കിരീടം കെ.കെ.ആർ കൊണ്ടുപോകും; കാരണമുണ്ടെന്ന്​ മൈക്കൽ വോൻ

ഐ.പി.എൽ 13ാം സീസണിലെ വിജയികളെ പ്രവചിച്ചിരിക്കുകയാണ്​ മുൻ ഇംഗ്ലീഷ്​ ടീം നായകൻ മൈക്കൽ വോൻ. ദിനേഷ്​ കാർത്തിക്ക്​ നയിക്കുന്ന കൊൽക്കത്ത നൈറ്റ്​ റൈഡേഴ്​സ്​ ഇത്തവണ കിരീടം നേടുമെന്ന്​ ബ്രിട്ടീഷ്​ ബുക്​മേക്കറായ വില്യം ഹില്ലിന്​ നൽകിയ അഭിമുഖത്തിലാണ്​ മൈക്കൽ വോൻ വ്യക്​തമാക്കിയത്​. ഗൗതം ഗംഭീറി​െൻറ നായകത്വത്തിൽ നേരത്തെ കെ.കെ.ആർ രണ്ട്​ കിരീടങ്ങൾ നേടിയിരുന്നു. എന്തുകൊണ്ട് ഇത്തവണയും കൊൽക്കത്ത ചാംപ്യന്‍മാരാവുമെന്നതിനെ കുറിച്ചും മൈക്കല്‍ വോന്‍ വിശദീകരണം നൽകുന്നുണ്ട്​.

'കൊല്‍ക്കത്ത നൈറ്റ്‌റൈഡേഴ്‌സായിരിക്കും ഇത്തവണ ഐപിഎല്ലിലെ ചാംപ്യന്‍മാര്‍. ബ്രെന്‍ഡന്‍ മക്കല്ലം പരിശീലിപ്പിക്കുന്ന നൈറ്റ്​ റൈഡേഴ്​സ്​ കിരീട നേട്ടത്തിന്​ എല്ലാം കൊണ്ടും അർഹതയുള്ള ടീമാണ്. ശക്തമായ ടീമിനൊപ്പം മക്കല്ലം കൂടി ചേരുന്നതിനാൽ അവര്‍ക്കു ചാംപ്യന്‍മാരാവാന്‍ കഴിയും. കോച്ചെന്ന നിലയില്‍ മക്കല്ലം കരീബിയന്‍ പ്രീമിയര്‍ ലീഗില്‍ കിരീടം നേടിയിരുന്നു. ഇനി ഐപിഎല്ലിലും അദ്ദേഹത്തിനു ഇത് ആവര്‍ത്തിക്കാന്‍ കഴിയുമെന്നാണ് പ്രതീക്ഷിക്കുന്നത്​. -വോൻ അഭിപ്രായപ്പെട്ടു.

കരീബിയന്‍ പ്രീമിയര്‍ ലീഗി​െൻറ നാലാം എഡിഷനിൽ മക്കല്ലം പരിശീലിപ്പിച്ച ട്രിന്‍ബാഗോ നൈറ്റ്‌റൈഡേഴസ്​ കിരീടം നേടിയിരുന്നു. ഒരു മല്‍സരം പോലും തോല്‍ക്കാതെയായിരുന്നു ട്രിൻബാഗോ ചാംപ്യന്‍മാരായത്. 'കുൽദീപ്​ യാദവ്​, സുനിൽ നരയ്​ൻ, പാറ്റ്​ കമ്മിൻസ്​, ആന്ദ്രെ റസൽ, ഇയാൻ മോർഗൻ, ദിനേഷ്​ കാർത്തിക്ക്​, ശുഭ്​മാൻ ഗിൽ, നിതീഷ്​ റാണ തുടങ്ങിയ മികച്ച താരങ്ങളുള്ളതിനാൽ കെ.കെ.ആറിന്​ വിജയ സാധ്യത വർധിക്കുന്നു. ടീമി​െൻറ ബാറ്റിങ്​ നിര ശക്​തമല്ലെന്ന്​ പറയുന്നവർ ഇൗ പറഞ്ഞവരിലേക്ക്​ ഒന്ന്​ നോക്കിയാൽ മതി. അവർ തന്നെയാകും ഇത്തവണത്തെ ചാംപ്യൻമാർ. -വോൻ പറയുന്നു.

രോഹിത്​ ശർമയുടെ മുംബൈ ഇന്ത്യൻസുമായാണ്​ കെ.കെ.ആറി​െൻറ ആദ്യ മത്സരം. അടുത്ത ബുധനാഴ്​ച നടക്കുന്ന മത്സരത്തിൽ വിജയിച്ച്​ ഇത്തവണത്തെ സീസൺ തുടങ്ങാനാണ്​ ടീം ലക്ഷ്യമിടുന്നത്​. 2014ലെ കിരീടം നേട്ടത്തിന്​ ശേഷം തുടർച്ചയായി പ്ലേഒാഫുകളിൽ അടിതെറ്റിയ ഷാരൂഖ്​ ഖാ​െൻറ ടീം 13ാം സീസണിൽ കിരീടത്തിൽ കുറഞ്ഞതെന്നും പ്രതീക്ഷിക്കുന്നില്ല.