കൊച്ചി: കാസർകോട്ടെ എൻഡോസൾഫാൻ ദുരിതബാധിതർക്കായി സത്യസായി ഓർഫനേജ് ട്രസ്റ്റ് നിർമിച്ച വീടുകളിൽ വൈദ്യുതി കണക്ഷനും വെള്ളവും ലഭ്യമാക്കണമെന്ന് ഹൈകോടതി. വീടുകൾക്ക് ഇതുവരെ വൈദ്യുതി -വാട്ടർ കണക്ഷനുകൾ ലഭിച്ചിട്ടില്ലെന്ന് ഹരജിക്കാർ ചൂണ്ടിക്കാട്ടിയതിനെ തുടർന്നാണ് ഇതിന് നടപടി സ്വീകരിക്കാൻ ജസ്റ്റിസ് ദേവൻ രാമചന്ദ്രൻ ജില്ല കലക്ടർക്ക് നിർദേശം നൽകിയത്. സർക്കാർ വീടുകൾ ഏറ്റെടുത്ത് കൈമാറാത്തതിനെതിരെ സത്യസായി ഓർഫനേജ് ട്രസ്റ്റ് നൽകിയ ഹരജിയാണ് കോടതിയുടെ പരിഗണനയിലുള്ളത്.
കൈമാറാനുള്ള 36 വീടുകൾ വൃത്തിയാക്കുന്ന ജോലി ആരംഭിച്ചെന്നും വീടുകളുടെ അറ്റകുറ്റപ്പണികൾക്ക് 24 ലക്ഷം രൂപ ചെലവുണ്ടെന്നും ഹരജിക്കാർ കോടതിയെ അറിയിച്ചു. കോടതി നിർദേശ പ്രകാരം ജില്ല കലക്ടർ കെ. ഇമ്പശേഖർ ബുധനാഴ്ചയും ഓൺലൈൻ മുഖേന കോടതിയിൽ ഹാജരായിരുന്നു.
വീടുകൾ കൈമാറാനുള്ള നടപടികൾ വ്യക്തമാക്കി കലക്ടറും ഹരജിക്കാരും റിപ്പോർട്ട് നൽകണമെന്ന് കോടതി നിർദേശിച്ചു. ഒക്ടോബർ 15 നകം വീടുകൾ കൈമാറണമെന്ന് കഴിഞ്ഞ തവണ ഹരജി പരിഗണിക്കവേ കോടതി നിർദേശിച്ചിരുന്നു. ഹരജി 16ന് വീണ്ടും പരിഗണിക്കും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.