സിൽവർ ലൈൻ കാസർകോട്​ ജില്ലയിൽ കവരുന്നത് ​ഏക്കർ കണക്കിന്​ കണ്ടൽക്കാടുകൾ

കാസർകോട്​: തിരുവനന്തപുരം- കാസർകോട്​ അർധ അതിവേഗ പാത സിൽവർ ലൈൻ പദ്ധതി ജില്ലയിൽ കവർന്നെടുക്കുന്നത്​ ഏക്കർ കണക്കിന്​ കണ്ടൽക്കാടുകൾ. ജില്ലയിൽ അവശേഷിക്കുന്ന കണ്ടൽച്ചെടികളിൽ ​നല്ലൊരുശതമാനവും പദ്ധതിയുടെ ഭാഗമായി ഇല്ലാതാവും. ചന്ദ്രഗിരി പുഴയോരത്തെ​ കീഴൂർ ഭാഗം, ജില്ലയുടെ അതിർത്തിപ്രദേശമായ ഒളവറപുഴയോരം, നൂമ്പിൽ പുഴയോരം എന്നിവിടങ്ങളിലായി ഏക്കർ കണക്കിന്​ കണ്ടൽക്കാടുകളും ചതുപ്പുനിലങ്ങളുമാണ്​ പദ്ധതിക്കായി ഏറ്റെടുക്കുന്നത്​. സാമൂഹികാഘാത പഠനത്തിനുശേഷമേ കൃത്യമായ കണക്ക്​ ലഭ്യമാകൂ.

ജില്ലയിൽ ഏറ്റവും മനോഹരമായ കണ്ടൽക്കാടുകൾ നിറഞ്ഞുനിൽക്കുന്ന പ്രദേശമാണ്​ ചന്ദ്രഗിരി പുഴയോരം. ചന്ദ്രഗിരി പുഴയുടെ കൈവഴിയിലെ കീഴൂർ ഭാഗത്ത്​ ദ്വീപ്​ ​പോലുള്ള മനോഹരമായ കണ്ടൽക്കാടാണ്​​ പദ്ധതിയുടെ ഭാഗമായി നഷ്​ടപ്പെടുന്നതിൽ ഏറ്റവും പ്രധാനം. സഞ്ചാരികൾക്ക്​ കൗതുകമുള്ള കണ്ടൽസമൃദ്ധമാണിവിടം. ഏകദേശം അഞ്ച്​ ഏക്കർ വിസ്​തൃതിയിൽ കണ്ടൽ നിറഞ്ഞുനിൽക്കുന്നതാണ്​ ഇവിടം. ഇൗ പ്രദേശത്തിന്​ മധ്യത്തിലൂടെയാണ്​ നിർദിഷ്​ട പാത കടന്നുപോകുന്നത്​. ചന്ദ്രഗിരി പുഴയോരത്ത്​ ഏറ്റവും മനോഹരമായ കാഴ്​ചാനുഭവം നൽകുന്നതാണ്​ ഇൗ കണ്ടൽക്കൂട്ടം. ഇതു കാണാൻ സഞ്ചാരികളും പ്രദേശത്ത്​ എത്താറുണ്ട്​. വർഷക്കാലത്ത്​ സമീപത്തെ വീടുകളിൽ വെള്ളം കയറുന്നത്​ തടഞ്ഞുനിർത്തുന്നതിൽ ഇൗ കണ്ടൽക്കാടുകൾക്ക്​ നിർണായക പങ്കുണ്ട്​. ​മൽസ്യമുൾ​െപ്പടെയുള്ള ജല ജീവികൾക്ക്​ സുരക്ഷിതമായി പ്രജനനം സാധ്യമാക്കുന്നത്​ ഇൗ കണ്ടൽചെടികൾക്കിടയിലാണ്​.

വിവിധ തരത്തിലുള്ള പക്ഷികളും ഇവിടെയുണ്ട്​. മണൽക്കടത്തുകൾ തോണി കൊണ്ടുപോകുന്നതിന്​ പലതവണ ഇവിടെ കണ്ടലുകൾ നശിപ്പിച്ചിട്ടുണ്ട്​. നാട്ടുകാരും പരിസ്​ഥിതി പ്രവർത്തകരുടെയും നിരന്തര സംരക്ഷണത്തിലാണ്​ കണ്ടൽചെടികൾ നിലനിൽക്കുന്നത്​. ആവാസ വ്യവസ്​ഥയിൽ ഏറ്റവും പ്രധാനപ്പെട്ട ഇൗ കണ്ടൽക്കാടുകളാണ്​​ സിൽവർ ലൈൻ പദ്ധതിയോടെ ഏറക്കുറെ പൂർണമായും ഇല്ലാതാവുക. ഒളവറ പുഴയോരത്ത്​ ഇത്രയില്ലെങ്കിലും ​കുറെ കണ്ടൽ ചെടികൾ വെട്ടിമാറ്റേണ്ടി വരും. നൂമ്പിൽ പുഴയോരത്ത്​ ഒരേക്കറിലധികം കണ്ടൽച്ചെടികളുണ്ട്​. നീളത്തിലാണ്​ ഇവിടെ കണ്ടലുകളുള്ളത്​.

കീഴൂർ ശാസ്​തക്ഷേത്രം, കീഴൂർ ശ്രീകളരിയമ്പല ക്ഷേത്രം എന്നിവയുടെ നല്ലൊരുശതമാനം ഭാഗവും സിൽവർ ലൈൻ പദ്ധതിക്കായി ഏറ്റെടുക്കേണ്ടി വരും. പ്രദേശത്തെ പ്രശ്​നങ്ങൾ ചർച്ച ചെയ്യുന്നതിന്​ ഇൗമാസം 26ന്​ യോഗം ചേരുമെന്ന്​ നാട്ടുകാർ പറഞ്ഞു.