ഭുവനേശ്വർ:പൊലീസ് കസ്റ്റഡിയിലെ ലൈംഗികാതിക്രമക്കേസിൽ ജുഡീഷ്യൽ അന്വേഷണത്തിന് സംസ്ഥാന സർക്കാർ ഉത്തരവിട്ടതിന് തൊട്ടുപിന്നാലെ സൈനിക ഉദ്യോഗസ്ഥനും പ്രതിശ്രുത വധുവും ഒഡീഷ മുഖ്യമന്ത്രി മോഹൻ ചരൺ മാജിയെ കണ്ടു. തിങ്കളാഴ്ച രാവിലെ സംസ്ഥാന സെക്രട്ടേറിയറ്റിലാണ് യുവതിയുടെ പിതാവും പങ്കെടുത്ത കൂടിക്കാഴ്ച നടന്നത്.
‘ഞങ്ങൾ ഒഡീഷ സർക്കാറിനോട് ജുഡീഷ്യൽ അന്വേഷണത്തിന് ആവശ്യപ്പെട്ടിരുന്നു. അത് സമ്മതിച്ചു. തീരുമാനത്തെ ഞങ്ങൾ സ്വാഗതം ചെയ്യുന്നു. ഇതിന് മുഖ്യമന്ത്രിയോട് നന്ദി പറയുന്നു’-മാജിയെ കണ്ടതിനുശേഷം മാധ്യമപ്രവർത്തകരോട് സംസാരിച്ച യുവതിയുടെ പിതാവ് പറഞ്ഞു. സെക്രട്ടേറിയറ്റിൽ നടന്ന യോഗത്തിൽ ഉപമുഖ്യമന്ത്രി കെ.വി സിംഗ് ദിയോ, റവന്യൂ മന്ത്രി സുരേഷ് പൂജാരി എന്നിവർക്കൊപ്പം വിരമിച്ച ഏതാനും സൈനിക ഉദ്യോഗസ്ഥരും പങ്കെടുത്തു.
ഭരത്പൂർ പോലീസ് സ്റ്റേഷനിൽ സൈനിക ഉദ്യോഗസ്ഥനെ പീഡിപ്പിക്കുകയും പ്രതിശ്രുത വധുവിനെ ലൈംഗികമായി ആക്രമിക്കുകയും ചെയ്ത സംഭവത്തിൽ മാജി ജുഡീഷ്യൽ അന്വേഷണത്തിന് ഉത്തരവിട്ടിരുന്നു. ഒഡീഷ സർക്കാർ റിട്ടയേർഡ് ഹൈകോടതി ജഡ്ജിയായ ജസ്റ്റിസ് ചിത്തരഞ്ജൻ ദാഷിന്‍റെ നേതൃത്വത്തിൽ അന്വേഷണ കമ്മീഷനെ നിയോഗിച്ചതായി ഔദ്യോഗിക അറിയിപ്പിൽ പറഞ്ഞു. സംഭവങ്ങളുടെയും സാഹചര്യങ്ങളുടെയും ക്രമം, വ്യക്തികളുടെയും അധികാരികളുടെയും പങ്ക്, പെരുമാറ്റം, ഉത്തരവാദിത്തം എന്നിവ കമീഷൻ പരിശോധിക്കും. 60 ദിവസത്തിനകം റിപ്പോർട്ട് സമർപ്പിക്കും. ഭാവിയിൽ ഇത്തരം സംഭവങ്ങൾ ആവർത്തിക്കാതിരിക്കാനും സ്ത്രീകളുടെ സുരക്ഷയും സുരക്ഷയും ഉറപ്പാക്കാനും സ്വീകരിക്കേണ്ട നടപടികൾ കമ്മീഷൻ നിർദേശിക്കുമെന്നും അറിയിപ്പിൽ പറയുന്നു.
കുറ്റക്കാരാണെന്ന് കണ്ടെത്തിയ എല്ലാ വ്യക്തികൾക്കും ഉദ്യോഗസ്ഥർക്കും എതിരെ കർശന നടപടിയെടുക്കാൻ ഒഡിഷ സർക്കാർ പ്രതിജ്ഞാബദ്ധമാണെന്ന് മുഖ്യമന്ത്രി ഞായറാഴ്ച വൈകുന്നേരം പ്രസ്താവനയിൽ പറഞ്ഞിരുന്നു. ഒഡീഷ പൊലീസിലെ ക്രൈംബ്രാഞ്ച് നടത്തുന്ന അന്വേഷണത്തിന് മേൽനോട്ടം വഹിക്കാനും സംസ്ഥാന സർക്കാർ ഹൈകോടതിയോട് അഭ്യർഥിച്ചു. ഹൈകോടതിയുടെ മേൽനോട്ടത്തിൽ സ്വതന്ത്ര അന്വേഷണവും നടത്തും.
സംഭവത്തിൽ ഭരത്പൂർ പൊലീസ് സ്റ്റേഷനിലെ അഞ്ച് ഉദ്യോഗസ്ഥരെ ഒഡീഷ സർക്കാർ സസ്പെൻഡ് ചെയ്യുകയും അവർക്കെതിരെ കേസ് രജിസ്റ്റർ ചെയ്യുകയും ചെയ്തു. പശ്ചിമ ബംഗാളിൽ നിയമിതനായ സൈനിക ഉദ്യോഗസ്ഥനും പ്രതിശ്രുത വധുവും സെപ്തംബർ 15 ന് ഭരത്പൂർ പോലീസ് സ്റ്റേഷനിൽ പരാതിപ്പെടാൻ എത്തിയപ്പോഴായിരുന്നു അതിക്രമം. പ്രദേശത്തെ ചില യുവാക്കൾ തങ്ങളെ വാഹനത്തിൽ പിന്തുടർന്ന് മർദിച്ചതായി ആരോപിച്ച് പൊലീസ് സംരക്ഷണമാവശ്യപ്പെട്ടും പരാതി നൽകാനും എത്തിയതായിരുന്നു ഇരുവരും. എന്നാൽ, പോലീസ് സ്റ്റേഷനിൽ വെച്ച് സൈനിക ഉദ്യോഗസ്ഥനും പ്രതിശ്രുത വധുവും ക്രൂരമായി ആക്രമിക്കപ്പെട്ടു. താടിയെല്ലിന് സ്ഥാനഭ്രംശം അടക്കം നിരവധി പരിക്കുകൾ ഏറ്റ യുവതിക്ക് എയിംസിൽ ചികിൽസ തേടേണ്ടിവന്നു.
സംസ്ഥാനം ഭരിക്കുന്ന ബി.ജെ.പിക്കെതിരെ രൂക്ഷ വിമർശനവുമായി പ്രതിപക്ഷം രംഗത്തുവന്നതോടെയാണ് അധികൃതർ ഉണർന്നത്. കോടതിയുടെ മേൽനോട്ടത്തിൽ എസ്.ഐ.ടി അന്വേഷണവും ജുഡീഷ്യൽ അന്വേഷണവും വേണമെന്ന് ബി.ജെ.ഡി പ്രസിഡന്‍റും പ്രതിപക്ഷ നേതാവുമായ നവീൻ പട്നായിക് ആവശ്യപ്പെട്ടിരുന്നു. സർക്കാർ ജുഡീഷ്യൽ അന്വേഷണത്തിന് ഉത്തരവിട്ടതിനെത്തുടർന്ന് പ്രതിപക്ഷം ചൊവ്വാഴ്ച ആഹ്വാനം ചെയ്ത ഭുവനേശ്വർ ബന്ദ് പിൻവലിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.