ദുരിതാശ്വാസനിധി തട്ടിപ്പ്​: തുടർനടപടികൾക്ക്​ നിർദേശം നൽകിയെന്ന് മുഖ്യമന്ത്രി

തിരുവനന്തപുരം: മുഖ്യമന്ത്രിയുടെ ദുരിതാശ്വാസനിധി വിനി​യോഗവുമായി ബന്ധപ്പെട്ട്​ വിജിലൻസ്​ കണ്ടെത്തിയ തെറ്റായ പ്രവണതകളിൽ തുടർനടപടി കൈക്കൊള്ളാൻ നിർദേശം നൽകിയതായി മുഖ്യമന്ത്രി പിണറായി വിജയൻ. ചില അപേക്ഷകൾ പരിശോധിച്ച​പ്പോൾ സംശയം തോന്നി. അതിന്‍റെ അടിസ്ഥാനത്തിലാണ്​ പരിശോധിക്കാൻ വിജിലൻസ്​ ഡയറക്ടറോട്​ നിർദേശിച്ചത്​. അവർ നടത്തിയ പരിശോധനയിൽ ചില തെറ്റായ പ്രവണതകൾ കണ്ടെത്തി. ദുരിതാശ്വാസനിധി വിനിയോഗത്തിൽ ജനപ്രതിനിധികൾ അപകടംചെയ്​തെന്ന്​ കരുതുന്നില്ല. എന്നാൽ തട്ടിപ്പിനായി ചിലർ ശ്രമിച്ചു. അനർഹർക്ക്​ ധനം ലഭ്യമാക്കാൻ ശ്രമിച്ചവർക്കും കൂട്ടുനിന്നവർക്കുമെതിരെ ദാക്ഷിണ്യമില്ലാതെ നടപടി സ്വീകരിക്കുമെന്നും അദ്ദേഹം കൂട്ടിച്ചേർത്തു.

ദുരിതാശ്വാസനിധിയിൽനിന്ന്​ വേഗത്തിൽ സഹായം അനുവദിക്കുന്നതിന് ഓൺലൈൻ സംവിധാനം ഏർപ്പെടുത്തിയിട്ടുണ്ട്. സഹായധനം ഗുണഭോക്താവിന്റെ അക്കൗണ്ടിലേക്ക് നേരിട്ടാണ് കൈമാറുന്നത്. സങ്കീർണമായ നടപടിക്രമങ്ങൾ ലഘൂകരിച്ചും വിവിധതലങ്ങളിൽ അനുവദിക്കാവുന്ന സഹായത്തിന്റെ തുക ഉയർത്തിയും സഹായമെത്തിക്കാൻ കഴിയുന്നുണ്ട്.

സുതാര്യമായാണ്​ ദുരിതാശ്വാസനിധി കൈകാര്യംചെയ്യുന്നത്​. കൺട്രോളർ ആൻഡ്​​ ഓഡിറ്റർ ജനറലിന്‍റെ ഓഡിറ്റിനും ഇത്​ വിധേയമാക്കുന്നുണ്ട്. കേന്ദ്ര സർക്കാറിന്‍റെ ചില നിധി പോലെയല്ല ഇത്​. 2016 ജൂൺ മുതൽ ’21 മേയ്​ വരെ 6,82,569 അപേക്ഷകളിൽ 918.95 കോടി രൂപ അനുവദിച്ചു​. പ്രളയ ദുരിതാശ്വാസത്തിനായി 4970.29 കോടി രൂപ ലഭിച്ചതിൽ 4627.64 കോടി ചെലവാക്കി​. കോവിഡ്​ പ്രതിരോധ പ്രവർത്തനങ്ങൾക്കായി ലഭിച്ച 1029.01 കോടിയിൽ 1028.06 കോടി ചെലവഴിച്ചിട്ടുണ്ട്​. ഈ സർക്കാർ അധികാരത്തിൽ വന്നശേഷം കഴിഞ്ഞ ജനുവരി 31 വരെ 2,46,522 അപേക്ഷകളിൽ 462.62 കോടി അനുവദിച്ചെന്നും മുഖ്യമന്ത്രി നിയമസഭയിൽ പറഞ്ഞു.

മുഖ്യമന്ത്രിയുടെ ദുരിതാശ്വാസനിധിയിൽ ലക്ഷങ്ങൾ സംഭാവനചെയ്ത ആൾ വഞ്ചിക്കപ്പെട്ടെന്ന്​ മനസ്സിലാക്കിയപ്പോൾ പ്രകടിപ്പിച്ച രോഷം താനും കണ്ടു. പലതരത്തിലും പ്രശ്നങ്ങൾ വരാനുള്ള ഒരാളാണ്​. അതിനാൽ ആരെയെങ്കിലും സുഖിപ്പിക്കാൻ വേണ്ടി നടത്തിയ പ്രതികരണമായിരിക്കും അത്​. എൽ.ഡി.എഫിനെ വല്ലാതെ ആക്ഷേപിച്ചാൽ ചില കേന്ദ്രങ്ങളിൽ നിന്നും നല്ല പ്രതികരണമുണ്ടാകുമെന്ന്​ കരുതിയായിരിക്കും അതെന്നും മുഖ്യമന്ത്രി പരിഹസിച്ചു.