കോതമംഗലം: വിദ്യാർഥികൾ കറങ്ങിയ തുറന്ന ജീപ്പ് സ്കൂട്ടർ യാത്രക്കാരിയെ ഇടിച്ചുവീഴ്ത്തി. ക്ഷുഭിതരായ നാട്ടുകാർ വാഹനം തള്ളി കനാലിലിട്ടു. കോതമംഗലം നെല്ലിക്കുഴിയിലാണ് സംഭവം. ഇന്ദിരാഗാന്ധി കോളജ് ദിനാഘോഷത്തോടനുബന്ധിച്ച് എട്ട് വിദ്യാർഥികളാണ് പകൽ മുഴുവൻ കോളജിന് സമീപത്തും കനാൽബണ്ട് റോഡുകളിലും തുറന്ന ജീപ്പിൽ കറങ്ങിയത്. സന്ധ്യയോടെ ജീപ്പ് നിയന്ത്രണംവിട്ട് സ്കൂട്ടർ യാത്രികയെ ഇടിച്ചുവീഴ്ത്തി. ഇതോടെ നാട്ടുകാർ ഇടപെടുകയും വിദ്യാർഥികളുമായി തർക്കമുണ്ടാകുകയും ചെയ്തു. ഈ സമയത്ത് ചിലർ ജീപ്പ് കനാലിലേക്ക് തള്ളിയിടുകയായിരുന്നു.
പരിക്കേറ്റ പെൺകുട്ടി ആശുപത്രിയിൽ ചികിത്സ തേടി. പൊലീസെത്തി ജീപ്പ് കരക്കെടുക്കാൻ ശ്രമിച്ചെങ്കിലും അപകടമുണ്ടാക്കിയവരെ പിടികൂടിയ ശേഷം മതിയെന്ന നിലപാടിൽ നാട്ടുകാർ ഉറച്ചുനിന്നു. രണ്ട് വിദ്യാർഥികളെ കസ്റ്റഡിയിൽ എടുത്തതോടെ രാത്രി വൈകി ക്രെയിൻ ഉപയോഗിച്ച് വാഹനം പുറത്തെടുത്തു. അറസ്റ്റിലായവരെ മനഃപൂർവമല്ലാത്ത നരഹത്യാശ്രമത്തിന് കേസെടുത്ത് കോടതിയിൽ ഹാജരാക്കി. മറ്റ് ആറു പേർക്കെതിരെയും കേസെടുത്തിട്ടുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.