അസമത്വത്തിന്‍റെ വൈറസ്; ലോക്​ഡൗൺ വരുമാന അസമത്വം വർധിപ്പിച്ചെന്ന്​

ന്യൂഡ​ൽഹി: കോവിഡ്​ 19നെ തുടർന്ന്​ രാജ്യത്ത്​ ഏർപ്പെടുത്തിയ ലോക്​ഡൗൺ വരുമാന അസമത്വം വർധിപ്പിച്ചുവെന്ന്​ പഠനം. സമ്പന്നരെ അതിസമ്പന്നരാക്കുകയും അഭ്യസ്​ഥ വിദ്യരായ നിരവധി പേർക്ക്​ തൊഴിൽ നഷ്​ടമാകുകയും സ്​ത്രീ -പുരുഷ എന്നിവരുടെ വരുമാന അസമത്വം വർധിപ്പിച്ചുവെന്നും ലാഭേച്ഛയില്ലാതെ പ്രവർത്തിക്കുന്ന സംഘടനയായ ഓക്​സ്​ഫാം സ്വിറ്റ്​സർലൻഡിലെ ദാവോസിലെ വേൾഡ്​ ഇക്കണോമിക്​ ഫോറത്തിന്​ മുമ്പി​ൽവെച്ച റി​േപ്പാർട്ടിൽ പറയുന്നു.

'അസമത്വത്തിന്‍റെ വൈറസ്​' എന്ന് പേരിട്ടിരിക്കുന്ന റിപ്പോർട്ടിൽ രാജ്യത്തെ ശതകോടീശ്വരൻമാരുടെ സ്വത്ത്​ 35 ശതമാനം വർധിച്ചതായി പറയുന്നു. 84 ശതമാനം പേരുടെ വരുമാനത്തിൽ ഇടിവുണ്ടായി. 2020 ഏപ്രിലിൽ മാത്രം ഒ​ാരോ മണിക്കൂറിലും1.7 ലക്ഷം പേർക്ക്​ തൊഴിൽ നഷ്​ടമായി.

മാർച്ച്​ 2020ൽ 100 ശതകോടീശ്വരൻമാരുടെ വരുമാനത്തിൽ വൻവർധനയുണ്ടായി. 'രാജ്യത്ത്​ അസമത്വം കടുത്തു. അവിദഗ്​ധ തൊഴിലാളി 10,000 വർഷം തൊഴിലെടുത്താലും ലഭിക്കാത്തത്​ മുകേഷ്​ അംബാനി ഒരു മണിക്കൂർകൊണ്ട്​ സ്വന്തമാക്കി. അംബാനി മൂന്നുവർഷംകൊണ്ട്​ സമ്പാദിച്ചിരുന്നത്​​ കോവിഡ്​ ലോക്​ഡൗണിൽ ഒരു സെക്കൻഡിൽ സ്വന്തമാക്കി' -റിപ്പോർട്ടിൽ പറയുന്നു. കഴിഞ്ഞ ആഗസ്റ്ററിൽ ലോകത്തിലെ നാലാമത്തെ ധനികനായി മുകേഷ്​ അംബാനി മാറിയിരുന്നു.

തൊഴിലും പണവും ഭക്ഷണവും താമസവുമില്ലാതെ ലക്ഷക്കണക്കിന്​ ​കുടിയേറ്റ തൊഴിലാളികൾ സ്വന്തം നാട്ടിലേക്ക്​ മടങ്ങി. ആയിരത്തോളം കിലോമീറ്ററുകൾ നടന്നായിരുന്നു സ്​ത്രീകളും കുട്ടികളുമടങ്ങുന്ന പലായനം. നിരവധിപേർ ഈ യാത്രക്കിടെ മരിച്ചു.

ലോക്​ഡൗൺ ആഘാതത്തെ തുടർന്ന്​ പ്രഖ്യാപിച്ച ആത്മനിർഭർ പാക്കേജിനെ സംബന്ധിച്ചും റി​േപ്പാർട്ടിൽ പരാമർശിക്കുന്നുണ്ട്​.

കോവിഡ്​ മാനദണ്ഡങ്ങൾ പാലിക്കാൻ പോലും സാധിക്കാത്ത നിരവധി പേർ രാജ്യത്തുണ്ട്​. ഇതിൽ 30 ശതമാനത്തിലധികം പേർ സാമൂഹിക അകലം പോലും പാലിക്കാൻ സാധിക്കാതെ ഒറ്റമുറിയിൽ ജീവിക്കുന്നുണ്ടെന്നും പറയുന്നു.