട് റയൽ മഡ്രിഡും റയൽ മല്ലോർക്കയും ഏറ്റുമുട്ടും. ഒമ്പതിന് (വ്യാഴാഴ്ച) ബാഴ്‌സലോണ, അത്‌ലറ്റിക് ബിൽബാവോയെ നേരിടും.
പ്രാഥമിക റൗണ്ടിൽ വിജയിക്കുന്ന രണ്ട് ടീമുകൾ 12ന് (ഞായറാഴ്ച) വൈകീട്ട് ഫൈനലിൽ ഏറ്റുമുട്ടും. സ്പാനിഷ് സൂപ്പർ കപ്പിന്‍റെ നാല് പതിപ്പുകൾക്ക് സൗദി ആതിഥേയത്വം വഹിച്ചിട്ടുണ്ട്. 2020ൽ ജിദ്ദയിലായിരുന്നു ആദ്യ പതിപ്പ്. റയൽ മാഡ്രിഡ് എതിരാളികളായ അത്‌ലറ്റിക്കോ മാഡ്രിഡിനെ തോൽപ്പിച്ച് കിരീടം ചൂടി. 2022ൽ റിയാദിലായിരുന്നു മത്സരങ്ങൾ.
റയൽ മാഡ്രിഡിന് തന്നെയായിരുന്നു വിജയം. കഴിഞ്ഞ വർഷം നടന്ന മൂന്നാം പതിപ്പിൽ റയൽ മാഡ്രിഡിനെ പരാജയപ്പെടുത്തി ബാഴ്‌സലോണ സ്പാനിഷ് കിരീടം നേടി. ഈ വർഷം തുടക്കത്തിൽ റിയാദിൽ നടന്ന നാലാം പതിപ്പിൽ റയൽ മാഡ്രിഡ് കിരീടം തിരിച്ചുപിടിച്ചു. അഞ്ചാം തവണയിലെ കിരീടം ആർക്കെന്ന് ജിദ്ദ തീരുമാനിക്കും. സൗദി വിഷൻ 2030െൻറ ക്വാളിറ്റി ഓഫ് ലൈഫ് പ്രോഗ്രാമിന് കീഴിലാണ് സ്പാനിഷ് സൂപ്പർ കപ്പ് മത്സരങ്ങൾക്ക് സൗദി ആതിഥേയത്വം വഹിക്കുന്നത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.