വാഷിങ്ടൺ ഡി.സി: സ്നേഹം, ബഹുമാനം, വിനയം എന്നിവ ഇന്ത്യൻ രാഷ്ട്രീയത്തിൽ കാണാനില്ലെന്ന് കോൺഗ്രസ് നേതാവും പാർലമെന്റിലെ പ്രതിപക്ഷ നേതാവുമായ രാഹുൽ ഗാന്ധി. ഇന്ത്യ എന്നത് ഒരൊറ്റ ആശയമാണെന്ന് വിശ്വസിക്കുന്നവരാണ് ആർ.എസ്.എസ്സെന്നും രാഹുൽ പറഞ്ഞു. അമേരിക്കയിലെ ടെക്സസിൽ ഇന്ത്യൻ സമൂഹത്തോട് സംസാരിക്കുകയായിരുന്നു രാഹുൽ.
'ഇന്ത്യ ഒരൊറ്റ ആശയമാണെന്ന് ആർ.എസ്.എസ് വിശ്വസിക്കുന്നു. അതേസമയം, ഇന്ത്യ എന്നത് ബഹുവിധ ആശയങ്ങളുടെ ഒരു കൂട്ടായ്മയാണെന്ന് ഞങ്ങൾ വിശ്വസിക്കുന്നു. യു.എസിലേതുപോലെ, എല്ലാവർക്കും എല്ലാറ്റിലും ഭാഗവാക്കാവാൻ കഴിയണമെന്ന് ഞങ്ങൾ കരുതുന്നു. എല്ലാവർക്കും ഇടം അനുവദിക്കണം, എല്ലാവർക്കും സ്വപ്നം കാണാനാകണം, അവരുടെ ജാതിയോ ഭാഷയോ മതമോ പാരമ്പര്യമോ ചരിത്രമോ അതിനൊരു തടസ്സമാകരുത്. സംസ്ഥാനങ്ങളുടെ കൂട്ടായ്മ എന്ന നിലക്ക്, വിവിധ ഭാഷകളോടുള്ള ബഹുമാനം, മതങ്ങളോടും ആചാരങ്ങളോടും ജാതിയോടുമുള്ള ബഹുമാനം എന്നിവയെല്ലാം ഭരണഘടനയിലുണ്ട്' -രാഹുൽ പറഞ്ഞു.
ഇന്ത്യയിലെ രാഷ്ട്രീയ സംവിധാനത്തിലും പാർട്ടികളിലും സ്നേഹം, ബഹുമാനം, വിനയം എന്നിവ നഷ്ടപ്പെട്ടതായാണ് ഞാൻ കരുതുന്നത്. എല്ലാ മനുഷ്യരോടും സ്നേഹം വേണം. അത് ഏതെങ്കിലുമൊരു മതത്തിലെയോ ജാതിയിലേയോ സംസ്ഥാനത്തെയോ ഒരു ഭാഷ സംസാരിക്കുന്ന ജനങ്ങളോടോ മാത്രമായി മാറരുത്. രാജ്യത്തെ കെട്ടിപ്പടുക്കുന്ന എല്ലാവരോടും ബഹുമാനം വേണം. അത് ഏറ്റവും ശക്തരായവരോട് മാത്രമാകരുത്. ഏറ്റവും ദുർബലരായവരോടും വേണം. വിനയം മറ്റുള്ളവരിൽ മാത്രമല്ല, നമ്മളിലും ഉണ്ടാകണം. അങ്ങനെയാണ് ഞാൻ എന്നെത്തന്നെ കാണുന്നത് -രാഹുൽ പറഞ്ഞു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.