റോഡരികിൽ അനധികൃത മദ്യവിൽപനയെന്ന്​ പരാതി

അഞ്ചൽ: തടിക്കാട്- കൊമ്പേറ്റിമല റോഡിൽ കണ്ണങ്കാവ്, കേഴമ്പള്ളി പ്രദേശത്ത് അനധികൃത മദ്യവിൽപനയും ബഹളവും വർധിച്ചുവരുന്നതായി പരാതി. ഇവിടെയുള്ള ഒന്നു രണ്ട് കച്ചവടസ്ഥാപനങ്ങൾ കേന്ദ്രീകരിച്ചാണ് മദ്യവിൽപന നടക്കുന്നത്. രാത്രി ഏറെ വൈകിയും ഇവിടെ മദ്യപരുടെ ബഹളമാണെന്നും പ്രതികരിക്കുന്നവരെ അസഭ്യം പറയുകയും ഭീഷണപ്പെടുത്തുകയുമാണെന്ന് നാട്ടുകാർ പരാതിപ്പെടുന്നു. തിട്ടക്കര, കൊമ്പേറ്റിമല ഭാഗങ്ങളിൽനിന്നുള്ള സ്ത്രീകളുൾപ്പെടെയുള്ള കാൽനടയാത്രികരെ അശ്ലീലച്ചുവയോടെ നോക്കുന്നതും പതിവാണ്. തന്മൂലം ഇതുവഴിയുള്ള കാൽനടയാത്ര പലരും ഒഴിവാക്കുകയാണ്. നേരത്തേ ഈ ഭാഗത്തുനിന്ന്​ പൊലീസും എക്സൈസും റെയ്ഡ് നടത്തി പലരെയും അറസ്റ്റ് ചെയ്തിട്ടുണ്ട്​.