ന്യൂഡൽഹി: അദാനിക്കെതിരായ ചർച്ചയുടെ കാര്യത്തിൽ ഇൻഡ്യ സഖ്യത്തിൽതന്നെ ഭിന്നത ശക്തമാകുകയും ഭരണഘടന ചർച്ച ചെയ്യാൻ ഇൻഡ്യയും എൻ.ഡി.എയും സമവായത്തിലെത്തുകയും ചെയ്തതോടെ ഒരാഴ്ചയിലേറെ നീണ്ട പാർലമെന്റ് സ്തംഭനം നീങ്ങാൻ വഴിയൊരുങ്ങി.
തിങ്കളാഴ്ചയും ഇരുസഭകളും സ്തംഭിച്ചിരുന്നു. ഇതിനു ശേഷമാണ് ഇൻഡ്യ നേതാക്കൾക്കും കേന്ദ്ര സർക്കാറിനും സ്പീക്കർക്കുമിടയിൽ നടന്ന മാരത്തൺ ചർച്ച ഫലം കണ്ടത്. ഭരണഘടനയുടെ 75ാം വാർഷികത്തോടനുബന്ധിച്ച് ലോക്സഭയിൽ ഡിസംബർ 13, 14 തീയതികളിലും രാജ്യസഭയിൽ 16നും 17നും ചർച്ച നടക്കും. ഭരണഘടനാ ചർച്ചക്ക് തീയതി പ്രഖ്യാപിച്ചതോടെ ചൊവ്വാഴ്ച മുതൽ പാർലമെന്റ് നടത്തിപ്പുമായി സഹകരിക്കാമെന്ന് തിങ്കളാഴ്ച ഉച്ചക്ക് ഒന്നിന് സ്പീക്കർ ഓം ബിർല വിളിച്ചുചേർത്ത സഭാനേതാക്കളുടെ യോഗത്തിൽ പ്രതിപക്ഷ നേതാക്കൾ വ്യക്തമാക്കി.
ഇൻഡ്യ നേതാക്കളായ കെ.സി. വേണുഗോപാൽ, ഗൗരവ് ഗോഗോയ്, ധർമേന്ദ്ര യാദവ്, സുദീപ് ബന്ദോപാധ്യായ, ടി.ആർ. ബാലു തുടങ്ങിയവർ രാവിലെ സ്പീക്കറെ കണ്ട് ഭരണഘടനാ ചർച്ചക്ക് തിയതി പ്രഖ്യാപിച്ചാൽ സഭാ നടത്തിപ്പുമായി സഹകരിക്കാമെന്ന് അറിയിക്കുകയായിരുന്നു. തുടർന്ന് സർക്കാറും പ്രതിപക്ഷവും നടത്തിയ ചർച്ചയിൽ 13, 14 തീയതികളിൽ ലോക്സഭയിൽ ചർച്ച നടത്താൻ ധാരണയായി. ഇതിനു ശേഷം സ്പീക്കർ വിളിച്ചുചേർത്ത സഭാ നേതാക്കളുടെ യോഗത്തിൽ പാർലമെന്ററി കാര്യ മന്ത്രി കിരൺ റിജിജു തീയതി പ്രഖ്യാപിച്ചതോടെയാണ് ഭരണ - പ്രതിപക്ഷ നേതാക്കൾ സഭാ സ്തംഭനം നീക്കാൻ സമവായത്തിലെത്തിയത്.
ഭരണഘടനാ ചർച്ച നടത്താൻ വെള്ളിയാഴ്ച ഇൻഡ്യയും എൻ.ഡി.എയും ധാരണയായിരുന്നു. ഭരണഘടന ചർച്ച നടത്തിയ ശേഷം ബില്ലുകൾ പാസാക്കിയാൽ മതിയെന്നായിരുന്നു കോൺഗ്രസ് മുന്നോട്ടുവെച്ച ഉപാധി. എന്നാൽ, ഇത് അംഗീകരിക്കാനോ പകരം തീയതി പ്രഖ്യാപിക്കാനോ സർക്കാർ തയാറായില്ല. ഇതോടെ ഇൻഡ്യ സഖ്യം തിങ്കളാഴ്ച തങ്ങളുടെ പഴയ വിഷയങ്ങൾ ആവർത്തിച്ച് ഇരുസഭകളും സ്തംഭിപ്പിച്ചു. ആദ്യം 12 വരെ നിർത്തിവെച്ചശേഷമാണ് ഇരുസഭകളും ചൊവ്വാഴ്ചത്തേക്ക് പിരിഞ്ഞത്.
ന്യൂഡൽഹി: അദാനിക്കെതിരായ നീക്കത്തിൽ കോൺഗ്രസിനെ മറ്റ് ഇൻഡ്യ സഖ്യകക്ഷികൾ കൈയൊഴിഞ്ഞതോടെ അജണ്ടകൾ മാറ്റിവെച്ച് അക്കാര്യം ചർച്ച ചെയ്യണമെന്ന ആവശ്യത്തിൽനിന്ന് അവർ പിന്മാറിയതാണ് ഭരണപക്ഷ- പ്രതിപക്ഷ സമവായത്തിലെത്തിച്ചത്.
ഗൗതം അദാനിയുടെയും പ്രധാനമന്ത്രി നരേന്ദ്ര മോദിയുടെയും ചങ്ങാത്ത മുതലാളിത്തത്തെ പ്രശ്നവത്കരിക്കുന്നതിൽ രാഹുൽ ഗാന്ധിക്കുള്ള താൽപര്യം ഇൻഡ്യസഖ്യത്തിലെ പല ഘടകകക്ഷികൾക്കുമില്ലായിരുന്നു. മറ്റ് അജണ്ടകൾ മാറ്റിവെച്ച് അദാനി വിഷയത്തിൽ അടിയന്തര ചർച്ച ആവശ്യപ്പെട്ട് നോട്ടീസ് നൽകാൻ കോൺഗ്രസ് എം.പിമാർ മാത്രമാണുണ്ടായിരുന്നത്. പാർലമെന്റ് സമ്മേളനത്തിന്റെ ഒന്നാം ദിവസംതന്നെ ഇൻഡ്യസഖ്യത്തിലെ മൂന്നാമത്തെ വലിയ കക്ഷിയായ തൃണമൂൽ കോൺഗ്രസ് അദാനി വിഷയം ഏറ്റെടുത്തില്ലെന്ന് മാത്രമല്ല, ഇതുന്നയിച്ച് സഭ സ്തംഭിപ്പിക്കുന്നതിനെ പരസ്യമായി എതിർക്കുകയും ചെയ്തു. സഖ്യത്തിലെ രണ്ടാമത്തെ വലിയ കക്ഷികളായ സമാജ്‍വാദി പാർട്ടി ആദ്യദിനം മുതൽ തിങ്കളാഴ്ച വരെയും ഇരുസഭകളും സ്തംഭിപ്പിക്കാൻ ഇറങ്ങിയതും നോട്ടീസ് നൽകിയതും സംഭൽ വർഗീയ സംഘർഷം ചർച്ച ചെയ്യണമെന്നാവശ്യപ്പെട്ടായിരുന്നു.
മുസ്‍ലിം ലീഗിന്റെ നോട്ടീസും ആദ്യ ദിവസം തൊട്ട് സംഭലിനായിരുന്നു. ഡി.എം.കെ നേതാക്കൾ അദാനി വിഷയത്തിൽ അടിയന്തര നോട്ടീസ് നൽകാതെ ദിവസവും മണിപ്പുർ കലാപത്തിൽ മാത്രമാണ് നോട്ടീസ് നൽകിയത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.