തീതുപ്പി ജർമനി; കരിഞ്ഞുണങ്ങി പോർച്ചുഗൽ, ഉദ്വേഗ ജനകമായി മരണഗ്രൂപ്പ്​

മ്യൂണിക്​: പ്രൊഫഷണൽ ഫുട്​ബാളിന്‍റെ വക്താക്കളായ ജർമനി പ്രതാപകാലത്തെ ഓർമിപ്പിക്കും വിധം തീതുപ്പിയ മത്സരത്തിൽ രണ്ടിനെതിരെ നാലുഗോളുകളേറ്റ്​ പോർച്ചുഗൽ കരിഞ്ഞുണങ്ങി. ഒരു ഗോളിന്​ പിന്നിൽ നിന്ന ശേഷമായിരുന്നു തിരിച്ചടിയുമായി ജർമനിയുടെ രാജകീയ തിരിച്ചുവരവ്​. ജർമൻ മുന്നേറ്റ നിര പാഞ്ഞടുത്തതോടെ ​പറങ്കിപ്പടയുടെ പ്രതിരോധം ആടിയുലയുകയായിരുന്നു. ഇതോടെ മരണഗ്രൂപ്പായ 'എഫിൽ' അവസാന മത്സരം എല്ലാം ടീമുകൾക്കും നിർണായകമായി. രണ്ടുമത്സരം വീതം പൂർത്തിയായപ്പോൾ ഫ്രാൻസിന്​ നാലും ജർമനി, പോർച്ചുഗൽ ടീമുകൾക്ക്​ മൂന്ന്​ വീതവും ഹംഗറിക്ക്​ ഒന്നും പോയന്‍റാണുള്ളത്​.

മത്സരത്തിന്‍റെ ആദ്യം മുതൽ എതിർഗോൾമുഖത്തേക്ക്​ ഇരമ്പിയാർത്ത ജർമനി അഞ്ചാം മിനിറ്റിൽ തന്നെ ഗോളടിച്ചുവെങ്കിലും ഓഫ്​ സൈഡ്​ പതാക ഉയരുകയായിരുന്നു. നിരന്തരം ആക്രമണം അഴിച്ചുവിട്ട ജർമനിയെ ഞെട്ടിച്ച്​ 15ാം മിനിറ്റിൽ പോർച്ചുഗൽ ഗോൾ കുറിച്ചു. കൗണ്ടർ അറ്റാക്കിനൊടുവിൽ ബെർണാഡോ സിൽവയുടെ പാസ്​ അനായാസം റൊണാൾഡോ വലയിലെത്തിക്കുകയായിരുന്നു. ജർമനിക്കെതിരെ കരിയറിൽ ഇതാദ്യമായാണ്​ റോണോ ഗോളടിക്കുന്നത്​.

ഉണർന്നെണീറ്റ ജർമനി എതിർഗോൾമുഖം ലക്ഷ്യമാക്കി പാഞ്ഞടുത്തു. 35ാം മിനിറ്റിൽ ഹാവെർട്​സിന്​ നേരെ ഗോസൻസ് നീട്ടിക്കൊടുത്ത ക്രോസിന്​​ തടയിടുന്നതിനിടെ റൂബൻ ഡയസ്​ സ്വന്തം പോസ്റ്റിലേക്ക്​​ പന്ത്​ തട്ടിയതോടെ ജർമനിക്ക്​ ആദ്യ ഗോൾ സമ്മാനമായി ലഭിച്ചു​. നാലുമിനിറ്റുകൾക്ക്​ ശേഷം ജർമനിയുടെ രണ്ടാം ഗോളെത്തി. റൂഡിഗറിന്‍റെ ​ക്രോസ്​ ക്ലിയർ ചെയ്യാനൊരുങ്ങിയ പോർച്ചുഗൽ പ്രതിരോധ ഭടൻ ഗുറേറിയോ​യുടെ കാലിൽ തട്ടി പന്ത്​ വീണ്ടും സ്വന്തം വലയിലേക്ക്​. സ്​കോർ 2-1. നാബ്രി-ഹാവെർട്​സ്​ സഖ്യമായിരുന്നു പോർച്ചുഗീസ്​ പ്രതിരോധത്തെ കുലുക്കിയത്​. 

ഇടവേളക്ക്​ ശേഷം കൂടുതൽ കരുത്തരായ ജർമനിയെയാണ്​ മൈതാനം കണ്ടത്​. ​51ാം മിനുറ്റിൽ സംഘടിത മുന്നേറ്റത്തിനൊടുവിൽ ഹാവെർഡ്സ്​​ മൂന്നാം ഗോൾ കുറിച്ചു. 61ാം മിനുറ്റിൽ  നിറഞ്ഞുകളിച്ച ഗോസൻസിന്‍റെ ബൂട്ടിൽ നിന്നായിരുന്നു നാലാംഗോൾ.

67ാം മിനുറ്റിൽ ഫ്രീകിക്കിൽ നിന്നും റൊണാൾഡോ സുന്ദരമായി മറിച്ചു നൽകിയ പന്ത്​ വലയിലെത്തിച്ച്​ ഡിയഗോ ജോട്ട പോർച്ചുഗലിന്​ ജീവ ശ്വാസം പകർന്നെങ്കിലും മത്സരം കൈവിട്ടിരുന്നു. മത്സരത്തിലേക്ക്​ തിരിച്ചുവരാൻ പോർച്ചുഗൽ പൊരുതിയെങ്കിലും കോട്ടകെട്ടിയ ജർമൻ ​പ്രതിരോധത്തെ മറികടക്കാനായില്ല.