കോൺഗ്രസ്​ മുഖ്യമന്ത്രി പദം വാഗ്​ദാനം ചെയ്​തിരുന്നു– ശങ്കർ സിങ്​ വഗേല

​വഡോദര: പാർട്ടിയിലേക്ക്​ തിരിച്ചുവന്നാൽ മുഖ്യമന്ത്രി പദം നൽകാമെന്ന്​​ കോൺഗ്രസ്​ വാഗ്​ദാനം നൽകിയിരുന്നുവെന്ന്​ മുതിർന്ന നേതാവ്​ ശങ്കർ സിങ്​ വഗേല. കഴിഞ്ഞ ജൂലൈയിലാണ്​ വഗേല കോൺഗ്രസ്​ വിട്ടത്​. അടുത്ത തെരഞ്ഞെടുപ്പിൽ കോൺഗ്രസ്​ അധികാരത്തിൽ വരികയാണെങ്കിൽ ഗുജറാത്ത്​ മുഖ്യമന്ത്രി പദവി നൽകുമെന്നാണ്​ പാർട്ടിയിലെ മുതിർന്ന നേതാക്കൾ ഉറപ്പു നൽകിയത്​. 

രാഷ്​ട്രീയ പാർട്ടികളുടെ അത്യാർത്തിയും പാർട്ടി പ്രവർത്തകരുടെ ചൂഷണവുമാണ്​ പുതിയ മുന്നണിയായ ‘ജന വികൽപ്​’ രൂപീകരിക്കാൻ തന്നെ പ്രേരിപ്പിച്ചത്​. ഇത്​ സത്യവും കാപട്യവും തമ്മിലുള്ള പോരാട്ടമാണ്​. ജനങ്ങളുടെ പോരാട്ടമാണ്​. ബി.ജെ.പിയിലും കോൺഗ്രസിലുമായി 50 വർഷത്തെ പൊതുജീവിതം നയിച്ച വ്യക്തിയാണ്​ താൻ. 
കോൺഗ്രസുമായി തനിക്ക്​ യാതൊരു തരത്തിലുള്ള വ്യക്തി വിദ്വേഷവുമില്ല, അതുകൊണ്ടു തന്നെയാണ്​ അടുത്ത തവണ കോൺഗ്രസ്​ സർക്കാർ അധികാരത്തിലെത്തു​േമ്പാൾ മുഖ്യമന്ത്രി പദം വാഗ്​ദാനം ചെയ്​തത്​. എന്നാൽ അതിനു പിറകിലും അത്യാഗ്രഹം തന്നെയാണ്​. അതിലേക്ക്​ തന്നെ പേര്​ വലിച്ചിഴക്കാൻ താൽപര്യമില്ല. ഹൈകമാൻഡ്​ സ്​ത്രീകളെ ചൂഷണം ചെയ്യുകയും കഴിവില്ലാത്ത പ്രവർത്തകർ നേതാക്കളെ പുകഴ്​ത്തി സ്ഥാനങ്ങൾ നേടുകയും ചെയ്യുന്നു. പാർട്ടിയിലെ ടിക്കറ്റ്​ വിതരണം കളിയാണ്​. ടിക്കറ്റ്​ വിതരണത്തിൽ പാർട്ടികളി​ൽ ജനാധിപത്യമോ സുതാര്യതയോയില്ലെന്നും വഗേല കുറ്റപ്പെടുത്തി. 

പ്രവർത്തകരെല്ലാം നേതാക്കൾക്കു മുന്നിൽ കീഴടങ്ങണം. അതുകൊണ്ടാണ്​ തനിക്ക്​ സ്വന്തമായൊരു നിലപാട്​ എടുക്കേണ്ടി വന്നത്​. സംസ്ഥാനത്ത്​ പ്രളയമുണ്ടായപ്പോൾ കോൺഗ്രസ്​ എം.എൽ.എമാർ ബംഗളൂരുവിലായിരുന്നു. താൻ ആ സമയം പ്രളയ ബാധിത പ്രദേശമായ ബനാസ്​​കാന്തയിലായിരുന്നുവെന്നും വഗേല പറഞ്ഞു.