വിസ്​മയം പകർന്ന്​ ദുബൈ എയർഷോ സമാപിച്ചു

ദുബൈ: അൽഭുതപ്പെടുത്തുന്ന ആകാശക്കാഴ്​ചകളും നൂതന സാ​േങ്കതിക വിദ്യകളും പരിചയപ്പെടുത്തിയ ദുബൈ എയർഷോക്ക്​ പരിസമാപ്​തി. കോവിഡാനന്തരം ലോകത്ത്​ നടന്ന ഏറ്റവും വലിയ വ്യോമയാന പ്രദർശനം വിവിധ രാജ്യങ്ങളിൽ നിന്നുള്ള ആയിരങ്ങളെ ആകർഷിച്ചു. ദുബൈ വേൾഡ്​ സെൻട്രലിലെ ആൽ മക്​തൂം അന്താരാഷ്​ട്ര വിമാനത്താവളത്തിൽ നടന്ന ആഗോള പ്രദർശനത്തിൽ യു.എ.ഇയിലെയും മറ്റു രാജ്യങ്ങളിലെയും വിവിധ കമ്പനികളും സർക്കാർ^അർധസർക്കാർ സ്​ഥാപനങ്ങളും ശതകോടികളുടെ കരാറുകളിൽ ഒപ്പിട്ടു. 148രാജ്യങ്ങളിൽ നിന്നായി 1200ലേറെ പ്രദർശകർ എത്തിച്ചേർന്ന മേളയിൽ 160ലേറെ പുത്തൻ വിമാനങ്ങൾ എത്തിയിരുന്നു​. വിവിധ രാജ്യങ്ങളിൽ നിന്ന്​ പ്രതിരോധ മന്ത്രിമാർ, ചീഫ്​ ഓഫ്​ സ്​റ്റാഫ്​ തുടങ്ങിയവർ ഷോയിൽ പങ്കാളികളായി.

ദുബൈ കിരീടാവകാശിയും എക്​സിക്യൂട്ടീവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂമാണ്​ 17ാമത്​ മേളയുടെ ഉദ്​ഘാടനം നിർവഹിച്ചത്​. വിവിധ ദിവസങ്ങളിലായി യു.എ.ഇ വൈസ്​ പ്രസിഡൻറും ​പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം, അബൂദബി കിരീടാവകാശിയും യു.എ.ഇ സായുധ സേനയുടെ ഡെപ്യൂട്ടി സുപ്രീം കമാൻഡറുമായ ശൈഖ്​ മുഹമ്മദ്​ ബിൻ സായിദ്​ ആൽ നഹ്​യാൻ പ്രദർശനം കാണാനെത്തി.

ലോകത്തെ ഏറ്റവും മികച്ച പോർവിമാനങ്ങളും ആഡംബര വിമാനങ്ങളും ഹെലികോപ്​ടറുകളും സൈനീക വിമാനങ്ങളും ​അടുത്ത്​ കാണാനും പ്രകടനങ്ങൾ ആസ്വദിക്കാനും നേരത്തെ രജിസ്​റ്റർ ചെയ്​ത 83,000പേരാണ്​ എത്തിയത്​. വ്യോമാഭ്യാസങ്ങളിൽ യു.എ.ഇ വ്യോമസേനയുടെ ഫുർസാൻ, റഷ്യൻ നൈറ്റ്​സ്​,സൗദി ഹോക്​സ്​, ഇന്ത്യയുടെ സൂര്യകിരണും വ്യോമസേനയുടെ സാരംഗും പങ്കാളിത്തം വഹിച്ചു. അടുത്ത തലമുറയിലെ സുഖോയ് യുദ്ധവിമാനങ്ങളുടെ ആദ്യ അന്താരാഷ്​ട്ര അരങ്ങേറ്റവും ദുബൈ എയർ ഷോയിൽ നടന്നു. ബോയിങ്​ 777X, ലിയോനാഡോ എ.ഡബ്ല്യൂ609 എന്നിവയുടെ അരങ്ങേറ്റത്തിനും വേദിയായി. ​ ദിവസവുമുള്ള വ്യേമാഭ്യാസങ്ങൾ വീക്ഷിക്കാൻ പൊതുജനങ്ങൾക്കായി ഒരുക്കിയ സൗകര്യമായ സ്​കൈവ്യൂ ഗ്രാൻഡ്​സ്​റ്റാൻഡിൽ നിരവധി പേരാണ്​ എത്തിയത്​.

1989ലാണ്​ ദുബൈ എയർഷോയുടെ ആദ്യ എഡിഷൻ നടന്നത്​. രണ്ട്​ വർഷത്തിലൊരിക്കലാണ്​ മേള നടക്കുന്നത്​. ഓരോവർഷവും 100 ബില്യൺ ഡോളറിലേറെ മൂല്യമുള്ള കരാറുകൾ ഒപ്പുവെക്കാറുണ്ട്​.