പുരോല ലവ് ജിഹാദ്​ കേസിന്റെ​ പിന്നിലെന്ത്​ ?

ഉത്തരാഖണ്ഡിലെ ഉത്തരകാശി ജില്ലയിലുള്ള പുരോല പട്ടണത്തിൽനിന്ന്​ മുസ്​ ലിം സമുദായക്കാർ ഒഴിഞ്ഞുപോകണമെന്നാവശ്യപ്പെട്ട്​ ഹിന്ദുത്വ സംഘങ്ങൾ കാമ്പയിൻ ആരംഭിച്ചത്​ ഒരു ലവ്ജിഹാദ്​ ആരോപണം മുന്നോട്ടുവെച്ചുകൊണ്ടാണ്​.

ഇക്കഴിഞ്ഞ മേയ്​ മാസം 26ന്​ പുരോലയിൽനിന്ന്​ 14 വയസ്സുള്ള പെൺകുട്ടിയെ തട്ടിക്കൊണ്ടുപോകാൻ ശ്രമിച്ചെന്ന കേസിൽ ഉബൈദ്​ ഖാൻ, ജിതേന്ദർ സൈനി എന്നീ ചെറുപ്പക്കാരെ പൊലീസ്​ അറസ്​റ്റ്​ ചെയ്​തിരുന്നു. ആരോപണവിധേയരിൽ ഒരാൾ ഹിന്ദു വിഭാഗത്തിൽപ്പെട്ട യുവാവാണെങ്കിലും ഹിന്ദുത്വ സംഘക്കാർ ഇതൊരു ലവ്ജിഹാദ് സംഭവമാണെന്നു​ വാദിച്ചു.

തുടർ ദിവസങ്ങളിൽ മുസ്​ ലിം കച്ചവടക്കാർ പട്ടണം വിടണമെന്നാവശ്യപ്പെട്ട്​ മുസ്​ ലിം വിരുദ്ധ പ്രകടനങ്ങളാരംഭിച്ചു, ലവ് ജിഹാദികൾ പട്ടണം വിട്ടുപോകൂ, അല്ലെങ്കിൽ പ്രത്യാഘാതങ്ങൾ നേരിടൂ എന്ന മുന്നറിയിപ്പ് നോട്ടീസ്​​​ ദേവഭൂമി രക്ഷാ അഭിയാൻ എന്ന സംഘടനയുടെ പേരിൽ കടകൾക്ക്​ മുന്നിൽ പതിച്ചു.

ആരോപിതരുടെ കുടുംബങ്ങൾ പറയുന്നത്

ഉബൈദ്​ ഖാനും ജിതേന്ദർ സൈനിയും ഇപ്പോൾ തെഹ്​രിഗഢ്​ വാളിലെ ജയിലിലാണ്​. ഇരുവരും നിരപരാധികളാണെന്നും ആ 14 കാരിയെ അറിയുകപോലുമില്ലെന്നുമാണ്​ ബന്ധുക്കൾ അവകാശപ്പെടുന്നത്​.

പുരോലയിലെ ഒരു വർക്​ ഷോപ്പിൽ മെക്കാനിക്കാണ്​ സൈനി. അതിന്​ സമീപത്തായി കുടുംബം നടത്തുന്ന ഫർണിച്ചർ ഷോപ്പിലാണ്​ ഉബൈദ്​ ഖാൻ ജോലി ചെയ്​തിരുന്നത്​. ഇരുവരുടെയും കുടുംബങ്ങൾ പടിഞ്ഞാറൻ യു.പിയിലെ ബിജ്​നോറിൽനിന്ന്​ കുടിയേറിയവരാണ്​.

ജയിലിൽ ചെന്ന്​ കണ്ടപ്പോൾ മകൻ പറഞ്ഞ കാര്യങ്ങൾ ജിതേന്ദറി​െൻറ പിതാവ്​ അത്തർ സൈനി വിവരിച്ചത്​ ഇങ്ങനെ:

‘അന്ന്​ ആ പെൺകുട്ടി ജിതേന്ദർ നിൽക്കുന്ന കടയിൽ വന്ന്​ ഒരു സ്​ഥലത്തേക്കുള്ള വഴി ചോദിച്ചു. ജിതേന്ദറും ഉബൈദും കൂടി ബസ്​ സ്​റ്റാൻറ്​ വരെ പെൺകുട്ടിയെ കൊണ്ടുവിട്ട്​ കടകളിലേക്ക്​ തിരിച്ചു വരുകയായിരുന്നു. തട്ടിക്കൊണ്ടുപോകലൊന്നും ഉണ്ടായി​ട്ടേയില്ല. ഹിന്ദു-മുസ്​ ലിം കലഹത്തി​െൻറ ഇടയിൽ കുരുങ്ങിപ്പോവുകയായിരുന്നു സൈനി’.

പെൺകുട്ടി​യെ അറിയില്ലെന്നും അവർ തമ്മിൽ ബന്ധമില്ലായിരുന്നെന്നുമാണ്​ ഉബൈദ്​ ഖാ​െൻറ മൂത്ത സഹോദരൻ അമീർ ഖാൻ പറയുന്നത്​.

പെൺകുട്ടിയെ ബസ്​ സ്​റ്റാൻഡിൽ കൊണ്ടുവിട്ട്​ ഉബൈദ്​ കടയിൽ തിരിച്ചെത്തി ഏതാനും സമയം കഴിഞ്ഞതും അമ്പതു പേരടങ്ങുന്ന സംഘം ഒരു ഹിന്ദുത്വ നേതാവി​െൻറ നേതൃത്വത്തിൽ കയറിവന്ന്​ ചോദ്യം ചെയ്യലാരംഭിച്ചു. അവർ ഉബൈദിനെ പിടിച്ചുവലിച്ച്​ പൊലീസ്​ സ്​റ്റേഷനിലേക്ക്​ കൊണ്ടുപോയി. അതിനു മുന്നിൽ അതിലും വലിയൊരു ജനക്കൂട്ടം തടിച്ചുകൂടിയിട്ടുണ്ടായിരുന്നു.

അൽപം കഴിഞ്ഞ്​ ജിതേന്ദർ സൈനിയെയും ചില ആളുകൾ ചേർന്ന്​ കൊണ്ടുവന്നു. ഉബൈദി​െൻറ പേരിൽ കേസെടുക്കണമെന്നും അവനെ അറസ്​റ്റ്​ ചെയ്യണമെന്നും ജനം പൊലീസിനുമേൽ സമ്മർദം ചെലുത്തുകയായിരുന്നു- അമീർ ഖാൻ പറയുന്നു.

ലക്ഷ്യം വർഗീയ മുതലെടുപ്പുമാത്രം

പെൺകുട്ടിയുടെ അമ്മാവനടക്കം പറയുന്നത്​ ലവ്ജിഹാദ്​ ആരോപണം പൊളളയാണെന്നാണ്​.​ തുടക്കം മുതലേ ഇതിനെയൊരു വർഗീയ വിഷയമാക്കി മാറ്റാൻ ശ്രമങ്ങൾ നടന്നതായി ഹിന്ദുസ്​ഥാൻ ടൈംസ്​ ദിനപത്രത്തിന്​ നൽകിയ അഭിമുഖത്തിൽ പെൺകുട്ടിയുടെ അമ്മാവൻ വ്യക്​തമാക്കുന്നു.

ഇതൊരു ലവ്ജിഹാദ്​ സംഭവമേയല്ല, പതിവ്​ കുറ്റകൃത്യമാണ്​. അതിലുൾപ്പെട്ടവർ ഇപ്പോൾ ജയിലിലുമായി. ഇനി നീതിപീഠമാണ്​ കാര്യങ്ങൾ തീരുമാനിക്കേണ്ടത്​. വലതുപക്ഷ സംഘടനാ പ്രവർത്തകർ ഒരു പരാതി തയാറാക്കി സമർപ്പിച്ചെങ്കിലും പൊലീസത്​ സ്വീകരിക്കാൻ കൂട്ടാക്കിയില്ലെന്ന്​ സ്​കൂൾ അധ്യാപകനായ ഇദ്ദേഹം പറയുന്നു.

ജിതന്ദേർ സൈനിയും അങ്കിത്​ എന്ന്​ പരിചയപ്പെടുത്തിയ ഉബൈദ്​ ഖാനും ചേർന്ന്​ പെൺകുട്ടിയെ പ്രലോഭിപ്പിച്ച്​ ഒരു പെ​ട്രോൾ പമ്പിൽ കൊണ്ടുപോയെന്നും ശേഷം ഒരു ടെ​േമ്പായിലേക്ക്​ കയറ്റാൻ ​ശ്രമിക്കുന്നതിനിടെ പ്രദേശവാസികളിൽ ചിലർ കണ്ട്​ ബഹളം വെക്കുകയായിരുന്നുവെന്നുമാണ്​ അമ്മാവൻ പൊലീസിൽ നൽകിയ പരാതിയിൽ ആരോപിക്കുന്നത്​.

തുടർന്ന്​ ആരോപിതർ രണ്ടുപേരും സംഭവസ്​ഥലത്ത്​ നിന്ന്​ രക്ഷപ്പെടുകയായിരുന്നു. പ്രായപൂർത്തിയാവാത്ത പെൺകുട്ടിയെ തട്ടിക്കൊണ്ടുപോയി എന്ന കുറ്റത്തിന്​ പോക്​സോ ഉൾപ്പെടെയുള്ള വകുപ്പുകളാണ്​ പ്രതികൾക്കുമേൽ ചുമത്തിയിരിക്കുന്നത്​.

പല ഹിന്ദുത്വ സംഘടനകളും അവർ നടത്തുന്ന പ്രക്ഷോഭത്തിൽ പങ്കാളിയാവാൻ ക്ഷണിച്ചെങ്കിലും താൻ വിസമ്മതിക്കുകയായിരുന്നുവെന്നും അവരുടെ ആവശ്യം വർഗീയ അസ്വാസ്​ഥ്യം സൃഷ്​ടിക്കുക മാത്രമാണെന്നും അമ്മാവൻ ഹിന്ദുസ്​ഥാൻ ടൈംസിനോട്​ വ്യക്​തമാക്കി.

ലവ് ജിഹാദല്ലെന്ന്​ പൊലീസും

ആളുകൾ വായിൽ തോന്നിയത്​ എന്തും പറയും, പക്ഷേ ഞങ്ങളുടെ ​അന്വേഷണത്തിൽ ഈ കേസ്​ ‘ലവ് ജിഹാദ്​’ആണെന്ന്​ കണ്ടെത്താനായിട്ടില്ല എന്നു പേര്​ വെളിപ്പെടുത്തരുത്​ എന്ന നിബന്ധനയോടെ കേസന്വേഷിക്കുന്ന ഉദ്യോഗസ്​ഥരിലൊരാൾ scroll.in നോട്​ വ്യക്​തമാക്കുന്നു.

പിടിയിലായ രണ്ടു പേർക്കും ഈ പെൺകുട്ടിയെ പരിചയമില്ല. മാർക്കറ്റിലെ ഒരു വിലാസമാണ്​ ആ കുട്ടി ഇവരോട്​ അന്വേഷിച്ചത്​. അവർ അവളെ ബസ്​ സ്​റ്റാൻഡിലേക്ക്​ കൊണ്ടുപോയി ഒരു ടെ​േമ്പായിൽ കയറ്റിയിരുത്താൻ ശ്രമിച്ചു, മുതലെടുപ്പ്​ നടത്തുകയായിരുന്നു അവരുടെ ലക്ഷ്യം- ഉദ്യോഗസ്​ഥൻ പറയുന്നു. എന്നാൽ, ആരോപണം രണ്ടു​ പ്രതികളും നിഷേധിച്ചു.

മാധ്യമപ്രവർത്തകന്റെ പങ്ക്​

ഈ സംഭവം ഒരു ലവ് ജിഹാദ്​ കേസാണെന്ന ആദ്യ പരാമർശം വന്നത്​ ഒരു പ്രാദേശിക വെബ്​സൈറ്റ്​ നൽകിയ വാർത്തയിലാണെന്ന്​ ദ മോണിങ്​ കോൺടെക്​സ്​റ്റ്​ റിപ്പോർട്ട്​ ചെയ്യുന്നു. ലവ് ജിഹാദ്​ ആരോപണവുമായി വെബ്​സൈറ്റിൽ വന്ന വാർത്ത പ്രാദേശിക വാട്ട്​സ്​ആപ്​ ഗ്രൂപ്പുകളിലൂടെ പ്രചരിച്ചതോടെ ഹിന്ദു കച്ചവടക്കാർ രോഷാകുലരായി രംഗത്തിറങ്ങുകയായിരുന്നു.

ഹിന്ദി ദിനപത്രമായ അമർ ഉജാലയുടെ ലേഖകൻ അനിൽ അസ്വാളാണ്​ ആ വെബ്​സൈറ്റിന്​ പിന്നിൽ. ഈ സംഭവം ‘ലവ് ജിഹാദ്’ തന്നെയെന്ന്​ അസ്വാൾ ദി മോർണിങ് കോൺടെക്‌സ്റ്റിനോട് പറഞ്ഞു, ഒരു വർഷമായി കുട്ടിയുമായി ‘അങ്കിത്​’ എന്ന പേരിൽ പയ്യൻ ചാറ്റ്​ ചെയ്യുന്നുണ്ട്​.

സൈനി ഹിന്ദുവാണോ എന്ന കാര്യത്തിൽ തനിക്ക് സംശയമുണ്ടെന്നും തിരിച്ചറിയപ്പെടാതിരിക്കാൻ വ്യാജ പേര് ഉപയോഗിക്കുകയാണെന്നും അയാൾ പറഞ്ഞു. എന്നാൽ, ഈ അവകാശവാദങ്ങൾക്ക് അസ്വാൾ തെളിവുകളൊന്നും നൽകിയില്ല.

അനന്തരവൾ ലവ് ജിഹാദിന്​ ഇരയായെന്ന് പെൺകുട്ടിയുടെ അമ്മാവനെക്കൊണ്ട്​ വ്യാജ ലവ്ജിഹാദ്​ പരാതി നൽകിക്കാൻ അസ്വാൾ ശ്രമിച്ചതായി newslaundry.com പ്രസിദ്ധീകരിച്ച റിപ്പോർട്ടിൽ പറയുന്നു. സ്​റ്റേഷനിൽ വെച്ച്​ അസ്വാൾ സമ്മർദം ചെലുത്തുന്നത്​ കണ്ട പുരോലയിലെ സ്​റ്റേഷൻ ഹൗസ്​ ഓഫിസർ ഖാജൻ സിങ്​ ചൗഹാനെ ഉദ്ധരിച്ചുകൊണ്ടാണ്​ ആ റിപ്പോർട്ട്​.

ഈ കേസ്​ ഗൂഢാലോചനയുടെ ഫലം

ഹിന്ദുത്വ സംഘടനകളിലെ ചില ആളുകൾ നടത്തിയ ഒരു ഗൂഢാലോചനയുടെ ഫലമാണ്​ അനിയനെതിരായ കേസ്​ എന്ന്​ അമീർ ഖാൻ പറയുന്നു. ഞങ്ങൾ കഠിനാധ്വാനം ചെയ്​ത്​ ജീവിക്കുന്നവരാണ്​, അതിനുള്ള പുരോഗതിയും ഞങ്ങൾക്കുണ്ട്​, പക്ഷേ, ചിലയാളുകൾക്ക്​ അത്​ സഹിക്കുന്നില്ല. ഇപ്പോൾ ഞങ്ങളെ ഉന്നമിടാൻ അവർക്ക്​ നല്ലൊരു അവസരവും കൈവന്നു.

പരവതാനിക്കട, ഫർണിച്ചർ ഷോപ്പ്​, ഐസ്​ക്രീം ഫാക്​ടറി- എന്നിങ്ങനെ മൂന്നു​ ബിസിനസുകളുണ്ട്​ ഖാൻ കുടുംബത്തിന്​ പുരോലയിൽ. ഉബൈദ്​ അറസ്​റ്റിലായതി​െൻറ പിറ്റേനാൾ അവർ പട്ടണം വിട്ട്​ പലായനം ചെയ്യേണ്ടി വന്നു. വ്യാപാരി സംഘടനയായ പുരോല ബ്യാപാർ മണ്ഡൽ 24 മണിക്കൂർ സമയമാണ്​ നാടുവിടാൻ അനുവദിച്ചതെന്നും രണ്ടു മണിക്കൂർ കൊണ്ട്​ എല്ലാം കെട്ടിപ്പെറുക്കി ബിജ്​നോറിലെ നജീബ്​ ബാദിലേക്ക്​ പോവുകയായിരുന്നുവെന്നും അമീർ ഖാൻ പറയുന്നു.

എന്നാൽ, നാടുവിട്ടുപോകാൻ ആവശ്യപ്പെട്ടുവെന്ന ആരോപണം വ്യാപാരി സംഘടനാംഗമായ അങ്കിത്​ പവാർ നിഷേധിക്കുന്നു. ആൾക്കൂട്ടം ആക്രമിച്ചേക്കുമെന്ന ഭീതിയിൽ കടകൾ അടച്ചിടാൻ മാത്രമാണ്​ പറഞ്ഞത്​. അത്​ അവരുടെ സുരക്ഷയെക്കരുതിയാണ്​. മാർക്കറ്റ്​ വീണ്ടും ​പ്രവർത്തന സജ്ജമായെന്നും മുസ്​ ലിം വ്യാപാരികളും കച്ചവടങ്ങൾ പുനരാരംഭിച്ചുവെന്നും അങ്കിത്​ ഈ ലേഖകനോട്​ പറഞ്ഞു.

വിഷയത്തിൽ വർഗീയത കലർത്തുകയും പ്രദേശത്തെ സംഘർഷാവസ്​ഥയിലെത്തിക്കുകയും ചെയ്​തതിൽ നാട്ടുകാരും അസന്തുഷ്​ടരാണ്​. മാധ്യമങ്ങളും ചില ആളുകളും ചേർന്ന്​ ഈ സംഭവത്തെ ഒരു ഹിന്ദു-മുസ്​ ലിം പ്രശ്​നമാക്കി മാറ്റിയതായി ഖാൻ കുടുംബത്തി​െൻറ വീട്ടുടമ വിനയ്​ ഹിമാനി ചൂണ്ടിക്കാട്ടുന്നു.

(scroll.in ൽ മാധ്യമപ്രവർത്തകനാണ്​ ലേഖകൻ)