ഭോപാൽ: തട്ടിക്കൊണ്ടുപോയ പെൺകുഞ്ഞിനായി എക്സ്പ്രസ് ട്രെയിൻ നിർത്താതെ ഒാടിയത് 200 കിലോമീറ്ററിൽ അധികം. ലലിത്പുർ റെയിൽവേ സ്റ്റേഷൻ മുതൽ ഭോപാൽ വരെയാണ് ട്രെയിൻ ഒാടിയത്. ഭോപാൽ റെയിൽവേ സ്റ്റേഷനിൽ കാത്തുനിന്ന പൊലീസ് കുഞ്ഞിനെ കണ്ടെത്തുകയും തട്ടികൊണ്ടുപോയയാളെ കസ്റ്റഡിയിലെടുക്കുകയും ചെയ്തു. എന്നാൽ പെൺകുഞ്ഞിനെ കൊണ്ടുപോയത് സ്വന്തം പിതാവ് തന്നെയാണെന്ന് മനസിലായതോടെ പൊലീസ് ഞെട്ടി.
കുട്ടിയുടെ മാതാപിതാക്കൾ തമ്മിലുണ്ടായ വഴക്കാണ് തട്ടികൊണ്ടുപോകലിലും ട്രെയിൻ തടയലിലും കലാശിച്ചത്. ഭാര്യയും ഭർത്താവും വഴക്കിട്ടതോടെ തിങ്കളാഴ്ച വൈകിട്ട് മൂന്നുമണിയോടെ മൂന്നുവയസായ പെൺകുഞ്ഞിനെയും എടുത്ത് പിതാവ് വീടുവിട്ടിറങ്ങി. ലലിത്പുർ റെയിൽവേ സ്റ്റേഷന് സമീപമാണ് ദമ്പതികളുടെ വീട്. കുഞ്ഞിനെ കൊണ്ടുപോയത് പിതാവ് തന്നെയായിരുന്നുവെന്ന് മാതാവിന് അറിയാമായിരുന്നുവെന്ന് പൊലീസ് പറയുന്നു.
കുഞ്ഞിെൻറ അമ്മ ലലിത്പുർ സ്റ്റേഷനിലെത്തി കുഞ്ഞിനെ തട്ടിയെടുത്തശേഷം പ്രതി ട്രെയിനിൽ കയറി രക്ഷപ്പെട്ടതായി ഡ്യൂട്ടിയിലുണ്ടായിരുന്ന ആർ.പി.എഫ് ജവാൻമാരോട് പരാതി പറയുകയായിരുന്നു. സി.സി.ടി.വി ദൃശ്യങ്ങളിൽ ഒരാൾ കുഞ്ഞിനെയും എടുത്ത് രപ്തി സാഗർ സൂപ്പർഫാസ്റ്റ് ട്രെയിനിൽ കയറുന്നത് വ്യക്തമായി.
ഇതോടെ കുഞ്ഞിനെ രക്ഷപ്പെടുത്തുന്നതിനും തട്ടികൊണ്ടുപോയയാളെ പിടികൂടുന്നതിനും ഭോപാൽ സ്റ്റേഷനിൽ എത്തുന്നതുവരെ നിർത്തരുതെന്ന് കൺട്രോൾ റൂമിൽ വിളിച്ച് അറിയിക്കുകയുമായിരുന്നു. ഇതോടെ ട്രെയിൻ മറ്റെവിടെയും നിർത്താതെ 241 കിലോമീറ്റർ അകലെ ഭോപാലിൽ നിർത്തി. ഭോപാലിൽവെച്ച് പെൺകുഞ്ഞിനെ രക്ഷപ്പെടുത്തുകയും തട്ടികൊണ്ടുപോയയാളെ കസ്റ്റഡിയിൽ എടുക്കുകയും ചെയ്തു. തുടർന്ന് നടത്തിയ ചോദ്യം ചെയ്യലിൽ പെൺകുട്ടിയുടെ പിതാവ് ആണെന്ന് തെളിയുകയായിരുന്നു. ഇതോടെ പെൺകുഞ്ഞിനെയും പിതാവിനെയും ലലിത്പുരിൽ തിരികെ എത്തിച്ചു. തുടർന്ന് ഭാര്യയെയും ഭർത്താവിനെയും കൗൺസിലിങ്ങിന് വിധേയമാക്കുകയും ചെയ്തതായി പൊലീസ് പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.